Адыгэ къэралыгъо университетым онлайн-зэIукIэ гъэшIэгъон мы мафэхэм щыкIуагъ. ЗэлъашIэрэ спортсменэу, армрестлингымкIэ дунаим гъогогъу пчъагъэрэ ичемпионэу, Олимпиадэ джэгунхэм текIоныгъэ ыкIи хагъэунэфыкIырэ чIыпIэхэр къащыдэзыхыгъэу, УФ-м и Къэралыгъо Думэ идепутатэу Алексей Воеводэ ныбжьыкIэхэм гущыIэгъу къафэхъугъ.

Сэнаущыгъэ зыхэлъ ныбжьыкIэхэр къыхэгъэщыгъэнхэм ыкIи IэпыIэгъу афэхъу­гъэным фытегъэпсыхьэгъэ шъолъыр гупчэу «Полярис-Адыгея» зыфиIорэм илъэныкъоу «Спортым» къыдыхэлъытэгъэ проектнэ еджапIэм изэфэшIыжьын ар фэгъэхьыгъагъ.

— Алексей Воеводэ игъэхъагъэхэм къафэкIон зэрилъэкIыгъэм епхыгъэ упчIэхэр фагъэзагъэх. КIэлэеджакIохэмкIэ ыкIи студентхэмкIэ мыр непэ щысэтехыпIэшIу, — къыIуагъ зэIукIэм изэхэщакIоу Сусанна Макеровам.

Ащ къызэриIуагъэмкIэ, Iофым изэшIохын укъызэрекIолIэн фаемкIэ, спортым ыкIи нэмыкI лъэныкъохэм гъэхъагъэ ащыпшIынымкIэ къыткIэхъухьэрэ лIэужхэм спортсмен цIэрыIом щысэ тырахыным мэхьанэшхо иI.

— «Сириус» ыкIи «Полярис-Адыгея» зыфиIорэ площадкэхэм яшIуагъэкIэ шIэныгъэм, культурэм ыкIи спортым алъэныкъокIэ ныбжьыкIэхэм сэнаущыгъэу ахэ­лъыр къызэIуахын, лъэгэпIэ инхэм анэсынхэ амал яIэ мэхъу, — къыIуагъ Сусанна Макеровам.

ДЕЛЭКЪО Анет.