Къалэм ипащэ мэзитIу пIалъэкIэ агъэтIысыгъ
Шъугу къэдгъэкIыжьын муниципальнэ псэупIэу «Къалэу Мыекъуапэ» иадминистрацие ипащэ ылъэныкъокIэ уголовнэ Iоф бэмышIэу къызэрэзэIуахыгъэр.
Урысыем щынэгъончъэнымкIэ ифедеральнэ къулыкъу АдыгеимкIэ и ГъэIорышIапIэ къикIыгъэ тхылъхэр иIэубытыпIэхэу УФ-м и Следственнэ комитет иследственнэ ГъэIорышIапIэу Адыгэ Республикэм щыIэм уголовнэ Iофыр къызэIуихыгъ. Агъэмысэрэм ылъэныкъокIэ хьыкумым унашъо ышIыгъ мэзитIу пIалъэкIэ ар агъэтIысынэу.
Следствием зэригъэунэфыгъэмкIэ, 2018-рэ илъэсым ижъоныгъокIэ мазэ бзэджэшIагъэ зезыхьагъэу зэгуцафэхэрэм мэкъумэщым пылъ предпринимателыр иIофшIапIэ къыригъэблэгъагъ ыкIи ащ имылъку къызIэкIигъахьэ шIоигъоу Мыекъопэ районым илъ чIыгухэмкIэ ехъожьынэу риIуагъ. ЕжькIэ мыфедэу зэрэщытым къыхэкIэу предпринимателыр ащ езэгъыгъэп. БзэджэшIагъэ зезыхьагъэу зэгуцафэхэрэм предпринимателыр ыгъэщынэнэу фежьагъ ыукIыщтым нэсэу риIозэ. Зэрэщынагъэм къыхэкIэу, ежькIэ мыфедэ чIыгу зэхъожьыныр ыгъэцэкIэным хъулъфыгъэр къешIугъ.
УФ-м и Следственнэ комитет иследственнэ ГъэIорышIапIэу АР-м щыIэм къызэритыгъэмкIэ, уголовнэ Iофым епхыгъэу зэхэфынхэр макIо.