Республикэ зэхэщэкIо комитетэу «ТекIоныгъ» зыфиIорэм изэхэсыгъоу тыгъуасэ щыIагъэр зэрищагъ ащ итхьаматэу, Адыгэ Республикэм и ЛIышъхьэу КъумпIыл Мурат. ТекIоныгъэм ия 76-рэ илъэс хэгъэунэфыкIыгъэным изыфэ­гъэхьазырын, нэмыкIхэм къэзэрэугъоигъэхэр атегущыIагъэх.

Iофтхьабзэм хэлэжьагъэх АР-м и Къэралыгъо Совет — Хасэм и Тхьаматэу Владимир Нарожнэр, республикэм и Премьер-министрэу Геннадий Митрофановыр, вице-премьерэу Наталья Широковар, Адыгеим иветеранхэм я Совет итхьама­тэу Къоджэ Аслъан, ведомствэ зэфэшъхьафхэм япащэхэр.

Адыгеим и ЛIышъхьэ зэхэсыгъом пэублэ псалъэ къыщи­шIызэ, тицIыфхэм анахь мэхьанэшхо зэратырэ ТекIоны­гъэм и Мафэ зэрифэшъуашэу хэгъэунэфыкIыгъэн зэрэфаер къыхигъэщыгъ, ащкIэ ведомст­вэм, къулыкъухэм, муниципалитетхэм пшъэрылъ гъэнэфа­гъэхэр афишIыгъэх.

— Пандемием ыпкъ къикIыкIэ гъэрекIо мы мафэр икъу фэдизэу дгъэмэфэкIын тлъэкIыгъэп. Сымаджэхэм япчъагъэ нахь макIэ зэрэхъурэм, вакцинэр жъугъэу зэрэзыхалъхьэрэм яшIуагъэкIэ, сымаджэхэм япчъагъэ бэкIэ нахь макIэ хъугъэ. Арышъ, тикъэралыгъо щыпсэухэрэм анахь мэхьанэ­шхо зэратырэ, агъэлъэпIэрэ ТекIоныгъэм и Мафэ зэрифэшъуашэу республикэм щыхэдгъэунэфыкIыщт. Непэ псаоу къытхэт ве­теранхэм атефэрэ пстэури афэтшIэным, ахэм ясоциальнэ Iофыгъохэр зэшIохыгъэнхэм тынаIэ атедгъэтын фае. Урысые Федерацием и Президентэу Владимир Путиным ащ гъунэ лъефы. Урысые патриотическэ Iофтхьабзэхэу зэхащэщтхэм Адыгеир ахэлэжьэн фае, Хэгъэ­гур къэзыухъумэгъэ ветеранхэм къатефэрэ уасэр афэтшIын фае, — къыIуагъ КъумпIыл Мурат.

АР-м иветеранхэм я Совет итхьаматэу Къоджэ Аслъан къызэриIуагъэмкIэ, непэрэ ма­фэм ехъулIэу Хэгъэгу зэошхом иветеран 89-рэ республикэм щэпсэу, ахэм ащыщэу мэфэкI Iофтхьабзэм къекIолIэн амал зиIэр нэбгырипшI ныIэп. Ве­теран пэпчъ анаIэ тырагъэтынэу, яунэхэм якIуалIэхэзэ афэгушIонхэу ыкIи IэпыIэгъу афэхъунхэу КъумпIыл Мурат муниципальнэ образованиехэм къафигъэпытагъ.

ТекIоныгъэшхом ихэгъэунэфыкIын изыфэгъэхьазырынкIэ, ащ къыдыхэлъытэгъэ Iоф­тхьэбзэ шъхьаIэхэу зэхащэщтхэмкIэ гухэлъэу щыIэхэм къатегущыIагъ АР-м лъэпкъ Iоф­хэмкIэ, IэкIыб къэралхэм ащы­псэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр. Ащ къызэриIуагъэмкIэ, республикэм патриотическэ Iофтхьабзэхэр бэу щызэхащэщтых, шIэжьым, лIыхъужъныгъэм ясыхьатхэр, культурэм епхыгъэ Iофтхьабзэхэр щыIэщтых. Тикъэлэ шъхьаIэ дакIоу, муниципалитетхэм, псэупIэхэм мэфэкIыр ащахагъэунэфыкIыщт, Iофтхьэбзэ гъэшIэгъонхэр ащыкIощтых. Джащ фэдэу ТекIоныгъэм ия 76-рэ илъэс ехъулIэу буклетхэр къыдагъэкIыщтых.

Хабзэ зэрэхъугъэу, жъоныгъуакIэм и 9-м «МыкIодыжьыщт полк» зыфиIорэ Iофтхьабзэр зэ­хащэщт. Мыекъопэ къэлэ ад­ми­нистрацием ипащэ ипшъэ­рылъхэр зыгъэцэкIэрэ Сергей Стельмах къызэриIуагъэмкIэ, Советскэ Союзым и ЛIыхъужъхэм, Щытхъум иорден ика­валер­хэм ясурэтхэр аIыгъхэу юн­армейцэ 58-рэ урамым къы­рыкIо­щтых, ахэм ауж итыщтых ТекIо­ныгъэм и Быракъ зыIыгъ курсант-летчикхэр. Адыгеим щыпсэурэ нэбгырэ мин пчъагъэ мыщ хэлэжьэнэу агъэ­нафэ.

МэфэкIым фэгъэхьыгъэ демонстрациехэм, культурнэ Iоф­тхьабзэхэм язэхэщэнкIэ гухэлъэу щыIэхэм кIэкIэу къащыуцу­гъэх Мыекъопэ дзэ гарнизоным ипащэ игуадзэу Николай Деменок, АР-м культурэмкIэ иминистрэ игуадзэу Ольга Гавшинар.

Джащ фэдэу Iофтхьабзэм къекIолIэщтхэм япсауныгъэ къэу­хъумэгъэн, коронавирусым пэшIуекIогъэнымкIэ шапхъэу щыIэхэр гъэцэкIэгъэнхэ, тина­хьыжъхэм тафэсакъын зэрэфаер, ахэр вакцинацие ашIынхэр пшъэрылъ шъхьаIэу зэрэщытыр КъумпIыл Мурат къыхигъэщыгъ.

— ТекIоныгъэм и Мафэ зэ­рэдунаеу зэрепхы, анахь мэхьэнэ ин зиIэ мэфэкIхэм ар ащыщ. Арышъ, мыщ фэгъэхьыгъэ Iофтхьабзэхэр зэрифэшъуа­шэу, цIыфхэм агу къинэжьыхэу зэхэщэгъэнхэ фае. Ветеранхэр сыдигъокIи тинэплъэгъу икIыхэ хъущтэп, ахэм ящыкIэгъэ IэпыIэгъур ягъэгъотыгъэн фае, къыткIэхъухьэрэ лIэужхэм тарихъыр ягъэшIэгъэным, я Хэгъэгу шIу алъэгъоу пIугъэнхэм мэхьэнэ ин иI, — кIэухым къы­Iуагъ АР-м и ЛIышъхьэ.

ДЕЛЭКЪО Анет.