АР-м и Къэралыгъо Совет — Хасэм и Тхьаматэу, Урысые поли­тическэ партиеу «Единэ Россием» ифракциеу ащ хэтым ипащэу Владимир Нарожнэмрэ игуадзэу, партием ишъолъыр общественнэ приемнэ ипащэу, проектэу «Российское село в Республике Адыгея» зыфиIорэм икоординаторэу Шъэо Аскэррэ бэрэскэжъые мафэм Теуцожь районым, Адыгэкъалэ ыкIи поселкэу Инэм ащыIагъэх.

Дачэ товариществэхэм ахэт­хэм яIофхэм апае мы тхьамафэм «Единэ Россием» ифрак­циеу АР-м и Парламент хэтым идепутатхэм цIыфхэр рагъэ­блэгъагъэх. УФ-м ФедерациемкIэ и Совет исенаторхэри, Къэ­ралыгъо Думэм идепутатхэри ахэм ахэлэжьагъэх.

КоронавирусыкIэм зызэриу­шъомбгъурэр нахь макIэ зэрэ­хъугъэм фэшI зэIукIэгъухэр пэ­Iудзыгъэу щымытэу, очнэ шIыкIэм тетэу зэхащэгъагъэх. Ары республикэ Парламентым ипащэхэр мы муниципалитетхэм ащыIэнхэм ушъхьагъу шъхьа­Iэ фэхъугъэр. ЗэIукIэгъу­хэм Адыгэкъалэ иадминистрацие ипащэу ЛIыхэсэ Махьмудэ, Теуцожь район администрацием ипащэу Хьачмамыкъо Азэмат, поселкэу Инэм ипащэу Хъоткъо Хъызыр, Парламентым идепутатхэу Хьабэхъу Юрэ, Джанхъот Аслъан ыкIи Хъурэе Адамэ ахэлэжьагъэх.

Теуцожь районым апэ къыщырагъэжьагъ. Мыщ иобщест­веннэ приемнэ нэбгырих пстэ­умкIи къекIолIагъ. Ахэм Iофыгъоу къырахьылIагъэхэр автомобиль ыкIи лъэсрыкIо гъогу­хэм язытет, кIэлэцIыкIухэмрэ зихэ­хъогъухэмрэ апае спорт псэуа­лъэхэмкIэ щыкIагъэу щыIэхэр, урамхэм якъэгъэнэфын, псэу­пIэ-коммунальнэ фэIо-фашIэхэм апкIэ итын, нэмыкIхэм афэ­гъэхьыгъагъэх.

ЗэкIэми ягумэкIыгъохэм ядэ­Iугъэх, атхыгъэх. Мы мэфэ дэ­дэм депутатхэм агъэцэкIа­гъэхэри къахэкIыгъэх. ГущыIэм пае, республикэ Парламентым идепутатэу Хъурэе Адамэ къуа­джэу ПчыхьалIыкъуае испорт площадкэ къэнэфынэу афишIыгъ, къуаджэу Пэнэжьыкъуае щыщэу псэупIэ-коммунальнэ фэIо-фашIэхэм апкIэ ымыты­шъузэ чIыфэ къызтефагъэм ар фипщыныгъ.

Къуаджэу Очэпщые илIыкIо­хэр къэхалъэу ащ дэтым екIурэ гъогум изытет ыгъэгумэкIыхэу закъыфагъэзагъ. Ар дэй дэдэ хъугъэ, гъэцэкIэжьынхэр ищыкIагъэх, адеIэнхэу къыкIэлъэIух. Къэралыгъо Советым — Хасэм идепутатэу Хьабэхъу Юрэ ар ыпшъэ рилъхьажьыгъ.

Нэужым Адыгэкъалэ щыкIогъэ зэIукIэгъум къекIолIагъэхэм янахьыбэр сад е дачэ товариществэхэм ащыпсэухэрэм ащыщых. Электричествэм ыуасэ игъэнэфэн, электроэнергием икъэтынкIэ фэIо-фашIэхэр афэзыгъэцэкIэщт компанием икъы­хэхын, гъогухэм язытет, общественнэ транспорт зэря­мыкIуа­лIэрэм афэгъэхьыгъ ахэм Iофыгъоу зигугъу къа­шIыгъэхэр.

Адыгэкъалэ щыпсэурэ фермерхэм ащыщэу къекIолIагъэр былымхъупIэ зэримыIэр ары зыгъэгумэкIырэр. Краснодар псыIыгъыпIэм дэжькIэ гъэтхэ-­гъэмэфэ уахътэхэм былымхэр щигъэхъунхэу е мэкъу щиупкIэ­нэу фитыныгъэ къыратынымкIэ къыдеIэнхэу къыкIэлъэIугъ. ПсыIыгъыпIэм ипащэхэм за­фагъэзэнэу ар агъэгугъагъ. Нэ­­мыкI Iофыгъоу къырахьы­лIагъэхэми ахэплъэнхэшъ, ахэм япхыгъэ къулыкъухэм япащэхэм зафагъэзэщтэу ары къызэра­Iуагъэр.

— Мы тхьамафэм цIыфхэр зыфедгъэблагъэхэрэ лъэныкъор игъоу сэлъытэ, сыда пIомэ, республикэм щыпсэухэрэм ащыщыбэр сад е дачэ товариществэхэм япхыгъэх, — къыIуагъ Владимир Нарожнэм. — Мафэ къэс пIоми хъунэу общественнэ Iоф е цIыф гъэнэфагъэ горэм иIофыгъо зэшIотхын фаеу мэхъу. ТызэдеIэжьзэ анахь Iофыгъошхори дэдгъэзыжьын зэрэтлъэкIырэр дэгъу. Къыхэзгъэщымэ сшIоигъу, цIы­фэу охътабэ темышIэзэ зиIоф зэхэфыгъэн фаер мыщ фэдэ егъэблэгъэнхэм яжэн ищыкIагъэп, сыдигъоми ежьыркIэ зыщыхъущтым депутатхэм закъыфигъазэмэ, IэпыIэгъу ыгъотыщт.

Адыгэкъалэ ыуж Парла­ментым ипащэхэм поселкэу Инэм цIыфхэр щырагъэблэгъагъэх. Ащ видеоконференцие шIыкIэм тетэу къыхэлэжьагъ ООО-у «Газпром межрегионгаз Майкоп» зыфиIорэм ипащэу Игорь Сырчиныр. Сыда пIомэ, мыщ къекIолIагъэхэр зэкIэри зыгъэгумэкIыщтыгъэхэр гъэ­стыныпхъэ шхъуантIэм епхыгъэ Iофыгъохэр ары.

Фэтэрыбэу зэхэт унэхэм яфэIо-фашIэхэр зыгъэцэкIэхэрэ ГъэIорышIэкIо компаниехэм япащэх нахьыбэу къекIолIагъэр. Гъэстыныпхъэ шхъуан­тIэу агъэфедэрэм ыпкIэ цIыфхэм дэеу къызэратырэм къы­хэкIыкIэ чIыфэшхохэр зытелъхэр ахэм ахэтых. Джащ фэдэу унэхэм фабэр къязытырэ хьакухэм яфэIо-фашIэхэм ягъэцэ­кIэнкIэ гъэIорышIэкIо компа­ние­хэмрэ «Межрегионгазымрэ» зэзэгъыныгъэу зэдашIыхэрэм къадыхэлъытагъэхэм, аварийнэ къулыкъухэм яIофшIэн алъэныкъокIэ упчIэхэр яIэх.

Инэм иурамэу Перовым ыцIэ зыхьырэм тет унэ 11-мэ гъэстыныпхъэ шхъуантIэр ямыщэлIагъэу илъэс пчъагъэ хъугъэшъ ыуж итых. Ащ ушъхьагъу фэ­хъурэмрэ хэпшIыхьан плъэкIыщтымрэ атегущыIагъэх. Игорь Сырчиным зэпстэур къызэрэгурыIорэр къыхигъэщыгъ, гъэстыныпхъэр зимыIэхэм яIоф­хэмкIи, нэмыкIэу къаIэтыгъэхэмкIи амалэу щыIэмкIэ IэпыIэгъу къафэхъущтэу къариIуагъ. Джы псэупIэ коим ыкIи ГъэIорышIэкIо компаниехэм, гъэсты­ныпхъэ шхъуантIэр зищыкIэгъэ унагъо­хэм тхылъхэр агъэ­хьазырын­хэшъ, «Межрегионгазым» испециалистхэм аIэкIа­гъэхьанхэ фае.

— СНТ-м ялIыкIохэм мызэу, мытIоу зэIукIэгъухэр адэтшIыгъэх, — къыIуагъ Парламентым и Тхьаматэ игуадзэу Шъэо Аскэр пстэумэ ауж гущыIэгъу тызыфэхъум. — Дачэ товариществэхэм ягъэIорышIэн, электроэнергиер икъоу аIэкIэгъэ­хьэгъэным, чIыгу Iахьэу ахэм къащаратыгъэхэм ягъэфедэн, нэмыкI Iофэу яIэхэм афэгъэзэгъэнхэу IофышIэ купхэр пчъагъэрэ зэхэтщагъэх. ГухэкIыми, къэралыгъо ыкIи муниципальнэ хэбзэ органхэм анаIэ зытыра­дзэн фэе Iофыгъуабэ мыхэм яI. Товариществэхэм ялIыкIоу непэ тызыIукIагъэхэми, нэмыкIэу зыкъытфэзыгъэзагъэхэми яIоф­хэм зырызэу тахэплъэщт, татегущыIэщт, етIанэ ахэм афэгъэзэгъэ къулыкъухэм, ведомст­вэхэм алъыдгъэIэсыщтых, дэ­гъэзыжьыгъэ зэрэхъухэрэми тылъыплъэщт.

Шъугу къэдгъэкIыжьын, икIыгъэ 2020-рэ илъэсым партиеу «Единэ Россием» идепутат пстэумэ гъогогъу 2000 фэдизрэ цIыфхэр рагъэблэгъагъэх.

Мы мафэм Владимир Нарожнэмрэ Шъэо Аскэррэ цIыфхэр зэрэрагъэблэгъагъэхэм имызакъоу, медицинэм иIофышIэ­хэми аIукIагъэх. Теуцожь район сымэджэщымрэ Адыгэкъалэ исымэджэщэу К.М. Батмэным ыцIэ зыхьырэмрэ яIофышIэхэу коронавирусым пэшIуекIорэ Iофтхьабзэхэм ахэлэжьагъэхэм ащыщхэр АР-м и Къэралыгъо Совет — Хасэм ирэзэныгъэ тхылъхэмкIэ къыхагъэщыгъэхэу, ахэр Парламентым и Тхьаматэ аритыжьыгъэх.

ХЪУТ Нэфсэт.