Мыекъопэ къэлэ хьыкумым унашъоу ышIыгъэр зимыгъэцакIэкIэ кIэух дэй фэхъун зэрилъэкIыщтыр къыгурыIуи, Мыекъуапэ щыпсэурэ хъулъфыгъэм кIэлэпIупкIэм ылъэныкъокIэ чIыфэу зэIуигъэкIагъэр къыпщыныжьыгъ. ЗэкIэмкIи исабый сомэ мини 100 фызэкIигъэкIожьыгъ.

Хъулъфыгъэм къыIэкIэхьэрэ хахъом ипроцент гъэнэфагъэ илъфыгъэ ритын фэягъ. Ау ипшъэ­рылъхэр ымыгъэцакIэхэу бэрэ хэтыгъ. Ащ къы­хэкIыкIэ чIыфэр сомэ минишъэм нэсыгъ.

Хьыкум приставыр хъулъфыгъэм пчъагъэрэ IукIагъ, изекIуакIэ зэрэмытэрэзыр, хэбзэгъэуцугъэм диштэу пшъэдэкIыжь пхъашэ рагъэхьын зэралъэкIыщтыр гуригъэIуагъ. Ащ ыуж исабый ылъэныкъокIэ чIыфэу телъыгъэр зэкIэ къыпщыныжьыгъ, ащкIэ Iофыр зэфэшIыжьыгъэ хъугъэ.

Хьыкум приставхэм я Федеральнэ къулыкъу АдыгеимкIэ и ГъэIорышIапIэ ипресс-къулыкъу.