Псэйтыку щырагъэжьагъ
Шъолъыр проектэу «Культурная среда» зыфиIорэм къыдыхэлъытагъэу, Тэхъутэмыкъое районым икъуаджэу Псэйтыку культурэм и Унэ щагъэпсынэу рагъэжьагъ.
— Культурэм и Унэ агъэпсыным пае сомэ миллион 40-м ехъу къатIупщыщт, ащ щыщэу федеральнэ бюджетым сомэ миллион 29,4-рэ, шъолъыр бюджетым — сомэ миллион 0,3-рэ, муниципалитетым — сомэ миллиони 10,7-рэ къарыкIыщт. Псэуалъэр зышIырэр «МОНОЛИТСТАЛЬ-СТРОЙ» зыфиIорэр ары, — къыIуагъ Адыгэ Республикэм культурэмкIэ иминистрэу Аулъэ Юрэ.
Илъэс 85-кIэ узэкIэIэбэжьымэ ашIыгъэ Псэйтыку дэт культурэм иучреждение ублэпIэ еджапIэу ашIыгъагъ. 1974-рэ илъэсым еджэпIакIэ зашIым, псэолъэшIыгъэр культурэм и Унэ къыратыжьыгъагъ. 2004-рэ илъэсым жъы зэрэхъугъэм къыхэкIыкIэ унэр Iуахыжьыгъ. А уахътэм къыщегъэжьагъэу культурэм и Унэ гурыт еджапIэу N 8-м дыхэтэу Iоф ешIэ, квадратнэ метри 157-рэ хъурэ чIыпIэ бэджэндэу ыIыгъ.
— Культурэм и Унэ дыхэтых орэдкъэIоным, театрэм, джэгукIэ зэфэшъхьафхэм якружокхэр, ахэм пстэумкIи нэбгырэ 69-рэ къякIуалIэ, — къыIуагъ Тэхъутэмыкъое гупчэ клубнэ системэм ипащэу А. Къадэм.
Мы уахътэ псэолъэшI организацием унэ лъакъор ыгъэчъыгъ. 2021-рэ илъэсым шэкIогъум и 30-м ехъулIэу объектыр атынэу агъэнафэ. Iэшъынэ Сусан.