СервисымкIэ ыкIи зекIонымкIэ зэхащэгъэ Урысые олимпиадэм изэфэхьысыжьхэр мы мафэхэм къэнэфагъэх.

Апшъэрэ ыкIи гурыт сэнэ­хьат зыщарагъэгъотырэ еджапIэхэм ащеджэхэрэ студентхэр ыкIи я 7 — 11-рэ классхэм арыс кIэлэеджакIохэр ары мыщ хэлэжьагъэхэр. Мэ­заем и 9-м къыщегъэжьагъэу гъэтхапэм и 31-м нэс ар кIуагъэ.

Урысые Федерацием ишъо­лъыр 58-мэ ыкIи къэралыгъо 13-мэ яныбжьыкIэхэр Iофтхьабзэм хэлэжьагъэх. Олимпиа­дэр Казань дэт лъэпкъ ушэтын технологиехэмкIэ университетым щызэхащагъ.

Я IV-рэ Урысые олимпиа­дэм студент ыкIи кIэлэеджэкIо 6300-рэ хэлэжьагъ, Адыге­им щыщ нэбгыри 126-мэ зы­щаушэтыгъ. Адыгэ къэралыгъо университетым ыцIэкIэ экспертнэ советым хэхьагъэр ыкIи Iофтхьабзэм изэхэщэн зиIахьышIу хэлъыр социальнэ IофшIэнымкIэ ыкIи зекIонымкIэ кафедрэм идоцентэу Ожъ Светлан.

ИлъэсиплI хъугъэу мы олимпиадэр Урысыем щызэхащэ. Мы лъэныкъомкIэ ныбжьыкIэхэм шIэныгъэу яIэхэр къызэрагъэлъагъорэм дакIоу, ежь яшIошI къыраIотыкIын амал яI. ТекIоныгъэ, хагъэу­нэфыкIырэ чIыпIэ къыдэзы­хыгъэхэм ыкIи олимпиадэм хэлэжьагъэхэм дипломхэр, сертификатхэр къафагъэшъошагъэх. Джащ фэдэу ныб­жьыкIэхэр къызэрыкIыгъэ еджапIэхэм япащэхэм зэра­фэразэр къэзыушыхьатырэ тхылъхэр къаратыжьыгъэх.

ДЕЛЭКЪО Анет.