ГъэпцIакIохэм шъуафэсакъ

Телефон зэпхыныгъэр ыкIи Интернетыр къызфагъэфедэзэ гъэпцIакIохэм бзэджэшIагъэхэр зэрахьэх. Мыхэм апэшIуекIорэ пэшIорыгъэшъ Iофтхьабзэхэр хэбзэухъумэкIо къулыкъухэм рагъэкIокIых, зэрэзекIонхэ фаер цIыфхэм къафаIуатэ, агурагъаIо. Ау Iофхэм язытет непи уигъэрэзэнэу щытэп.

2019-2020-рэ илъэсхэм гъэпцIагъэ зыхэлъ бзэджэшIэгъэ 1400-рэ фэдиз Адыгеим щагъэунэфыгъ, ахэм ащыщэу 800-м ехъур сотовэ зэпхыныгъэм ыкIи Интернетым яамалхэр къызфагъэфедэзэ зэрахьагъэх. Мы аужырэ илъэситIум республикэм щыпсэухэрэм чIэнагъэу ашIыгъэр сомэ миллион 20-м кIахьэ.

Мы лъэныкъомкIэ IофшIэныр нахь гъэлъэшыгъэным фытегъэпсыхьагъэу АР-м и МВД иофициальнэ сайт инэкIубгъо шъхьаIэ хэушъхьафыкIыгъэ лъэныкъоу «Адыгея без мошенничества» зыфиIорэр къыщызэIуа­хыгъ. БзэджашIэхэм шъуамыгъэпцIэным, ахэм шъу­зяуалIэкIэ шъузэрэзекIон фаер зэрыт къэбархэр ащ ижъугъотэщтых.

Мыщ фэдэ бзэджэшIагъэ шъурихьалIагъэмэ е шъуа­гъэпцIэнэу шъуауж къихьагъэхэмэ полицием ителефон номерэу 02-м (мобильнэмкIэ – 102-м) псынкIэу шъутеу. ГъэпцIакIохэм бэ къышъуфаIотэн алъэкIыщтыр, ау сакъыныгъэ къызхэжъугъаф, джащыгъум шъуимылъку чIэшъунэщтэп.

Хэбзэгъэуцугъэр ыукъуагъ

Полицием икъулыкъушIэ ахъщэ къуалъхьэ езытын гухэлъ зиIэгъэ хъулъфыгъэр Красногвардейскэ районым ихэбзэухъумакIохэм къаубытыгъ.

Уголовнэ пшъэдэкIыжь рамыгъэхьыным пае хъулъфыгъэм сомэ мин 300 фэдиз полицием иучастковэ уполномоченнэ ритынэу риIуагъ.

КъулыкъушIэм а къэбарыр отделым ипащэхэм аIэкIигъэхьагъ. Ахъщэр полицием иIофышIэ зыщыритырэ уахътэм УФ-м хэгъэгу кIоцI IофхэмкIэ и Министерствэ экономикэ щынэгъончъэнымкIэ ыкIи къолъхьэ тын-Iыхыным пэшIуекIогъэнымкIэ иотделэу Красногвардейскэ районым щыIэм икъулыкъушIэхэр кабинетым къычIэхьагъэх ыкIи бзэджашIэр къаубытыгъ.

Следствием ыугъоигъэ материалхэм къапкъырыкIыхэзэ хъулъфыгъэм ылъэныкъокIэ уголовнэ Iоф къызэIуахыгъ, ар аубытыгъ.

Iофтхьабзэм ишIуагъэкIэ

ПэшIорыгъэшъ Iофтхьабзэу «Сообщи, где торгуют смертью!» зыфиIорэм ишIуа­гъэкIэ наркотикхэр хэбзэнчъэу къезы­гъэкIокIырэ хъулъфыгъэр хэбзэухъумакIохэм къаубытыгъ. Ар Мыекъуапэ щыщ, ыпэкIэ хьапсым дэсыгъ.

Полицием икъулыкъушIэхэм къэбарэу къаIэкIэхьагъэмкIэ, хъулъфыгъэм республикэм икъэлэ шъхьаIэ наркотикхэр щыIуигъэкIынхэу рихъухьагъ. Ар зауплъэ­кIум шъыпкъэу къычIэкIыгъ.

Мыекъуапэ ирайон горэм бзэджашIэр къыщаубытыгъ, къызалъыхъум зэкIоцIыщыхьэгъэ пкъыгъуи 10 къыпкъырахыгъ. Экспертизэм зэригъэунэфыгъэмкIэ, ахэм героин акIоцIылъыгъэр.

Хъулъфыгъэм ылъэныкъокIэ уголовнэ Iоф къызэIуа­хыгъ, лажьэ иIэу хьыкумым зигъэунэфыкIэ илъэс 20-м нэс хьапс къыхьын ылъэкIыщт.