Шъуимафэ шIу, ныбджэгъу лъапIэхэр! 2021-рэ илъэсым гъэт­хапэм и 17-м къыдэкIыгъэ гъэзетэу «Адыгэ макъэм» итыгъэ тхыгъэм гупшысэу сигъэшIыгъэхэр къисIотыкIы сшIоигъу.

Адыгеир республикэ зыхъугъэр мыгъэ илъэс 30 зэрэхъурэм ехьылIагъэу ГъукIэлI Нурбый къытхыгъэр лъэшэу сыгу рихьыгъ. Губзыгъэу, шIэныгъэ куу иIэу зэрэщытыр гъуащэрэп. Шъэумэн Хьазрэт ехьылIагъэу къытхыгъэм зи хэсымыгъэзэу седжагъ ыкIи дезгъэштагъ. Хьазрэт ицIыф гъэпсыкIэ, игъэхъагъэхэм, цIыфхэм афишIагъэм уакъытегущыIэн хъумэ, тхылъ пчъагъэ къыдэбгъэкIын плъэкIыщт. Сэ къызэрэсшIошIырэмкIэ ар къылэ­жьыгъ, тхылъ къодыеп, серие пчъагъэ хъурэ фильмэ фызэхэбгъэуцонэу тефэ. Ар къызкIэстхырэр сэ сшъхьэкIэ сеолIагъэшъ ары. Лабэ къыдэкIи, Хьатикъуае псым зехьым, цIыфхэм яIэр зашIокIодым Шъэумэн Хьазрэт IэпыIэгъу къафэхъугъагъ. Тыгу ымыгъэкIодэу ишIуагъэ къытигъэкIыгъ. Алахьэм бэгъашIэу, ыкIуачIэ къыщымыкIэу, узынчъэу илъэсыбэ къыгъэшIэнэу Хьатикъуае дэсхэм ацIэкIэ сыфэлъаIо.

Нурбый десэгъаштэ, Хьазрэт псаоу щыIэзэ тхылъ фатхыгъэ­мэ дэгъугъэ. Гуманитар ушэтынхэмкIэ республикэ институтым ар ыпшъэ рилъхьажьэу «Жизнь замечательных людей» зыфиIоу Урысыем къыщыдагъэкIырэм хэхьанэу тыфай.

ГъукIэлI Нурбый къытхыгъэм изакъоми тхылъ псау хъун. Амалэу шъуиIэр ешъухьылIэнышъ тилъэIу жъугъэцэкIэным тыщэгугъы. Адыгэ лъэпкъыр орэбагъу!

ХьакIмэфэ Галин. Хьатикъуай, IофшIэным иветеран.