Ахъщэ тедзэ къафыхагъэкIыгъ
Пандемием илъэхъан медицинэ организациехэм гъэлъэшыгъэ шIыкIэм тетэу Iоф зэрашIэрэм епхыгъэу бюджет мылъкоу шъолъырхэм атырагощэщтыр зыфэдизыр Урысые Федерацием и Правительствэ ыухэсыгъ.
ШIокI зимыIэ медицинэ страхованиемкIэ чIыпIэ программэхэм япхырыщын къыдыхэлъытагъэу пшъэрылъэу яIэхэр агъэцэкIэнхэм пай мыщ фэдэ мылъкур къызыкIыхагъэкIыгъэр. А гухэлъхэм апае Адыгеим сомэ миллион 98,7-рэ къыфатIупщыгъ. Ащ фэдэ унашъор УФ-м и Правительствэ зиштагъэр бюджет мылъкур атегощэгъэнымкIэ парламент комиссием ащ къызыдырегъэштэ нэуж ары. Мылъкур УФ-м и Правительствэ иIэпэчIэгъэнэ фонд къыхагъэкIыщт.
«Коронавирусыр къяутэлIэнымкIэ цIыфхэм щынагъоу ашъхьарытыгъэр мы аужырэ мазэхэм хэпшIыкIэу къедгъэIыхын тлъэкIыгъ. Псауныгъэм икъэухъумэн фэгъэзэгъэ учреждениехэр ыпэкIэ Iоф зэрашIэщтыгъэ шапхъэхэм тIэкIу-тIэкIузэ атехьажьых. Ау ахэм бэ джыри апшъэ дафэрэр, гъэлъэшыгъэ шIыкIэм тетэу непи Iоф ашIэ. УФ-м и Президентрэ и Правительствэрэ IэпыIэгъу къызэрэтфэхъухэрэм ишIуагъэкIэ пандемием пэуцужьыгъэнымкIэ медицинэ отраслэм зэкIэ ищыкIагъэр IэкIэдгъэхьан, типшъэрылъхэр дгъэцэкIэн тэлъэкIы. Федеральнэ гупчэм зэдэлэжьэныгъэу дытиIэм сыкъытегущыIэзэ, апэрэ чэзыоу хэзгъэунэфыкIы сшIоигъор Адыгеим ыцIэкIэ УФ-м и Къэралыгъо Думэ идепутатэу Владислав Резник чанэу Iоф зэришIэрэр ары. Ар зэрэхэлэжьагъэм ишIуагъэкIэ пандемием пэуцужьыгъэным тегъэпсыхьагъэу мызэу-мытIоу республикэм федеральнэ субсидиехэр къыфыхагъэкIыгъэх», — къыIуагъ Адыгеим и ЛIышъхьэу КъумпIыл Мурат.
Шъугу къэтэгъэкIыжьы, 2020-рэ илъэсым ишышъхьэIу мазэ пандемием пэуцужьыгъэным тегъэпсыхьагъэу Адыгеим имедицинэ учреждениехэм федеральнэ бюджетым щыщэу сомэ миллион 61,4-рэ къазэраIэкIэхьэгъагъэр.
«Коронавирусыр зэрэмыуцужьыгъэм епхыгъэу бюджет мылъкур атегощэгъэнымкIэ парламент комиссиемрэ УФ-м и Правительствэрэ шъолъырхэм джыри ахъщэ IэпыIэгъу тедзэ араты. Илъэс хъугъэу медицинэ организациехэм гъэлъэшыгъэ шIыкIэм тетэу Iоф ашIэ, сымаджэу къяуалIэрэр бэ. Правительствэм иIэпэчIэгъэнэ фонд имылъку тедзэу Адыгеим къыIукIэщтыр зыпэIуагъэхьащтыр сымэджэщхэмрэ поликлиникэхэмрэ игъом ыкIи икъоу цIыфхэм IэпыIэгъу ащарагъэгъотыныр, шIокI зимыIэ медицинэ страхованием къыдыхэлъытагъэу сымаджэхэм яIэзэгъэныр ары», — къыIуагъ Адыгеим ыцIэкIэ УФ-м и Къэралыгъо Думэ идепутатэу, партиеу «Единэ Россием» хэтэу Владислав Резник.
АР-м и ЛIышъхьэ ипресс-къулыкъу