АР-м и ЛIышъхьэу КъумпIыл Мурат тыгъуасэ Тэхъутэмыкъое районым ит поселкэу Инэм щыIагъ.

Апэ ащ культурэм, спортым зыщапылъхэ зыгъэпсэфыпIэ Гупчэу поселкэм щагъэкIэжьыгъэр зэригъэлъэгъугъ. Респуб­ликэм социальнэ ыкIи экономикэ хэхъоныгъэхэр егъэшIыгъэнхэм фытегъэпсыхьэгъэ унэе программэм къыдыхэлъытагъэу агъэцэкIэжьыгъэ социальнэ псэуалъэхэм ар ащыщ. ПстэумкIи сомэ миллион 54,3-м ехъу пэIухьагъ.

ЗыгъэпсэфыпIэ Гупчэр зычIэт унэр 1980-рэ илъэсыр ары зашIыгъэр, жъы хъугъэу, гъэцэкIэжьынхэр зищыкIэгъагъэр бэшIагъэ. Программэм ишIуагъэкIэ ащ иунашъхьэ, ипчъэхэр, шъхьаныгъупчъэхэр, псым, электричествэм, фабэм якIуапIэхэр щызэблахъугъэх, ыкIоцIи ыкIыби дэпкъхэр агъэкIэ­жьыгъэх, интернет ращэлIагъ, машIом зыкъыштэмэ макъэ зы­гъэIущтыр щагъэпсыгъ, сэ­къатныгъэ зиIэхэм ящыкIагъэ­хэри къыдалъытагъэх.

Джы ащ клуб зэфэшъхьафэу 32-рэ щагъэпсыгъ, ахэм нэ-бгырэ 700 ахэт. Джащ фэдэу экспозиции 4 захахьэрэ ыкIи экспонат 5000 зычIэлъ музей хэт, тхылъеджапIэу агъэкIэжьыгъэм ифонд тхылъ 14589-рэ чIэлъ. Концертхэр къызщатырэ залхэм лъэхъаным къыздихьыгъэу ящыкIэгъэ пстэур ачIагъэуцуагъ. Ахэм анэмыкIэуи, Гупчэм 2020-рэ илъэсым зэ­нэкъокъум текIоныгъэр къыщыдихи, кином и Фонд сомэ мил­лиони 5 къыфитIупщыгъ, ащкIэ кинозал агъэпсыгъ.

АР-м и ЛIышъхьэ киноза­лыкIэр зэригъэлъэгъугъ, «3D» зы­фаIорэ нэгъунджэхэр ыуплъэ­кIугъэх, клуб ыкIи студие зэфэшъхьафэу Iоф щызышIэхэрэм ачIэхьагъ, ахэм защызыгъасэхэрэм гущыIэгъу афэхъугъ.

КъумпIыл Мурат мыщ фэдэу культурэм зыщапылъхэ зыгъэ­псэфыпIэ учреждениехэм язегъэушъомбгъун лъэшэу Iоф зэ­рэдашIэрэм къыкIигъэтхъыгъ. Республикэм ипащэ зэрилъы­тэрэмкIэ, ахэр цIыфхэм агу рихьэу гъэпсыгъэнхэ, лIэуж пстэури зэзыпхырэ гупчэхэу хъунхэ фае.

Мы поселкэм чIыпIэ 240-рэ зиIэ кIэлэцIыкIу IыгъыпIакIэ щашIи, 2019-рэ илъэсым итыгъэ­гъэзэ мазэ къыщызэIуахыгъ. Ары нэужым АР-м и ЛIышъхьэ зыдэщыIагъэр. «Нэфсэт» зыцIэ IыгъыпIэр лъэпкъ проектэу «Демографием» къыдыхэ­лъы­тагъэу ашIыгъэхэм ащыщ, пстэумкIи сомэ миллио­ни 170-рэ пэIухьагъ. Ащ ишIуа­гъэкIэ поселкэм кIэлэцIыкIу IыгъыпIэхэмкIэ гумэкIыгъоу иIагъэр дэгъэзыжьыгъэ хъугъэ, чэзыу яIэжьэп.

КъумпIыл Мурат IыгъыпIэр зэрэгъэпсыгъэр зэригъэлъэ­гъугъ, ипащэ, иIофышIэхэм гущыIэгъу афэхъугъ. Адыгабзэм, адыгэ культурэм, шэн-хабзэхэм язэгъэшIэн лъэшэу ащ щыпы­лъых. Ныдэлъфыбзэр ащызэ­рагъашIэу купитIу агъэпсыгъ. Ахэм адыгэ унагъохэм къарыкIыгъэхэм ямызакъоу, нэмыкI лъэпкъхэм къахэкIыгъэ кIэлэцIыкIухэри арысых.

— УФ-м и Президентэу Владимир Путиным кIэлэцIыкIу Iы­гъыпIэхэмкIэ чэзыу щымы­Iэжьынэу пшъэрылъ къытфи­шIыгъ, — къыIуагъ КъумпIыл Мурат. — Аужырэ илъэситIум IыгъыпIибгъу кIэу республикэм щытшIыгъ, Iоф зышIэрэ уч­реждениищмэ зядгъэушъом­бгъуным пае, унакIэхэр апытшIыхьажьыгъэх. Мы илъэсым федеральнэ бюджетым къыхэ­хыгъэ ахъщэкIэ чIыпIэ 480-рэ къатэу кIэлэцIыкIу IыгъыпIиплI Красногвардейскэ ыкIи Шэуджэн районхэм ащытшIыщтых. А зэпстэумэ кIэлэцIыкIухэр еджапIэм чIэмыхьэхэзэ гъэ­сэныгъэ ягъэгъотыгъэнымкIэ амалхэр нахьышIу къашIыщт, IыгъыпIэхэр нахь къызIэкIэгъэ­хьэгъошIу хъущтых.

ХЪУТ Нэфсэт.