УФ-м и Президентэу Владимир Путиныр культурэм иIофышIэ ныбжьыкIэхэм заIокIэм композиторхэм, кIэлэцIыкIу тхылъеджапIэхэм, музейхэм, киностудиехэм IэпыIэгъу ятыгъэным фытегъэпсыхьэгъэ предложениехэр къагъэхьазырынхэу УФ-м культурэмкIэ и Министерствэ пшъэрылъ фишIыгъ.

— ЦIыфхэр чIыпIэ къин зефэхэм шъуиIофшIэн гушъхьэ кIэгъэкъонышхо нэбгырэ миллион пчъагъэхэм афэ­хъугъ, — къыIуагъ Владимир Путиным ащ пае къазэрафэразэр къыкIигъэтхъызэ.

Кинофильмэхэм, мультфильмэхэм атегущыIагъэх, къэралыгъом ипащэ иеплъыкIэхэр къыриIотыкIыгъэх. Мультфильмэу «Маша и Медведь» зыфиIорэм къыщытхъугъ, гуфэбэныгъи, хьалэлыныгъи хэлъхэу зэрилъы­тэрэр къыIуагъ. Мыщ дэжьым мультфильмэхэр зыгъэуцурэ сурэтышIхэм ястатус, киностудиехэм IэпыIэгъу ятыгъэным анаIэ зэратырагъэтыщтыри къыщыхигъэщыгъ.

ЗэIукIэгъум хэлажьэхэрэм культурэм и Унэу къалэхэм адэтхэр лъэпкъ проектэу «Культурэм» къыдыхэлъытагъэу агъэ­цэкIэжьыхэрэм зэрахэмыхьэ­хэрэр агу къеоу къаIуагъ. Вла­димир Путиным мы Iофым шъолъырхэм адытегущыIэнхэу, пшIэн плъэкIыщтыр къагъэнэ­фэнэу культурэмкIэ министрэм пшъэрылъ фишIыгъ.

КIэлэцIыкIу тхылъеджапIэхэм яIофыгъохэми зэIукIэгъум ягугъу щашIыгъ. Урысые къэралыгъо кIэлэцIыкIу тхылъеджа­пIэм ипащэ библиотекэхэм яфонд игъэ­псын пае шъолъыр­хэм субсидиехэр аратынхэу къыкIэлъэIугъ. Илъэс къэс сомэ миллион 550-рэ ащ пэIуагъа­хьэмэ тхылъеджапIэхэр къы­зэтегъэнэжьыгъэ хъунэу ащ елъытэ.

Интернетыр жъугъэу зэрагъэ­федэрэр, узыфаер ащ къыщызэIупхын, уеджэн амал зэрэщыIэр къыхагъэщызэ, тхылъхэм ащ фэдэу мэхьэнэшхо яIэжьыщтыми зэдытегущыIагъэх. КIэлэцIыкIум идунай тхылъым къызэIуехэу, ахэм ауж уимытымэ, фондхэм унаIэ атемыгъэ­тымэ цифровой шIыкIэхэм цIыфхэр роботым фэдэ ашIыщтхэу нахьыбэхэм алъытагъ.

ЕплъыкIэхэм Владимир Путиным адыригъэштагъ, ащ паи предложениехэр къагъэхьазы-рын­хэу министрэм фигъэпытагъ.

Культурэм и Мафэ УФ-м и Президент актер ныбжьыкIэхэм ямузыкальнэ театрэ пае унакIэу ашIыгъэм щыIагъ. КоронавирусыкIэм пэшIуекIорэ вакцинэм изыхэлъхьан зэрэригъэжьагъэр къэралыгъом ипащэ къыхигъэщызэ, ащ ыуж къыкIухьэрэр нахьыбэ зэришIыщтыр, псэуа­лъэу зыдэщыIэщтхэм культурэм епхыгъэхэри зэращыщхэр къы­Iуагъ.

Шъугу къэдгъэкIыжьын, вакцинэм иапэрэ Iахь Владимир Путиным гъэтхапэм и 23-м зы­­харигъэлъхьагъ.