УФ-м и Президентэу Владимир Путиным зэпахырэ узэу дунаир зэ­лъызыкIугъэр къежьэным ыпэкIэ цIыфэу IофшIэпIэ чIыпIэ зиIэхэм япчъагъэ зэрэхъущтыгъэм фэдизым джыри тыкъыфэкIожьынэу ащ фэ­гъэзагъэхэм пшъэрылъ къафишIыгъ.

Бизнесым щылажьэу IофшIэпIэ чIыпIэ зимыIэжьым ар къе­зытырэм къэралыгъор IэпыIэгъу къыфэхъущтэу ары Президентым къызэриIуагъэр.

— IофшIапIэ имыIэжьэу блэ­кIыгъэ илъэсым къэнагъэхэр зыштэхэрэм ахэм лэжьапкIэу аритыщтым щыщ Iахьым къэ­ралыгъом къыфыригъэгъэзэ­жьыщт. ЛэжьэпкIэ анахь макIэу агъэнэфагъэм фэдищ нэбгырэ пэпчъ пае илъэсныкъом къыкIоцI къыфэкIощт, — къыIуагъ Владимир Путиным.

Ащ фэдэ фэгъэкIотэнхэр зы­фашIыхэрэм ахъщэу къафы­зэ­тенэрэмкIэ лэжьапкIэр къа­Iэты­нэу къяджагъ. IофшIэпIэ чIы­пIэр къызэратыхэрэм пэIудзыгъэ шIы­кIэм тетэу Iоф арагъэшIэн амал законым джы къызэраритырэри агу къыгъэ­кIыжьыгъ.

Джащ фэдэу цIыфэу IофшIапIэхэм аIутхэр IэзэпIэ-гъэпсэфыпIэхэм агъэкIонхэм фэгъэ­хьыгъэ программэм зегъэу­шъомбгъугъэн фаеуи къэра­лы­гъом ипащэ ылъытагъ. Коронавирусыр къызэолIагъэу, хьы­лъэу ар зэпызычыгъэхэр ары анахьэу путевкэхэр зэратынхэ фаеу къыхигъэщыгъэхэр.

ЦIыфхэм сэнэхьатэу яIэмкIэ IофшIэпIэ чIыпIэ амыгъотырэмэ, нэмыкI феджэнхэ е яшIэныгъэ­хэм ахагъэхъон амал ятыгъэным фытегъэпсыхьэгъэ IофшIэныри нахь агъэлъэшынэу Владимир Путиным къариIуагъ. IофшIэпIэ чIыпIэхэм ябэдзэршIыпIэ ана­хьэу къин щызылъэгъухэрэм, гущыIэм пае, кIэлэцIыкIу зы­Iыгъ ныхэм, пенсием зыныбжь екIо­лIагъэхэм, зипсауныгъэ пыч фэ­хъугъэхэм, яшIэныгъэхэм аха­гъэхъон амал яIэными къэралыгъом иIахь къыхилъхьащтэу Президентым къыIуагъ.

— ЦIыфхэм ящыIэкIэ-псэукIэ нахьышIу хъуным, ялэжьапкIэ нахьыбэным, гупсэфыныгъэ яIэ­ным а зэкIэри афэIорышIэщтых, — къыкIигъэтхъыгъ къэралы­гъом ипащэ. — Iоф зышIэрэ цIыфым шъхьэкIафэ фэшIыгъэныр, соци­альнэ зэкъотныгъэр, экономиче­скэ зэдэштэныгъэр УФ-м и Конституциеу дгъэкIэжьыгъэм принцип шъхьаIэу хэтлъхьагъэ­хэм ащыщых. Арышъ, ахэм шъо­лъырхэми, районхэми, отрас-лэ пэпчъи, хъызмэтшIапIэхэми, кол­лективхэми Iоф ащашIэн фае.