ИшIэжь кIосэщтэп
ЗэлъашIэрэ журналистэу, адыгэм идунай лъэшэу щагъэлъапIэщтыгъэу Аслъанкоз Бек идунай ыхъожьыгъ. Козета Бек — джары анахьэу зэрашIэщтыгъэ цIэр.
Москва къэралыгъо университетым журналистикэмкIэ ифакультет ащ къыухыгъ, СССР-м икъэралыгъо телерадиокъэтынхэр къызщагъэхьазырырэ гупчэм иараб къутамэ щылэжьагъ. 1950-рэ илъэсым къыщыублагъэу мэфэку пчыхьэ къэс сыхьатыр 9-м эфирым Аслъанкоз къихьэщтыгъэ, IэкIыбым щыпсэухэрэ тилъэпкъэгъухэм хэкум ихъухьэрэр аригъашIэщтыгъэ. «Шъуипчыхьэ шIу! Микрофоным кIэрысыр Козета Бек» — мы гущыIэхэм Кфар-Камэ, Истамбыл, Амман ащыпсэухэрэ адыгэхэр лъэшэу яжэщтыгъэх, зэхэсхэу чIыгужъым щыкъэбархэм ядэIущтыгъэх.
Къэтынхэр зэригъэхьазырыхэрэм имызакъоу, Аслъанкоз афатхэщтыгъэ, ныдэлъфыбзэм, адыгэ культурэм язэгъэшIэнкIэ адэIэпыIэщтыгъэ.
ИщыIэныгъэ инахьыбэ журналистым Москва щыкIуагъ, ау иIофшIэни, игупшыси зэпхыгъагъэхэр Адыгеир ары.
Аслъанкоз Бек «Адыгэ Республикэм изаслуженнэ журналист» зыфиIорэ щытхъуцIэр 2017-рэ илъэсым къыфагъэшъошагъ.
«Ащ фэдэ бзылъфыгъэ губзыгъэу, ихэгъэгу, ихэку афэшъыпкъэу, мыпшъыжьэу лэжьагъэр тщымыгъупшэныр ыкIи ишIэжь дгъэлъэпIэныр тэ типшъэрылъ», — къащитхыгъ Адыгеим и ЛIышъхьэу КъумпIыл Мурат исоциальнэ нэкIубгъохэм.