Хабзэ зэрэхъугъэу, гурыт еджапIэр къэзыухырэ кIэлэеджакIохэм зыкI къэралыгъо ушэтынхэр рамыгъажьэзэ ны-тыхэм апае Iофтхьабзэ зэ­хащэ. Ясабыйхэр зыпхырыкIырэ ушэтыпIэхэр нэрылъэгъу афэхъух, уасэ афашIы, ежьхэми яшIэныгъэхэр ауплъэкIух.

МыекъуапэкIэ Iофтхьабзэм нэбгырэ 30 къекIолIагъ. Зызыу­шэтыгъэхэм ахэтыгъэх АР-м гъэсэныгъэмрэ шIэныгъэмрэкIэ иминистрэ игуадзэу Евгений Лебедевыр, кIэлэцIыкIум ифитыныгъэхэмкIэ Уполномоченнэу Адыгэ Республикэм щыIэ Александр Ивашиныр, Мыекъопэ къэлэ администрацием гъэсэныгъэмкIэ и Комитет ипащэ игуадзэу Яна Стриха, гъэсэ­ныгъэмкIэ Къэралыгъо аттес-та­ционнэ къулыкъум ипащэу Ар­тем Журавель ыкIи журналистхэр.

ЗэращашIы хабзэу, чIэхьэ­гъум дэжь телефонхэри, Iалъмэкъхэри аIахыгъэх. Ушэтыным шапхъэу пылъхэр къафаIотагъэх, бланкхэр къафагощыхи IофшIэным ыуж ихьагъэх.

— Ясабыйхэм ушэтыныр зэ­ратырэ шIыкIэр ны-тыхэм яд­гъэлъэгъуныр, щынагъо зи зэ­рэщымыIэр, шъыпкъагъэ хэлъэу, шапхъэхэм адиштэу зэрэзэхат­щэрэр къагурыдгъэIоныр ары пшъэрылъ шъхьаIэу тиIэр, — къыIуагъ Евгений Лебедевым.

Мы илъэсым гурыт еджапIэр къэзыухырэ кIэлэеджакIохэм зыкI къэралыгъо ушэтынхэр жъоныгъуакIэм и 31-м къыщегъэжьагъэу бэдзэогъум и 2-м нэс атыщтых. ЫпэрапшIэу географиемкIэ, литературэмкIэ ыкIи химиемкIэ заушэтыщт. ШIокI зимыIэ урысыбзэр мэкъуогъум и 3-м ыкIи и 4-м, хьисапыр мэкъуогъум и 7-м атыщтых.

КъэIогъэн фае мы илъэсым зыкI къэралыгъо ушэтынхэм ятын нахь псынкIэ зэрашIыгъэр. ГущыIэм пае, я 9-рэ классыр къэзыухыхэрэм ыпэкIэ пред­метиплIыкIэ заушэтыщтыгъэмэ, джы урысыбзэмрэ хьисапымрэ атынэу щытыр. Джащ фэдэу, я 11-рэ классыр къэзыухыхэу апшъэрэ еджапIэм чIэхьан гухэлъ зимыIэхэм урысыбзэмрэ хьисапымрэ ныIэп атыщтыр. Апшъэрэ еджапIэм чIэхьащтхэр ары нэмыкI предметхэмкIэ зызыушэтыщтхэр.

ДЕЛЭКЪО Анет.