Дунэе Iофтхьабзэр ящэнэрэу зэхащэ
Партиеу «Единэ Россиер» кIэщакIо зыфэхъугъэ дунэе патриотическэ Iофтхьабзэу «Диктант Победы» зыфиIорэр ящэнэрэу зэхащэщт. УпчIэхэр анахьэу зыфэгъэхьыгъэщтхэр Хэгъэгу зэошхор къызежьэгъэ апэрэ илъэсым ихъугъэ-шIагъэхэмрэ советскэ дзэпэщэ цIэрыIохэм яюбилейрэ арых. Диктантыр аIэкIэ атхын е онлайн шIыкIэкIэ сайтэу «диктантпобеды.рф» зыфиIорэм рагъэхьан алъэкIыщт. Урысыем ишъолъыр пстэуми, IэкIыб къэралыгъохэми Iофтхьабзэр зыщыкIощт чIыпIэхэр къащызэIуахыщтых.
«Iофтхьабзэу «Диктант Победы» зыфиIорэр мыгъэ мэлылъфэгъум и 29-м зэхащэщт. ПсэупIэ инхэми, цIыкIухэми ащ тегъэпсыхьэгъэ чIыпIэхэр къащызэIуахыщтых. Россотрудничествэр яIэпыIэгъоу IэкIыб къэралыгъохэм арыс тилъэпкъэгъухэми, IэкIыб хэгъэгухэм къарыкIыгъэ цIыфхэми ащ фэдэ диктантыр атхын, зышIоигъо пстэуми онлайн шIыкIэкIэ Iофтхьабзэм къыхэлэжьэнхэ алъэкIыщт», — къыщиIуагъ брифингым «Единэ Россием» ипартийнэ проектэу «Тарихъ шIэжь» зыфиIорэм иобщественнэ совет ипащэу, Урысые тарихъ обществэм (РИО) итхьаматэу Сергей Нарышкиным.
ЫпэкIэ зэрэщытыгъэм фэдэу упчIэхэр къэзыгъэхьазырыгъэхэр РИО-м, Урысые дзэ-тарихъ обществэм, Урысые гуманитар къэралыгъо университетым яэкспертхэр ары. Iофтхьабзэм хэлэжьэщтхэм IофшIэн 25-рэ зэрагъэцэкIэн, дзэ-тарихъ IофыгъохэмкIэ упчIэ 20-мэ, шъолъырым къепхыгъэ IофыгъохэмкIэ упчIи 5-мэ яджэуапхэр къаратыжьын зэрэфаер партийнэ проектэу «Тарихъ шIэжь» зыфиIорэм икоординаторэу, «Единэ Россием» и Генеральнэ совет исекретарь игуадзэу Александр Хинштнейн хигъэунэфыкIыгъ. Ащ къызэрэхигъэщыгъэмкIэ, Георгий Жуковымрэ Константин Рокоссовскэмрэ къызыхъугъэхэр илъэси 125-рэ мыгъэ зэрэхъурэм епхыгъэу ахэм афэгъэхьыгъэ упчIэхэри диктантым хэтыщтых.
Iофтхьабзэм изэхэщакIохэм чIыпIэ мин 12 къызэIуахынэу рахъухьэ. ГъэрекIо фэдэу ахэр джыри зыухъумэжьынымкIэ Министерствэм, Росгвардием, хэгъэгу кIоцI IофхэмкIэ Министерствэм, МЧС-м яучреждениехэм, Росатомым, Роскосмосым, Росморречфлотым, РЖД-м, Росгидрометым япсэуалъэхэм, къухьэхэм, АЭС-хэм ащызэхащэщтых. Россотрудничествэр яIэпыIэгъоу IэкIыб къэралыгъохэми ащ фэдэ чIыпIэхэр къащызэIуахыщтых.
«ИкIыгъэ илъэсым иIоныгъо мазэ Адыгеим имуниципалитетхэм къащызэIуахыгъэгъэ чIыпIэ 22-мэ ТекIоныгъэм фэгъэхьыгъэ диктантыр ащатхыгъагъ. Iофтхьабзэм нахь чанэу хэлэжьагъэхэр республикэм игуфакIохэр ары, — къыIуагъ Урысые общественнэ организациеу «Единэ Россием и НыбжьыкIэ гвардие» и Адыгэ шъолъыр къутамэ ипащэу, партийнэ проектэу «Тинахьыжъхэр» зыфиIорэм икоординаторэу, Мыекъуапэ идепутатэу Бэрзэдж Асыет. — Адыгеим игуфакIохэм я Гупчэ къекIуалIэхэрэр мыгъи чIыпIэ пстэуми ащыIэщтых, ахэм азыныкъо нахьыбэр Iофтхьабзэм изэхэщэкIощтых. ГуфакIохэм Iофтхьабзэм хэлэжьэщтхэр атхыщтых, ТекIоныгъэм фэгъэхьыгъэ диктантыр зытхы зышIоигъо тинахьыжъхэм IэпыIэгъу афэхъущтых. Адыгеим ичIыпIэхэу ащ фэдэ Iофтхьабзэр зыщызэхащэщтхэр мы охътэ благъэм агъэнэфэщтых».
Шъугу къэтэгъэкIыжьы Iофтхьабзэу «Диктант Победы» зыфиIорэр мыгъэ ящэнэрэу зэрэрагъэкIокIырэр. Ащ изэхэщакIохэр партиеу «Единэ Россиер», Урысые тарихъ обществэр, Урысые дзэ-тарихъ обществэр, движениеу «ТекIоныгъэм иволонтерхэр» зыфиIорэр ары. Урысыемрэ IэкIыб къэралыгъо 75-мэ ащыпсэурэ нэбгырэ миллионым ехъумэ 2020-рэ илъэсым яшIэныгъэ зынэсырэр ауплъэкIун алъэкIыгъ.