Волонтерхэр IэпыIэгъу афэхъущтых
АгъэцэкIэжьыщт ыкIи зэтырагъэпсыхьащт общественнэ щагухэм якъыхэхын епхыгъэ мэкъэтыным игъэхьазырын Адыгеим щылъагъэкIуатэ.
Нэбгырэ мин 20-м ехъу зыщыпсэурэ муниципалитетищмэ ар ащыкIощт — къалэу Мыекъуапэ, поселкэхэу Яблоновскэмрэ Инэмрэ.
Республикэм икъэлэ шъхьаIэ иволонтер 70-м ехъурэр мэкъэтыным изэхэщэнкIэ IэпыIэгъу къафэхъущтых. Зэтырагъэпсыхьащт псэуалъэхэр къыхахынымкIэ мэкъэтыным ипроект IэпыIэгъу фэхъущт волонтерхэм платформэу Dobro.ru зыщатхыгъ.
Волонтерхэм япшъэрылъ шъхьаIэр зытегущыIэщтхэ проектхэм цIыфхэр ащыгъэгъозэгъэнхэр ары. Джащ фэдэу, онлайн-платформэу «za.gorodsreda.ru» зыфиIорэм цIыфхэм зыщатхынымкIэ волонтерхэр IэпыIэгъу афэхъущтых.
Шъугу къэдгъэкIыжьын, 2022-рэ илъэсым зэтырагъэпсыхьащт щагухэм якъыхэхын лъэпкъ проектэу «ПсэупIэр ыкIи къэлэ щыIакIэр» зыфиIорэм хэхьэрэ проектэу «Iэрыфэгъу къэлэ псэукIэр гъэпсыгъэным» къыдыхэлъытагъ. Мэлылъфэгъум и 26-м къыщегъэжьагъэу жъоныгъуакIэм и 30-м нэс зэтырагъэпсыхьащт щагухэр Мыекъуапэ щыпсэухэрэм ежь-ежьырэу къыхахынхэ алъэкIыщт.
Мыекъопэ къэлэ администрацием ипресс-къулыкъу къызэритыгъэмкIэ, зыхэдэщтхэ общественнэ чIыпIи 6 агъэнэфагъ. Анахьыбэу амакъэ зыфатырэ чIыпIэр апэу зэтырагъэпсыхьащт.
Iэшъынэ Сусан.