Зэгъусэхэу зэхащагъ

Хьыкум приставхэмрэ Адыгэкъалэ иадминистрациерэ зэхащэгъэ Iофтхьабзэм пшъэрылъ шъхьаIэу иIагъэхэр псэуалъэхэр бэджэндэу зыIыгъхэм ащ ауасэ игъом къатын зэрэфаер агу къагъэкIыжьыныр, чIыфэ зытелъхэм язекIуакIэ зэрэмытэрэзыр агурыгъэIогъэныр арых.

ВедомствитIум ялIыкIохэр унэе предпринимательхэм аIукIагъэх, бэджэндыпкIэм итынкIэ ахэм чIыфэхэр ателъы­гъэх. Рейдэу зэхащагъэм илъэхъан мыщ фэдэ Iоф 30-м ехъумэ ахэплъагъэх, сомэ мин 420-рэ къызэкIагъэкIо­жьыгъ, автотранспортитIум арест атыралъхьагъ. ЧIыфэ шъутелъымэ зэжъугъэшIэныр псынкIэ, ащ пае зэхащагъ къэбарлъыгъэIэс амалэу «Банк исполнительных производств» зыфиIорэр. Ащ шъузихьэкIэ шъуищыкIэгъэ къэбарыр ижъугъотэщт.

ЧIыфэр къызэкIигъэкIожьыгъ

Теуцожь районым щыпсэурэ хъулъфыгъэм иавтомобиль ыгъэфедэн фимытэу унашъо зашIым ыуж чIыфэу телъыр къыпщыныжьыгъ.

Кредитнэ учреждением ахъщэ фызэкIигъэкIожьын зэрэфаер ыкIи гъогурыкIоным ишапхъэхэр зэриукъуа­гъэм къыхэкIыкIэ къытыралъхьэгъэ тазырхэр зэримыпщынырэр къыдалъыти, хъулъфыгъэм ылъэныкъокIэ Iоф пчъагъэ хьыкум приставхэм къызэIуахыгъагъ. ЗэкIэмкIи чIыфэр сомэ мини 160-м ехъугъ. ИзекIуакIэ зэрэмытэрэзыр хъулъфыгъэм гурагъэIуагъ, ау ахъщэр къызэкIигъэкIожьын ыдагъэп.

ЧIыфэ зытелъым автомобиль тетхагъэу хьыкум приставым ыгъэунэфыгъ ыкIи ащ арест тырилъхьагъ.

Ипшъэрылъхэр игъом зимыгъэцакIэкIэ автотранспортыр зэращэщтыр, ащ кIэкIырэ ахъщэр чIыфэм зэрэпэIуагъэхьажьыщтыр хъулъфыгъэм раIуагъ. Ау ащ Iофыр нимыгъэсэу ахъщэр къызэкIигъэкIожьыгъ.

НэкIубгъор зыгъэхьазырыгъэр Тхьаркъохъо Адам.