ТIопсэ районым ит къутырэу Цыпка щыпсэурэ Нэпсэумэ яунагъо гумэкIыгъо зыхафэм нафэ къафэхъугъ IэпыIэгъу къыпфэхъуным фэхьазыр цIыфэу щыIэр зэрэмымакIэр.

Щылэ мазэм и 12-м чэщым сабыибэ зэрыс Нэпсэу Хьамедэ иунэ машIо къыкIэнагъ. Сыхьатым 4-м ыныкъоу къыгъэлъагъо­щтыгъэ. Бысымым къызэри­IотэжьырэмкIэ, унэм исыр зэкIэ чъыещтыгъэх. МашIом псынкIэу зыкъызэриштагъэм ыпкъ къикIыкIэ, такъикъ заулэкIэ унашъхьэр стыгъэ ыкIи къефэхыгъ.

— Илъэс зэфэшъхьафхэм псыр гъогогъуитIурэ тиунэ къыкIэ­хьагъ. Нэужым машIом ыпкъ къи­кIыкIэ унэм инахьыбэр зэфыкъом тыгу кIодыгъэ. ТапэкIэ тызэрэпсэущтыр тымышIэу къытщыхъугъ, — къеIуатэ бысымым.

Щылэ мэзэ чэщым къыздихьыгъэ гумэкIыгъор зэрэдагъэзыжьыщтым Нэпсэумэ яунагъо пылъ. МэзитIум бысымым икIалэхэр игъусэу IофшIэнхэр лъагъэкIотагъэх. Унэм ышъхьэ тыралъхьажьыгъ, игъэкIотыгъэ гъэцэкIэжьынхэр рашIылIагъэх.

— МашIом зыкъызештэ нэуж унэм иапэрэ къат идэпкъхэм анэмыкI псаоу къэнэгъагъэп. А уахътэм IэпыIэгъу къытфэхъунхэу цIыфхэр къа­кIощтыгъэх, — къеIуа­тэ Нэпсэу Хьамедэ. — Iахьылхэм, ныб­джэгъу­хэм, гъунэгъухэм, сымышIэрэ цIыфхэм амалэу яIэмкIэ яшIуагъэ къытагъэкIыным пы­лъыгъэх. IэпыIэгъу къызэрэтфэхъущтхэмкIэ къыкIэупчIэхэу телефоным къытеуагъэри мэкIагъэп. Зыхэм гъэцэкIэжьынхэм апэIуд­гъэхьанэу ахъщэ къыт­фахьыщтыгъ, нэ­мыкIхэм псэолъэшI пкъыгъохэр къахьыгъэх, ящэнэрэмэ ежь аIэ къи­хьащтыр къытфа­шIагъ. Къэралыгъом ахъщэ IэпыIэгъу къытитыгъ.

Нэпсэу Хьамедэ ашIэгъахэр, джыри IофшIэнэу апэ илъыр къегъэлъагъо, къеIуатэ. Джыри мэзэ заулэрэ ашIэн Iофыбэ щыI. Дэпкъхэр къызыгъушъыжьыхэкIэ агъэпытэщтых, мебелыр зэрагъэгъотыщт.

— ЦIыфхэр IэпыIэгъу къыт­фэмыхъугъэхэмэ тыгу кIодыщтгъагъэ, — еIо Хьамедэ. – Шъыпкъэу пIощтмэ, тызыхэт дунэе къиным шIу зыгу илъ цIыфыбэ тетми сегуцэфагъэп. Джырэ уахътэ шъхьадж игумэкIыгъо хэтэу, нэмыкIым иер ымыгъэшIагъоу ыкIи IэпыIэгъу фэмыхъоу къысщыхъущтыгъэ. Сиунэгъо Iужъу ыцIэкIэ (сабыиплIырэ къорэлъф-пхъорэлъфищырэ сиI) ыкIи сэ сшъхьэкIэ нэбгырэ пэпчъ сызэрэфэразэр ясIожьы, аIапэ сыубыты сшIоигъу. Ау ар згъэцэкIэн амал щыIэп. Ащ къыхэкIэу гъэзетым сытхэн, IэпыIэгъу къытфэхъугъэ пэпчъ гуфэбэныгъэ гущыIэхэр пэз­гъохын гухэлъ сшIыгъэ. ШIоу щыIэр шъуигъого­гъоу, насып дахэ шъуиIэу, шъуиунагъохэм рэхьатныгъэ арылъэу шъопсэу.

Ныбэ Анзор.