Красногвардейскэ районым икъуаджэу Джамбэчые щыщ Хъунэго Гощпакъэ мы мафэхэм медалэу «Урысые Федерацием изаслуженнэ фермер» зыфиIорэр къыфагъэшъошагъ. А щытхъуцIэр тирайонкIэ къэзылэжьыгъэр а зы нэбгырэр ары. Адыгеим и бзылъфыгъэхэм я Союз икъутамэу Красногвардейскэ районым щыIэм бэмышIэу Улапэ щызэхищэгъэ зэIукIэм (Наталья Дорот икIэщэкIуагъ) Хъунэго Гощпакъэ щагъэшIуагъ.

Гощпакъэ 1955-рэ илъэсым чъэпыогъум и 10-м къуаджэу Пэнэжьыкъуае Хъуажъ Даутэрэ Рахьмэтрэ яунэгъо зэгурыIожь апэрэ бынэу къихъухьагъ. Ятэу Даут Ибрахьимэ ыкъом игугъу къэтшIыныр къылэжьыгъ. Мы лIыр чылэм ианахь цIыф дэ­гъоу, лэжьакIоу Пэнэжьыкъуае дэсыгъэмэ ащыщыгъ. Заом иветераныгъ, Берлин нэсыгъэхэу рейхстагыр зыштагъэмэ ахэ­тыгъ. Зэо ужым участковэ милиционерэу Теуцожь районым чылэгъо пчъагъэ къыгъэгъунэу, хъупхъэу Iоф ышIагъ. «Отличник советской милиции» зыфиIорэ щытхъуцIэр къыфагъэшъошэ­гъагъ. Ащ ишIэжь агъэлъапIэу зыщыпсэущтыгъэ унэм мы­жъобгъу къыщыфызэIуахыгъ.

Гощпакъэ къызэрыхъухьэгъэ лэжьэкIо унагъор зэо ужым зыкъэзыIэтыжьынэу езыгъэ­жьэжьыгъэмэ ащыщыгъ. Хахъуи яIэу, сабыиплIи зэшъхьэгъусэмэ зэдагъотыгъэу щытыгъ. 1972-рэ илъэсыр къихьагъэ къодыеу Даутэ ишъхьэгъусэу Рахьмэт идунай ыхъожьыгъ. Гощпакъэ нэбжьыкIэ дэдэу янэ къылъфыгъэмэ ягумэкI кIэуцуагъ. Ышыпхъоу Гощмафи, ышэу Олэгъэий, нахьыкIэ дэдэу Гощэфыжьи апылъыгъ.

Даутэ ибынмэ ыпсэ ахэтIагъэу къыгъэгъунэщтыгъэ, ахэр дахэу ыпIущтыгъэх, ау ари 1974-рэ илъэсым Рахьмэт кIэлъыкIожьыгъ.

Мы уахътэр Гощпакъэ щы­гъуп­шэрэп: «ЦIыфмэ адыгэгъэ шэн-хэбзэ дахэхэу ахэлъыгъэ­хэр, чIэнэгъэшхоу къытэхъулIагъэр зэхэтымышIэным зэрэпылъыгъэхэр, гъунэгъухэу тиIагъэмэ афэдэ дунаим тетыгъэп сшIошIы. Ахэр Тыгъужъ Даут, Уайкъокъо Хьарунэ иунагъу, Хьабэхъу Нуриетрэ Хьисэрэ, Къат Аслъанбэчрэ Мули­Iэтрэ. Мыхэм ягущыIэ фабэ сщыгъупшэрэп, къытхахьэщтыгъэх, тыкъагъэгъунэщтыгъэ. Ахэр арых шIушIэным сыгу фэзыщагъэхэр».

Гощпакъэ Пэнэжьы­къое еджа­пIэр къызеухым, 1973-рэ илъэсым Адыгэ къэралыгъо институтым ифизикэ- хьисап факультет чIэхьагъ. ЯплIэнэрэ курсым исэу Джамбэчые нысэ хъугъэ. Хъунэго Хьалимэ шъхьэгъусэ фэхъугъ. Унагъор къыдеIэзэ институтыр къы­рагъэухыгъ. Ащ фэшъхьафэу ышыпхъухэми ыши еджэгъу илъэсхэм, щы­Iэны­гъэм чIыпIэ щагъотынымкIи Хъунагохэр адеIа­гъэх. Ащ фэдэ зэкIэми янасып къы­хьырэп.

— Сыкъызхэхьэгъэ унагъори лэжьэкIо унэгъуагъ, — къеIуатэ Гощпакъэ, — сигуащэ къысфишIагъэр бэ дэд. Сибынхэр сянэ-сятэмэ адэжь сщэхэу зы мафи зезгъэ­гъэпсэфыгъэп, сянэ щымы­Iэжьым ычIыпIэ итэу тызэдэпсэу. Тхьэм бэгъашIэ ешI, илъэс 90-м къехъугъэу щыт. Къиныгъо зэфэшъхьафхэр зэпичыхэзэ, бзылъфыгъэр ищыIэныгъэ гъогу къырэкIо. 2012-рэ илъэсым Гощпакъэ ишъхьэгъусэу Хьалимэ сымэджэ хьылъэ къэхъуи, идунай ыхъо­жьыгъ. Опсэуфэ ар IофшIэ­кIуагъ, игупсэхэри ащ фигъэсагъэх, амышIэуи афидэщтыгъэп. Джы икIали ятэ фэдэкъабзэ хъужьыгъэу, къазгъырыр ыIыгъэу илъэс пчъагъэм амылэжьэу атIупщыжьыгъэ чIыгур къыIэтыжьыгъ. Гощпакъэ ипщырэ ишъхьэгъусэрэ губгъо IофшIэнхэм апылъыхэ зэхъум зэхихыгъэхэр, инэрылъэ­гъугъэхэр джы ыпэкIэ лъегъэ­кIуатэх.

Гощпакъэрэ ишъхьэгъусэрэ кIалэрэ пшъашъэрэ зэдапIугъэх — Махьмуд ыкIи Светланэ. КIалэм ишъхьэгъусэу Саидэрэ ежьыррэ Красногвардейскэм щэпсэух, пшъэшъэжъыитIурэ зы кIалэрэ яI. Къорылъфхэр гимназием чIэсых, ахэр Iофтхьабзэхэм чанэу ахэлажьэх — къэ­шъуакIох, орэдыIох, тфы закIэкIэ еджэх. Гощпакъэ икIали ипшъа­шъи апшъэрэ шIэныгъэ тIурытIу зэрагъэгъотыгъ, къуаджэм къэ­кIох, къадэIэпыIэх, зэрагъэлъэгъух. Ахэм ныр ащэгушIукIы, арэгушхо.

СигущыIэгъу IофшIэн гъогу бай къыкIугъ ыкIи игукъэкIыжьхэм тащегъэгъуазэ.

— Джамбэчые гурыт еджапIэм илъэс 17-рэ хьисапымкIэ щезгъэджагъэх, — еIо ащ. —Нэужым гъунэгъу къуаджэу Большой Сидоровым иадминистрацие илъэс 15-рэ Iоф щысшIагъ, илъэс 55-рэ сыхъумэ, пенсием сыкIон сыгу хэлъэу, сишъхьэгъусэ сымэджэ хьылъэ зэхъум сыкъыIукIыжьыгъ. Iоф­шIэн симыIэу сыщысыным сесагъэу щытэп. Ащ ыпэкIэ унагъом чIыгулэжьыныр щыслъэгъу­гъэу, хъулъфыгъэмэ гъэхъагъэу губгъом щыряIэр къызгурыIуагъэу щытыгъ. АшIагъэр бгъэкIодыщтэп ныIа. Мыщ дэжьым фермерскэ грант къа­Iысхын, егъэжьапIэ сшIынэу исхъухьагъ.

Гощпакъэ къыхихыгъэ гъогур псынкIагъоп. Ау, къин умылъэгъоу гъэхъагъэ пшIын плъэкIыщтэп. Грантыр чIыфэу щытэп, ау зытебгъэкIодэщтыр къызфаIыпхыгъэ Iофыр ары ныIэп. Ащ ыуж ар зэрэбгъэфедагъэр хабзэм нэрылъэгъу фэп­шIы­жьынэу щыт.

ЦIыфхэр зэкIэри зэфэдэхэп, зым гумэкIыгъо лые ыпшъэ римылъхьажьэу, ышхын тIэкIу ыгъотымэ гупсэфэу щыIэнэу къыхехы, адрэм Iофым игъэцэкIэн гу тырешIыхьэ, зыщэгугъыжьы. Гощпакъэ гъэцэкIакIомэ ащыщ, дэгъоу къыгурэIо «хабзэм зыгорэ къысIуидзэн» пIоу ущысмэ, щыIэныгъэр зэхъокIыгъэ зэрэмыхъущтыр. Грантыр къыуа­тыным пае уигъэхъагъэ­хэр, проектыр, чIыгур уиIэнхэ фае.

Хъунагомэ ягъэхъагъэхэр Адыгеим щашIэщтыгъэ, алъэгъущтыгъэ. Арыти, грантыр къыратыгъ. Гощпакъэ зыфэя­гъэр къыдэхъугъ, мэкъумэщ хъызмэт пытэ ыгъэпсыгъ. Непэ ар унэе предприниматель, КФХ-м ипащ, шIу зышIэрэ цIыф. «УФ-м изаслуженнэ фермер» щытхъуцIэр къыфагъэшъошагъ.

Пандемием ыпкъ къикIыкIэ цIыфхэр гумэкIыгъо зыхэфэхэм, IэпыIэгъу зищыкIагъэмэ ахъщэ афитIупщыгъ. ЦIыфхэр лъэшэу къыфэразэхэу, «тызэрыгушхон тиI, уахътэм урилIыхъужъ» къе­зыIуагъэхэр къыхэкIыгъэх. Селоу Красногвардейскэм дэс бзылъфыгъэм фишIагъэр игуапэу Оренбург хэкум инэIуасэхэу щыпсэухэрэм къэбарыр алъигъэIэсыгъ. Гощпакъэ игупыкIрэ ихьалэлыгъэрэ бгъэшIэгъонэу щыт. Зы лъэIуакIо иIалъмэкъ зыгорэ фыримылъхьэу егъашIи блигъэкIыгъэп.

Гощпакъэ сыд фэдэрэ егъэ­жьапIэ ышIыщтми Адыгеим и Правительствэ, мэкъу-мэщымкIэ Министерствэм, район отделым афэраз IэпыIэгъу къызэрэфэхъу­хэрэмкIэ.

Пщыкъэнэ Май. Улап.