ХэдзакIохэм азыныкъо нахьыбэмэ «Единэ Россием» пае амакъэ атынэу къаIуагъ
КПРФ-м елъытыгъэмэ, «Единэ Россием» ирейтинг фэдитIукIэ зэрэнахь лъагэр Iэнэ хъураеу Къэралыгъо Думэм ихэдзын фэгъэхьыгъагъэм социальнэ маркетингымкIэ институтым политикэ анализымкIэ ипащэу Виктор Потуремскэм къыщиIуагъ.
УшэтэкIо институтхэм къызэратыгъэмкIэ, «Единэ Россием» пае хэдзакIохэм япроцент 30 – 35-мэ, КПРФ-м пае – процент 16-мэ, ЛДПР-м пае – проценти 9-мэ, «Справедливая Россия – За правду» зыфиIорэм пае – проценти 8-мэ амакъэ атынэу къаIуагъ.
«Шъумакъэ «Единэ Россием» пае шъутыщта?» аIуи цIыфхэм зяупчIыхэм, ахэм япроцент 54-мэ ащ фатынэу, процент 44-мэ фамытынэу, проценти 4-мэ джыри зыми тырамыубытагъэу къаIуагъ.
Граждан обществэм хэхъоныгъэ езыгъэшIырэ Фондым иправление итхьаматэу Константин Костиным зэрэхигъэунэфыкIырэмкIэ, процент 54-р анахь лъэгэпIэшхоу зынэсынхэ алъэкIыщтыр ары, хэдзакIохэм япроцент 42 – 47-мэ амакъэ къафатыми ахэр езэгъыщтых.
ЭИСИ-м иэкспертнэ совет ипащэу Глеб Кузнецовым зэрилъытэрэмкIэ, гуфакIохэр пэшIорыгъэшъ мэкъэтыным зэрэхэлэжьагъэхэм «Единэ Россием» ишIуагъэ къекIыгъ.
Политическэ конъюнктурэмкIэ Гупчэм ипащэу Алексей Чеснаковым зэрэхигъэунэфыкIыгъэмкIэ, социальнэ-экономикэ унашъохэм язэшIохынкIэ пшъэдэкIыжь зэрихьырэр «Единэ Россием» нахь лъэшэу зэхишIагъ.
Экспертхэм яшIошIкIэ, партиехэм хэдзыным гъэхъагъэу щашIыщтхэр бэкIэ зэлъытыгъэр цIыфхэм яшIоигъоныгъэхэр зэрафагъэцэкIэшъущтыр ары. ИНСОМАР-м зэхищэгъэ социальнэ уплъэкIунхэм къызэрагъэлъэгъуагъэмкIэ, пандемием къыхэкIыжьынхэм цIыфхэр фэхьазырых, дэир зэрагъэбагъорэм ахэр езэщыгъэх. Урысыем исхэр джыдэдэм анахьэу зыгъэгумэкIыхэрэр федэу къаIэкIахьэрэр нахь макIэ зэрэхъугъэр ары, коронавирусыр къапыпкIэн зэрилъэкIыщтыр ащ фэдизэу ахэм къырадзэрэп. ЦIыфхэм хэбзэ IофышIэхэм занкIэу зафагъазэ ашIоигъу. Джащ пае «Единэ Россием» пэшIорыгъэшъ мэкъэтыныр зэхещэ. ЗышIоигъо пстэури ащ къыхэлэжьэнхэ алъэкIыщт.
Мэкъэтыныр 2021-рэ илъэсым Iоныгъом и 19-м щыIэщт. Къэралыгъо Думэм ия 8-рэ зэIугъэкIэгъу хагъэхьащтхэр хэдзакIохэм амакъэ зыфатыхэрэр ары. Урысыем ишъолъырхэми регион, муниципальнэ мэхьанэ зиIэ хэдзынхэр ащыкIощтых.