КIэлэцIыкIухэм ыкIи ныбжьыкIэхэм янаучнэ-техническэ творчествэ фытегъэпсыхьэгъэ Дунэе фестивалэу «От винта!» зыфиIорэм хэлэжьагъэх Адыгеим илIыкIохэр. Iофтхьабзэр гъэтхапэм и 25 — 26-м Краснодар щызэхащагъ. Ащ къекIолIагъэхэм яхьэкIагъ Урысыем промышленностымкIэ ыкIи сатыумкIэ иминистрэу Денис Мантуровыр.

Адыгеим гъэхъагъэу иIэхэр фестивалым къыщигъэлъэгъуагъэх. Адыгэ Республикэм и ЛIышъхьэу КъумпIыл Мурат ипшъэрылъкIэ научнэ-техническэ творчествэм ылъэныкъокIэ ныбжьыкIэхэм яушэтын анахь гъэшIэгъонхэр агъэхьазырыгъэх. Джащ фэдэу республикэм илIыкIохэр технологическэ предпринимательствэм фэгъэзэгъэ спикер пэрытхэм зэхащэгъэ лекциехэм ыкIи мастер-классхэм ахэлэжьагъэх. Технофорумэу рагъэкIокIыгъэм Iофыгъо шъхьаIэу къыщаIэтыгъэр промышленностым хэхъоныгъэхэр ышIынхэмкIэ екIолIакIэхэр гъэфедэгъэнхэр ары.

Денис Мантуровым пэублэ псалъэ къышIызэ, УФ-м и Президентэу Владимир Путиным ишIуфэс гущыIэхэмкIэ фестивалэу «От винта!» зыфиIорэм хэлажьэхэрэм закъыфигъэзагъ. ШIэныгъэм ыкIи технологиехэм я Илъэсэу агъэнэфагъэм мы фестивалым чIыпIэшхо зэрэщиубытырэр хигъэунэфыкIыгъ.

— Фестивалым научнэ-техническэ IофшIэгъэ гъэшIэ­гъоныбэ къырахьылIагъ. Ащ къи­кIырэр ыпэкIэ тылъыкIотэн, IэкIыб къэралыгъохэм тянэкъо­къун амал зэрэтиIэр ары, — къыIуагъ Денис Мантуровым.

Мы илъэсым сэнаущыгъэ зыхэлъ ныбжьыкIэхэм яIофшIэгъэ 500-м ехъу фестивалым къырахьылIагъэх. Адыгеим илIыкIохэм унаIэ зытеудзэн фэе ныбжьыкIэ проект 24-рэ ыкIи практик пэрыт 11 къагъэлъэгъуа­гъэх. Джащ фэдэу республикэм гъэхъагъэу иIэхэр къизыIотыкIырэ видеоролик къагъэхьазырыгъ.

ГущыIэм пае, «Кванториумым» илIыкIохэм къэлэ архитектурэм щыбгъэфедэн плъэ­кIыщт парковэ мебель «Iушыр», робот-укъэбзакIор, роботхэу «Сосулькорез», «Погрузчик», «Исследователь», «Ферум», «Венера» зыфиIохэрэр къаугупшысыгъэх. Ахэр щыIэныгъэм илъэныкъо зэфэшъхьафхэм ащыбгъэфедэн плъэкIыщтых.

Джащ фэдэу республикэм иапшъэрэ еджэпIитIум, политехническэ колледжым ястудентхэм къаугупшысыгъэхэм ялъэтегъэ­уцо фестивалым щыкIуагъ.

Адыгеим иэкспозицие зэрагъэлъэгъумэ ашIоигъоу къе­кIолIагъэх Денис Мантуровыр, нэмыкI субъектхэм къарыкIы­гъэхэр. ХьакIэхэм упчIэу къаты­гъэхэм джэуапхэр къаратыжьызэ, ныбжьыкIэхэр яIофшIагъэ­хэм, тапэкIэ гухэлъэу яIэхэм къатегущыIагъэх. Министрэм анахьэу проектищ къыхигъэ­щыгъ, ахэр щыIэныгъэм щыбгъэфедэнхэ зэрэплъэкIыщтым егупшысэнхэу пшъэрылъ къафишIыгъ.

Сэнаущыгъэ зыхэлъ ныбжьыкIэхэм Iоф адэшIыгъэнымкIэ республикэм опыт IэкIэлъ. Лъэпкъ проектэу «Гъэсэныгъ» зыфиIорэм къыдыхэлъытэгъэ Iофтхьабзэхэр шъолъырым зэрифэшъуашэу щырагъэкIокIых.

Сэнаущыгъэ зыхэлъ ныбжьыкIэхэр къыхэгъэщыгъэнхэр, ахэм IэпыIэгъу афэхъугъэныр Адыгеим и ЛIышъхьэ пшъэрылъ шъхьа­Iэу къегъэуцу. Шъугу къэдгъэ­кIыжьын, Урысыем и Премьер- министрэу Михаил Мишустиныр республикэм къызэкIом «Полярис-Адыгея» зыфиIорэ гупчэм щыIагъ ыкIи къыткIэхъухьэрэ лIэужхэм гъэсэныгъэ зэрагъэгъотынымкIэ ар щысэшIоу зэрэщытыр хигъэунэфыкIыгъ.

АР-м и ЛIышъхьэ ипресс-къулыкъу.