Шъуимафэ шIу, ныбджэгъу лъапIэхэр! «Адыгэ макъэм» сыгуи, сыпси хэтIагъэу апэрэ нэкIубгъом къыщыублагъэу аужырэм нэсэу седжэ. Мары гъэтхапэм и 16-м Нэхэе Рэмэзанэ итхыгъэу «Лъэпкъ гъэзетым иныбджэгъухэм тафэраз, тэгъэлъапIэх» зыфиIорэм сызеджэм ыуж сыгу къэкIыгъ сэри сишIошIхэр а Iофым къесIо­лIэнэу, ау сыныбжь елъытыгъэу, ар игъом сфэмыгъэцакIэу мэхъу, Iоф горэхэм тапылъэу уахътэр тIэкIэкIы. Мары коронавирусми лъэшэу тызэридзагъ, сымаджэхэр нахь макIэ мэхъу­хэшъ, шыкур.

Нэхэе Рэмэзанэ къытхыхэрэм сигуапэу сяджэ, ахэр гурыIо­гъошIух, щыIэныгъэм, уахътэм къыгъэуцурэ Iофыгъохэм афэгъэхьыгъэх. Ащ итхыгъ ары сэри непэ къэлэмыр къэсэзыгъэштагъэр.

Сэ сыныбжь илъэс 80-м ехъугъ, илъэс 40-м нахьыбэрэ апшъэрэ классхэм хьисапыр язгъэхьэу еджапIэм Iоф щысшIагъ. Лъэпкъ гъэзетми бэрэ сыкъатхэщтыгъ, ау аужырэ илъэсхэм псауныгъэри зэщы­къуагъ, нахь шъхьахыни ныбжьым уешIы.

Рэмэзан лъэшэу къащы­тхъугъ Теуцожь районым ыкIи Адыгэкъалэ ащыпсэухэу лъэпкъ гъэзетыр зыгъэлъапIэу, къизытхыкIэу, ныбджэгъушIоу иIэхэм. Ахэм а щытхъур къалэжьыгъ. А лъэныкъомкIэ тэ тиIофхэм язытет шъущызгъэгъуазэ сшIоигъу. Тэ ХьатикъуаекIэ чылэм адыгэу щыпсэурэм нахьи нэмыкI лъэпкъэу дэсыр нахьыбэ хъугъэ. Ащ лъапсэ фэхъугъэри бэмэ ашIэ. 2002-рэ илъэсым псыхъохэу Лабэрэ Пшызэрэ псыр къадэкIи чылэр лъэшэу Iоф хэфэгъагъ. Тинасып къыхьи, Шъэумэн Хьазрэт бэ къытфишIагъэр, цIыфышъхьэр къыухъу­магъ, илъэсныкъокIэ унэхэр ари­гъэшIыгъ, аригъэгъэцэкIэ­жьыгъ. А лъэхъаным тэри Мые­къуапэ тыкIожьыгъагъ, псыр чылэм дэтыфэ ащ тыщыIагъ. ТинасыпкIэ псыри зэкIэкIожьи, тилъэфыгъэмэ унэм ищыкIэгъэ фэIо-фашIэхэр агъэцакIэхи, тызэрэпсэущтыгъэм тытехьажьыгъагъ.

Ащ ыуж ошъушхо къехи, хатэхэри, унэу шифер зытелъы­гъэхэри ыутыхьэхи, цIыфхэр етIани къин хэфагъэх. Бэ чылэм дэкIыжьыгъэр, тимылъэпкъэгъоу къыдэтIысхьагъэри макIэп. Ахэм «Адыгэ макъэр» къыратхыкIына?! Лъэпкъ гъэзетыр къизытхыкIэрэмэ пчъагъэмкIэ тянэкъо­къун тымылъэкIыщтми, ар зикIасэхэр, еджэхэрэр тиIэх. Сэ сигуапэу седжэ, ренэу сежэ, лъэшэу сыгу рехьы адыгэ шэн-хабзэхэм ягугъу бэрэ зэришIырэр. Коронавирусым цIыфхэр икIыгъэ илъэсым лъэшэу зэридзагъэх, гъэзет кIэтхэнри аIэкIэкIыгъ бэмэ. Мы илъэсым ар къысфэкIоным сыщымыгугъыгъахэу щылэ мазэр къызэрихьэу къысфахьэу аублагъ. Хъугъэм сызыкIэупчIэм, республикэм ипэщагъэу Шъэу­мэн Хьазрэт къызэрэтфыритхыкIыгъэр къысаIуагъ. Лъэшэу ар гуапэ сщыхъугъ, «тхьауе­гъэпсэушхо» есIо сшIоигъу.

Сыгу рехьых IэкIыб къэралыгъохэм адыгэу арысхэм афэгъэхьыгъэу журналистэу ТIэшъу Светланэ «Адыгэ ма­къэм» къыригъахьэхэрэр. Светэ янэ зыщыщ къуаджэм сэри сыкъыщыхъугъ, зы классым тызэдисыгъ. Къыхэзгъэщы сшIоигъу Америкэм ар зэкIом, Адыгэ Хасэм итхьаматэу Натхъо Къадыр къызэрэпэгъокIыгъэр, ныдэлъфыбзэр ыгъэлъапIэу иунагъо исхэр ащ зэрырыгущыIэхэрэр къызэриIогъагъэр. Ащ итхылъэу «Великое похищение или Похищение дочери генерала» зыфиIорэр тичылэ кIалэу Бракъый Иляс къытфищэфи, къытитыгъ, сигуапэу седжагъ.

Бэ гум илъыр, бэ, къэптхын пIомэ, сыгу къэкIырэр, ау кIэух зимыIэ щыIэп. СышъуфэлъаIо сшIоигъу, «Адыгэ макъэм» иIофышIэхэр, псауныгъэ пытэ шъуиIэнэу, бэгъашIэ шъухъунэу. Мы гущыIэхэмкIэ ситхыгъэ сыухы сшIоигъу.