Къыблэ шъолъырым самбэмкIэ изэнэкъокъу Новороссийскэ щыкIуагъ.

Илъэс 14 — 16 зыныбжь кIалэхэр, пшъа­шъэхэр алырэгъум щыбэнагъэх. Адыгэ Рес­публикэм щыщхэм медалий зэIукIэгъухэм къащахьыгъ.

Тыгъужъ Тимур, кг 46-рэ, ЛIыхъурэе Мурат, кг 49-рэ, Мамхъо Астемир, кг 88-рэ, дышъэ медальхэр къыдахыгъэх. Тренерхэу А. Хьабэхъум, А. Гъомлэшкым апэрэ чIыпIэхэр къэзыхьыгъэхэр агъасэх.

Кушъу Тамерлан, кг 46-рэ, Хьакъуй Эльдар, кг 49-рэ, Хьадпэшъо Дамир, кг 53-рэ, СтIашъу Эльдар, кг 58-рэ, ятIонэрэ чIыпIэхэр къахьыгъэх. КIалэхэм япащэх тренерхэу Б. Шъэумэныр, А. Гъомлэшкыр, И. Нэгъоир, Р. Джарымэкъор, А. Чэтыжъыр.

Пшъашъэхэм язэнэкъокъу Едыдж Разыет, кг 80-м къехъу, джэрзыр къыщыдихыгъ, тренерыр Б. Нэныжъ.

А 1 — 3-рэ чIыпIэхэр къыдэзыхыгъэхэр Къыблэм самбэмкIэ ихэшыпыкIыгъэ командэ хэхьагъэх. Урысыем икIэух зэнэкъокъоу мэлылъфэгъум и 21 — 26-м Новороссийскэ щызэхащэщтым хэлэжьэщтых.

Къыблэм изэIукIэгъухэм дышъэр къащызыхьыгъэхэр Дунэе зэIукIэгъоу «ТекIоныгъ» зыфиIоу жъоныгъуакIэм и 9 — 12-м Санкт-Петербург щыкIощтым щыбэнэщтых.

— Новороссийскэ щыкIогъэ зэIукIэгъухэм нэбгырэ 400 фэдиз ащызэнэкъокъугъ, — къы­тиIуагъ Адыгэ Республикэм самбэмкIэ испорт еджапIэ ипащэу, спортымкIэ дунэе класс зиIэ мастерэу Делэкъо Адамэ. — ТибэнакIохэм яIэпэIэсэныгъэ зэрэхагъахъорэм тегъэгушIо. Зы купым хэтхэу дышъэм икъыдэхын щызэIукIэхэу, зым дышъэр, ятIо­нэрэм тыжьыныр афагъэшъуашэу къыхэкIы. Къуаджэхэм Iоф ащызышIэрэ тренерхэм зэпхыныгъэу адытиIэр тэгъэпытэ, сэнаущыгъэ зыхэлъ ныбжьыкIэхэр къахэтэгъэщых, хэушъхьафыкIыгъэу зэнэкъокъухэм афэтэ­гъэхьазырых.