Лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытагъэу шъолъырхэм ащызэхащэщт рейтинг мэкъэтыным изыфэгъэхьазырын щытегущыIагъэх УФ-м псэолъэшIынымкIэ и Министерствэ селекторнэ шIыкIэм тетэу зэхищэгъэгъэ зэхэсыгъом.Адыгеим ылъэныкъокIэ ащ хэлэжьагъэх АР-м и Премьер- министрэ игуадзэу Сапый Вячеслав, АР-м и ЛIышъхьэ ыкIи министрэхэм я Кабинет я Администрацие федеральнэ хэбзэ къулыкъухэм Iоф адэшIэгъэнымкIэ ыкIи кIоцI политикэмкIэ и ГъэIорышIапIэ ипащэу Къонэ Заур, мэкъэтыным изэхэщэн пае агъэпсыгъэ штабым хэтхэр, АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Минис­терствэ, лъэпкъ IофхэмкIэ, Iэ­кIыб къэралхэм ащыпсэурэ тилъэпкъэгъухэм адыряIэ зэпхыны­гъэхэмкIэ ыкIи къэбар жъугъэм иамалхэмкIэ Комитетым, шо­лъырым игъэIорышIэнкIэ Гупчэм ялIыкIохэр.

Мэкъэтыным изыфэгъэхьазырынкIэ Iофтхьабзэхэр Адыгеим икъоу ыкIи чанэу зэрэщызэхащэхэрэр зэхэсыгъом къыща­Iуагъ. ЦIыфхэм мэкъэтыныр зэрэщыIэщтыр, ар зэрэкIорэр алъыгъэIэ­сыгъэнымкIэ ишъо­лъыр 84-рэ зыхэлажьэрэм республикэм я 24-рэ чIыпIэр еубыты.

Къалэу Мыекъуапэ, поселкэхэу Инэм, Яблоновскэм яобщественнэ чIыпIэу зэтырагъэ­псыхьащтхэр къызщыхахыщтхэ мэкъэтынэу мэлылъфэгъум и 26-м къыщыублагъэу жъоныгъуа­кIэм и 30-м нэс кIощтым зыныбжь илъэс 14 икъугъэу шIоигъоныгъэ зиIэ пстэури хэлэжьэн алъэкIыщт.

АР-м и Премьер-министрэ игуадзэу Сапый Вячеслав рес­публикэм щыпсэухэрэмкIэ мэкъэтыным мэхьэнэ ин зэриIэр къыхигъэщыгъ. УФ-м псэолъэшIынымкIэ и Министерствэ иинтернет нэкIубгъоу http://1.gorodsreda.ru зыфиIорэр агъэ­федэзэ цIыфхэм амакъэ атын алъэкIынэу зэришIыгъэм муниципалитетхэм рахъухьагъэм хэгущыIэнхэу, япсэупIэ нахь зэтегъэпсыхьагъэ хъуным яIахь халъхьанэу амал къареты.