СатыушIыпIэхэм ыкIи тучанхэм зэрятыгъохэрэм епхыгъэ къэбархэр Адыгеим ихэбзэухъумакIохэм къаIэкIахьэх. Мы тхьамафэм къыкIоцI ащ фэдэ бзэджэшIэгъи 9 агъэунэфыгъ. Ахэм ащыщэу 5-р – Мыекъуапэ, 4-р – Тэхъутэмыкъое районым ащызэрахьагъэх. БзэджашIэхэм нахьыбэрэмкIэ къызIэкIагъэхьагъэр ахъщэ е осэшхо зиIэ пкъыгъох.

Мы мафэхэм республикэм икъэлэ шъхьаIэ дэт тучан горэм илIыкIо полицием идежурнэ часть зыкъыфигъэзагъ. Хъулъфыгъэм къызэриIотагъэмкIэ, щапIэм чIэлъ товархэр къалъы­тэжьзэ осэшхо зиIэ гаджет зэрэчIэкIодыкIыгъэр къыхагъэщыгъ. Камерэм тыритхэгъэ видеом зеплъыхэм ар амышIэрэ хъулъфыгъэм чIитыгъукIыгъэу агъэунэфыгъ.

БзэджашIэр оперативникхэм псынкIэу агъэунэфыгъ. Тыгъуа­кIом илъэс 33-рэ ыныбжь, Мыекъуапэ щэпсэу, ыпэкIэ хьапсым дэсыгъ.

НэмыкI тучан горэм ищакIо мы мафэхэм полицием зыкъыфигъэзагъ. Илъэс 42-рэ зы­ныбжь бзылъфыгъэм къызэри­IотагъэмкIэ, амыгъэунэфыгъэ хъулъфыгъэм сатыушIыпIэм псэолъэшI Iэмэ-псымэ чIитыгъу­кIыгъ. Мы бзэджэшIагъэр зезыхьагъэу зэгуцафэхэрэр къаубытыгъ.

СатыушIыпIэ учреждениехэр зыгъэлажьэхэрэм сакъыныгъэ къызхагъэфэнэу, щапIэхэм акIоцI­хэм видеокамерэхэр ачIагъэуцунхэу хэбзэухъумакIохэр къяджэх.