Адыгэ Республикэм и Къэралыгъо Совет — Хасэм щызэхащэгъэ НыбжьыкIэ парламентым зичэзыу зэхэсыгъоу тыгъуасэ иIагъэр зэри­щагъ ащ итхьаматэу Джастэ Вячеслав.

Наркотикхэр хэбзэнчъэу рес­публикэм къыщемыгъэкIокIы­гъэнхэм рецепт зыпылъ Iэзэгъу уцхэр аптекэхэм зэращэхэрэм лъыплъэнхэр нахь гъэлъэшы­гъэным, студентхэм ыкIи Iэта­хъохэм азыфагу наркоманием зыщимыушъомбгъунымкIэ шIэгъэн фаехэм Iофтхьабзэр афэгъэхьыгъагъ.

Зэхэсыгъом хэлэжьагъэх АР-м хэгъэгу кIоцI IофхэмкIэ ­и Министерствэ наркотикхэр хэбзэнчъэу амыгъэзекIонхэм лъыплъэгъэнымкIэ отделым ипащэу, полицием иполковникэу Нэфышъ Рустам, УФ-м и Президент дэжь щыIэ АР-м ипредставительствэ иныбжьыкIэ къу­тамэ итхьаматэу АкIэгъу За­кир, АР-м и Парламент идепутатэу Шэуджэн Тембот, АР-м гъэсэныгъэмрэ шIэныгъэмрэкIэ и Министерствэ кIэлэцIыкIухэм ыкIи ныбжьыкIэхэм япIун ылъэныкъокIэ щыIэ къэралыгъо политикэр пхырыщыгъэнымкIэ и ГъэIорышIапIэ ипащэу Нэгэрэкъо Алый, ныбжьыкIэ парламентым хэтхэр.

Джастэ Вячеслав Iофтхьа­бзэм пэублэ псалъэ къыщишIызэ, непэ зэрэдунаеу зыгъэгу­мэ­кIырэ Iофыгъо шъхьаIэу ныб­жьыкIэхэр наркоманием пыщагъэ зэрэхъухэрэм парламентым хэтхэр ыгъэгумэкIыхэу зэрэзэрэугъоигъэхэр къыхигъэ­щыгъ. Джащ фэдэу, НыбжьыкIэ парламентыр хэгъэгу кIоцI Iоф­хэмкIэ къулыкъушIэхэм аготэу наркоманием зэрэпэуцужьыщт шIыкIэхэу агъэнэфагъэхэм ягугъу къышIыгъ.

АР-м хэгъэгу кIоцI IофхэмкIэ и Министерствэ наркотикхэр хэбзэнчъэу амыгъэзекIонхэм лъыплъэгъэнымкIэ иотдел ипащэу Нэфышъ Рустам къызэри­IуагъэмкIэ, наркотик зыхэлъ пкъыгъохэр республикэм къизыхьэхэрэр къэубытыгъэнхэр, ахэр IузыгъэкIыхэрэм ыкIи ар ышъхьэкIэ зыгъэфедэхэрэм уголовнэ пшъэдэкIыжь ягъэхьыгъэныр, мы лъэныкъомкIэ бзэ­джашIэхэм якъыхэгъэщын фэгъэзэгъэ подразделениехэм яIофшIэн лъыплъэгъэныр отделым ипшъэрылъ шъхьаIэхэм ащыщ.

— 2020-рэ илъэсым наркотикхэм япхыгъэ бзэджэшIэгъэ 302-рэ тиреспубликэ щызэра­хьагъ, — къыIуагъ отделым ипа­щэ. — Ащ щыщэу 102-р наркотик IугъэкIыгъэным еп­хыгъ, мы лъэныкъомкIэ бзэджэшIагъэ зезыхьэгъэ нэбгырэ 221-мэ уголовнэ Iоф къафызэ­Iуахыгъ. Iофтхьэбзэ зэфэшъхьа­фэу зэхащагъэхэм яшIуагъэкIэ наркотик лъэпкъ зэфэшъхьафэу килограмми 8 къахахыгъ, бзэ­джэшIэгъэ хьылъэ зезыхьэгъэ нэбгырэ 79-рэ къыхагъэщыгъ.

Нэфышъ Рустам зэхэсыгъом хэлажьэхэрэм анаIэ зытыра­ригъэдзагъэхэм ащыщ наркотикхэм апыщагъэхэм Iэтахъохэр мымакIэу зэрахэтхэр. Мы гу­мэкIыгъом къыпкъырыкIыхэзэ, кIэлэцIыкIухэр наркотикхэм ащыухъумэгъэнхэм фэшI наркоконтролым иIофышIэхэр еджа­пIэхэм кIохэзэ Iофтхьэбзэ зэ­фэшъхьафхэр афызэхащэх, нар­котикыр щынагъоу зэрэщытыр, ащ къыздихьын ылъэкIыщт тхьамыкIагъохэр къизыIотыкI­хэрэ къэгъэлъэгъонхэм арагъэ­плъых, къафаIуатэх. Ау а шIыкIэхэр джырэ дунаим икъу­хэрэп.

Джы ныбжьыкIэ парламентым илIыкIохэр яIэпыIэгъухэу пэшIорыгъэшъ Iофтхьабзэхэр агъэ­лъэшыщтых. Интернет амалхэр къызфагъэфедэщтых, общест­венностыр къыхагъэлэжьэщт.

Адыгэ шъолъыр организациеу «НыбжьыкIэхэм я Урысые Союз» зыфиIорэм къыгъэхьазырыгъэ проектэу «Нарт» зыфиIорэр пхыращыщт. Ащ къытегущыIагъ организацием ипащэу Мыгу Бислъан. Псауныгъэм зэрар езыхыщтхэ шIыкIэхэр щыгъэзыегъэнхэм фэIорышIэщт проектыр къоджэ псэупIэхэм ащагъэцэкIэщт, мыщ къыдыхэлъытэгъэ спорт зэнэкъокъухэу, зэIукIэгъухэу рагъэкIокIыщтхэм наркоманием изэрар къащыфаIотэщт.

Зэхэсыгъом зыщытегущыIагъэхэм ащыщ НыбжьыкIэ парламентым хэбзэгъэуцу IофшIэным ылъэныкъокIэ ашIагъэр. НыбжьыкIэ парламентым и Положение зэхъокIыныгъэхэу фашIыгъэхэм ащыщхэм Джастэ Вячеслав ягугъу къышIыгъ.

— ШъунаIэ тешъудзэмэ сшIои­гъу, парламентым изэIукIэгъу илъэситIу пIалъэу иIэр, джы илъэситфым ыкIи хэтхэм япчъа­гъэ нэбгырэ 50-м нэгъэсыгъэщт, — къыIуагъ ащ. — НыбжьыкIэ парламентым хэхьащтхэм япроцент 75-р ныбжьыкIэ организациехэм ыкIи студентхэм ялIыкIощтых. Мы илъэсым чъэпы­огъу-шэкIогъу мазэхэм парламентыр икIэрыкIэу зэхэтщэжьыщтышъ, республикэм иныбжьыкIэ чанхэр, гукъэкI чыжьэхэр зиIэхэр къызэрэхэтхыщтхэм тыпылъын фае.

Зэхэсыгъом икIэух Гъэцэ­кIэкIо комитетым ищыкIэгъэ уна­шъохэр фашIыгъэх, тапэкIэ Iоф зыдашIэщтхэ лъэныкъохэр агъэнэфагъэх.

Iэшъынэ Сусан. Сурэтхэр Iэшъынэ Аслъан тырихыгъэх.