Чъэпыогъум и 10-м «Тотальнэ диктант» зы­фиIорэ Iофтхьабзэр зэхащэщт. Урысыбзэр зикIасэхэу, яшIэныгъэхэр зыушэты зышIои­гъохэм онлайн шIыкIэм тетэу диктант атхын алъэкIыщт.

Мы илъэсым тхэкIо цIэрыIоу ыкIи журналистэу Дмитрий Глуховскэм ытхыгъэ текстыр ары къызэджэнхэу агъэнэфа­гъэр. Ар узыщыфэе сыхьатым птхын плъэкIыщт, гущыIэм пае, Владивосток пчэдыжьым сы­хьатыр 8-м, Новосибирскэ сы­хьатыр 10-м, Нью-Йорк пчы-хьэм сыхьатыр 11-м диктантым къыщяджэщтых.

«Тотальнэ диктантыр» мы илъэсым зыщызэхащэщт къэлэ шъхьаIэу агъэнэфагъэр Якутск ары. Авторэу Дмитрий Глуховскэр ащ екIолIэщт ыкIи сы­хьатыр 14.00-м ащ къеджэнэу ригъэжьэщт.

— Диктантыр зыщатхыщт чIы­пIэм икъыхэхын Мыекъуапи хэлэжьагъ. Адыгеим щы­псэухэрэм ямызакъоу, Крас­нодар ыкIи Ставрополь крайхэм, Ростов хэкум, Темыр Кавказым исубъектхэм ащыщ­хэми амакъэ къызэрэтфатыгъэр тигуапэ хъугъэ. Мы илъэсым диктантыр зыщатхыщт къэлэ шъхьаIэ тымыхъугъэми, ащ тигуапэу тыхэлэ­жьэщт. Онлайн-марафоныр гъэ­шIэгъонэу зэхэтщэщт, ар бла­мыгъэкIынэу цIыфхэм ты­къяджэ, — къы­Iуагъ АдыгеимкIэ Iофтхьабзэр зэхэзыщэу, лингвист-экспертэу Нэ­шъу­лъэщэ Индирэ.

БлэкIыгъэ илъэсхэм афэдэу, текстыр IэкIэ атхын алъэкIыщт, ар Iофтхьабзэм изэхэщакIохэм нэужым къарахьылIэжьын фае. IофшIэнхэм якIэуххэр сайтэу «totaldict.ru» зыфиIорэм къы­рагъэхьажьыщтых. Диктантым зы­фэзгъэхьазырхэрэм апае хэу­­шъхьэфыкIыгъэ аудиокурс- хэр зэхащагъэх.

Илъэс 17 хъугъэу «Тотальнэ диктантым» фэгъэхьыгъэ Iоф­тхьабзэр Урысыем щызэхащэ. Адыгеим ар мы илъэсым я 8-у щыкIощт. ШIоигъоныгъэ зиIэ пстэури хэлэжьэн амал яI. Гъэ­рекIо пандемием ыпкъ къи­кIыкIэ диктантыр унэм щатхыгъагъ. Мы илъэсым нэбгырэ мин 300-м ехъумэ яшIэныгъэхэр ауплъэкIунэу агъэнафэ.

ДЕЛЭКЪО Анет.