ГъогурыкIоныр щынэгъончъэнымкIэ Къэралыгъо автоинспекцием Росгвардием и ГъэIорышIапIэ иавиационнэ отряд игъусэу мы мафэхэм гъогурыкIоным ишапхъэхэр зыукъохэрэр къыхагъэщыгъэх.

Станицэу Кужорскэм пхырыкIырэ федеральнэ гъогоу «Кавказ» зыфиIорэм дэжь беспилотникэу «ZALA 16-р» къызфагъэ­федэзэ хэбзэухъумакIохэм Iоф щашIагъ. Быбырэ аппаратым ишIуагъэкIэ операторым шапхъэ­хэр зыукъоу ыгъэунэфыхэрэр тыритхагъэх ыкIи ахэм административнэ пшъэдэкIыжь арагъэхьыным фэшI гъогу патруль къулыкъум зэфэхьысыжьхэр IэкIагъэхьагъэх.

— Автомобиль зэутэкIынхэр нахь макIэ шIыгъэнымкIэ, гъогурыкIоным ишапхъэхэр амыукъонхэмкIэ мыщ фэдэ шIыкIэм ишIуагъэ къэкIо. Анахьэу тынаIэ зытетыр «Обгон зап­рещен» зыфиIорэ тамыгъэр зытетым дэжь гъогум техьэхэрэр къы­хэгъэщыгъэнхэр ары, — къыIуагъ Росгвардием иавиаотряд икомандирэу, полицием иполковникэу Игорь Кученкэм.

Зэхащэгъэ Iофтхьабзэм ишIуа­гъэкIэ гъогурыкIоныр зыукъогъэ нэбгырипшI агъэунэфыгъ. Ахэмэ административнэ пшъэдэкIыжь арагъэхьыщт.

ДЕЛЭКЪО Анет.