Мэлылъфэгъур къызихьагъэм къыщегъэжьагъэу коронавирусым пэуцужьырэ вакцинэр зыщахалъхьэрэ мобильнэ пунктым иIофшIэн Мыекъуапэ игупчэ щыригъэжьагъ. Вакцинэр зыхябгъэлъхьаным пае джы поликлиникэм укIон ищыкIэгъэжьэп. Адыгеим псауныгъэр къэухъумэгъэнымкIэ и Министерствэ къызэритыгъэмкIэ, паспортыр ыкIи СНИЛС-р зыдэпIыгъынхэ фае.

Мобильнэ пунктым Iоф зэришIэрэр: мэлылъфэгъум и 12 – 16-м (блыпэ – бэрэскэшху) сыхьатыр 10-м къыщегъэжьа­гъэу 15-м нэс – Лениным ыцIэ зыхьырэ гупчэм дэжь ар щытыщт; мэлылъфэгъум и 17 – 18-м (шэмбэт – тхьаумаф) сыхьатыр 10 – 15-м – къэлэ паркым идэхьагъу къыIу­уцощт.

Вакцинэу «Спутник V» зыфиIорэр къыхэзыхыгъэ Александр Гинцбург прививкэм ыуж иммунитетыр зэрэпытэрэм фэгъэхьыгъэу мырэущтэу къеIо:

— Вакцинэм епхыгъэ лъып­лъэн­хэр окIофэхэ апэрэ хэлъ­хьагъур зыфашIыгъэ цIыфхэм ащыщэу коронавирусыр мэкIэ дэд къызэутэкIыгъэу тызэри­хьылIагъэр, ятIонэрэ хэлъхьагъур зыфашIыгъэхэу, мэфэ 21-рэ темышIагъэми, узыр къыз­пыхьагъэу хъугъэ-шIэгъэ зырыз дэд дгъэунэфыгъэр.

Ащ епхыгъэу COVID-19-м зыщызыухъумэ зышIоигъо пстэуми зафэсэгъазэ. Вакцинэу «Спутник V-р» мэфэ 21-рэ азыфагу илъэу тIогъогогъо ахалъхьэ. ЦIыфыр узым щыухъу­магъэ зыхъурэр ятIо­нэрэ хэлъхьа­гъум ыуж тхьа­мэфищ зытешIэкIэ ары. А уахътэм къыкIоцI пкъынэ- лынэр узым пэуцужьышъунэу мэхъу. Ти­уп­лъэкIунхэм къызэрагъэлъэгъуагъэмкIэ, зыныбжь илъэс 60-м къехъугъэ­хэм анахьи ныбжьыкIэхэм яиммунитет нахь псынкIэу мэпытэ.

Джащ фэдэу вакцинэр зыхалъхьагъэхэм анаIэ тырязгъа­дзэ сшIоигъу: зызэраухъумэрэ амалхэр чIэшъумынэх —нэгуихъор зыIужъугъэлъ, шъуIэхэр шъутхьакIых, социальнэ зэпэ­чыжьагъэм шъу­лъыплъ, общественнэ транспортым ыкIи чIыпIэхэм, анахьэу вакцинэм ихэлъхьагъухэм азыфагу, защышъу­дзый. А зэпстэумэ ауж пкъы­нэ–лынэр процент 92-м нэсэу узым пэуцужьын ылъэ­кIыщт. Зыныбжь илъэс 60-м къехъу­гъэхэмкIэ прививкэм ишIын мэхьанэшхо иI. Коронавирусыр къапыхьаным ищынагъо ахэм нахь ашъхьарытышъ, вакцинэр зыхалъхьэмэ нахь ухъумагъэ хъущтых.

Iэшъынэ Сусан.