Урысыем ишъолъырхэм щыIакIэу арылъым изэгъэшIэн фытегъэпсы­хьэгъэ рейтингым изэфэхьысыжьхэм къызэрагъэлъэгъуагъэмкIэ, 2020-рэ илъэсым Адыгеим икъэгъэлъэгъонхэр нахьышIу ышIынхэ ылъэкIыгъ.

ЫпэкIэ я 27-рэ чIыпIэр ыIыгъыгъэмэ, джы я 24-м щыт (2018-рэ илъэсым я 31-рэ чIыпIэм щытыгъ). Мы аужырэ илъэсищым къыкIоцI рейтингым щиубытырэр чIыпIи 7-кIэ на­хьышIу ышIыгъ. Ащ фэдэ къэбар къытыгъ АР-м экономикэ хэхъоныгъэмкIэ ыкIи сатыумкIэ и Министерствэ.

Ведомствэм къызэритырэмкIэ, рейтингыр зэхагъэуцо зыхъукIэ къэгъэлъэгъон 70-рэ аштэ, ахэр куп 11-у зэпхыгъэх. Мыщ дэжьым къалъытэх цIыфхэм яхахъо зыфэдизыр, IофшIэпIэ чIыпIэу ыкIи псэупIэ амалэу яIэхэр, демографием, экологием ыкIи ты­къэзыуцухьэрэ дунаим алъэныкъокIэ Iофхэм язытет, социальнэ инфраструктурэм ипсэуа­лъэхэр агъэфедэнымкIэ цIыфхэм амалэу аIэкIэлъхэр, эко­но­микэм, бизнес цIыкIум, транспорт инфраструктурэм яхэхъоныгъэхэр.

Шъолъырхэм чIыпIэу аубытырэм игъэнэфэн баллхэмкIэ къалъытэ. 2020-рэ илъэсым Адыгеим икъэгъэлъэгъонхэр пункт 1,2-кIэ дэкIоягъ ыкIи балл 51,3-м нэсыгъ (2019-м — 50,1-рэ; 2018-м — 48-рэ; 2017-м — 48,4-рэ хъущтыгъэх). Мыщ фэдэ зэфэхьысыжьым ишIуа­гъэкIэ республикэр чIыпIи 3-кIэ дэкIоягъ. Республикэм икъэгъэлъэ­гъон­хэр нахьышIу зыщишIыгъэ лъэныкъохэр:

— бизнес цIыкIум ыкIи унэе предпринимательствэм хэща­гъэхэм япчъагъэкIэ, я 66-рэ чIы­пIэм щытыгъэмэ, джы я 56-м къэкIуагъ;

— коммунальнэ сетеу зэ­блахъун фаехэмкIэ, я 68-рэ чIыпIэр ыубытыщтыгъэмэ, джы я 53-рэ чIыпIэм щыт;

— нэбгырэ мини 10-м те­лъытагъэу бзэджэшIагъэу зэрахьагъэхэм япчъагъэкIэ я 5-рэ чIыпIэм къыдэкIоягъ;

— сабый къэхъугъакIэу зидунай зыхъожьыгъэхэмкIэ я 51-рэ чIыпIэм щытыгъэмэ, джы я 5-м къэкIуагъ;

— физическэ культурэм ыкIи спортым пыщагъэхэм япчъа­гъэкIэ я 25-рэ чIыпIэр ыубытыщтыгъэмэ, джы я 12-р ыIыгъ.

Министерствэм къызэрэща­IуагъэмкIэ, шъолъырым щы­псэурэ цIыфхэм ящыIэкIэ-псэу­кIэ нахьышIу шIыгъэныр ары республикэм игъэцэкIэкIо хэбзэ къулыкъухэм пшъэрылъ шъхьаIэу зыфагъэуцужьырэр.