«АГУ-Адыиф-2» Мыекъуапэ – «Луч-2» Москва – 32:24 (20:13). Гъэтхапэм и 27-м АР-м испорт Унэшхоу Кобл Якъубэ ыцIэ зыхьырэм щызэдешIагъэх.

Хэгъэгум игандбол бзылъфыгъэ командэхэу апшъэрэ купым хэтхэр Мыекъуапэ щызэIукIагъэх. Москва къикIыгъэ пшъашъэхэм къытаIуагъ Адыгэ Республикэм икъэлэ шъхьа­Iэ агу зэрэрихьырэр. Тиспорт псэуалъэхэр нахьыбэ, нахь дахэ зэрэхъухэрэм ащы­гъуазэх.

ЗэIукIэгъур

«Адыифым» иешIакIохэу къэ­лапчъэм Iэгуаор дэзыдзагъэхэр: Никулина – 7, Кожубекова – 6, Логвиненко – 5, Къэбж – 4, Казиханова – 3, Казанджян – 3, Коваленко – 2, С. Морозова – 1, Гильфанова – 1.

Дарина Никулинар гъогогъуи 7 «Луч-2-м» икъэлапчъэ дэуагъ, зэкIэри хъагъэм ридзагъ. Опыт ин зиIэ ешIакIохэм афэдэу пшъэ­шъэ ныбжьыкIэм хъагъэм Iэгуаор зэрэридзэрэр тэгъэшIагъо. Суперлигэм щешIэрэ «Адыифым» Даринэ рагъэблагъэ, зэIукIэгъу­хэм ахэлажьэ. Юлия Кожубековар, Валерия Логвиненкэр, Къэбж Заремэ, Алина Казанджян хъагъэм Iэгуа­ор бэрэ зэрэрадзэрэм тегъэгушIо. А пшъашъэхэри суперлигэм ипчъэ «теох».

ЯтIонэрэ ешIэгъур

«АГУ-Адыиф-2» – «Луч-2» – 25:18 (13:7). Гъэтхапэм и 28-м ешIагъэх.

«Адыиф-2»: къэлэпчъэIутхэр: Черницова, Пивнева, Скнарь; ешIакIохэр: Никулина – 3, Логвиненко – 2, Казанджян – 2, Гильфанова – 1, Кожубекова – 3, Провоторова – 1, Мельникова, С. Морозова – 4, Вульпи, Къэбж – 2, Коваленко – 3, Якимчук – 1.

«Адыиф-2-м» текIоныгъэр къы­дихыным зэрэфэхьазырыр зэнэкъокъум къыщылъэгъуагъ. ТиешIакIохэр апэкIэ зилъыхэкIэ къогъупэхэр икъоу амыгъэфедэрэми, уащытхъунэу зыкъагъэлъэгъуагъ. Гупчэм щыпхырыкIыхэзэ, «Луч-2-р» бэрэ агъэгумэкIыщтыгъ.

Пчъагъэр зэрэлъыкIуатэщтыгъэр: 6:4, 10:5, 11:6, 13:7. ЯтIонэрэ едзыгъор: 21:15, 22:18, 25:18.

Юлиана Скнарь къэлэпчъэIут дэгъу хъун ылъэкIыщт. Тазыр дзынхэр къызэкIедзэжьых, ешIэгъур зэрэкIорэм уасэ фишIызэ, ухъумэн Iофхэр цыхьэшIэгъоу егъэцакIэх, Iэгуаор къызыIэ­кIахьэкIэ псынкIэу зыфидзын фаер къегъоты.

Зэхэщэн Iофхэр гупчэм дэ­гъоу щагъэцакIэ, ешIэгъур зэрэкIорэр IэшIэхэу къагурэIо Юлия Кожубековам, Къэбж Заремэ. ШIыкIэу «парашютыр» тиешIакIохэм макIэу агъэфедэ.

«Луч-2-м» иешIакIоу Елизавета Чернышевам «Адыиф-2-м» икъэлапчъэ гъогогъуи 7 Iэгуаор къыдидзагъ. УхъумакIохэм ар зэрябэнырэр, псынкIэу зэрэгупшысэрэр, амалышIухэм зэралъыхъурэр ешIэгъум къыщегъэ­лъагъо.

Гандболыр пшъашъэхэм язэгурыIоныгъэ, хъагъэм Iэгуаор зэрэрадзэрэм къегъэдахэ.

«Адыиф-2-р» командэ ныб­жьыкI, ащ щагъасэхэрэр суперли­гэм аштэщтых. Апшъэрэ купым хэт клубхэу я 9 – 18-рэ чIыпIэ­хэм афэбанэхэрэм ахэт. Купым щызэнэкъокъухэрэр чIыпIэу зыдэщытхэр зэфэтэхьысыжьых.

Хэт тыдэ щыIа?

1. «АГУ-Адыиф-2» – 35 2. «Ростов-Дон-3» – 27 3. «Ставрополье» – 26 4. «Олимп» – 24 5. «Звезда» – 24 6. «Динамо-3» – 24 7. ЦСКА-3 – 17 8. «Кубань-3» – 17 9. «Луч-2» – 17 10. «СШ N 13-Алиса» – 13. «Адыиф-2-р» мэлылъфэгъум и 6 – 7-м Звенигород щыIукIэщт «Звезда-УОР-м», и 9 – 10-м «Луч-2-м» Москва щыдешIэщт. Сурэтым итхэр: «Адыиф-2-р» «Луч-2-м» дешIэ.