Урысые Федерацием и ДОСААФ ишъолъыр къутамэу Адыгэ Республикэм щыIэм икIыгъэ илъэсым зэшIуихыгъэм ыкIи 2021-м пшъэрылъэу зыфигъэуцужьыхэрэм защытегущыIэгъэхэ зэхэсыгъо гъэтхапэм и 25-м иIагъ.

Iофтхьабзэм хэлэжьагъэх Адыгеим и ДОСААФ илъып­лъэкIо Совет хэтхэр, Къэралыгъо Совет — Хасэм идепутатэу Евгений Саловыр, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Шъхьэлэхъо Аскэр, Адыгэ Республикэм иветеранхэм я Совет итхьаматэу Къоджэ Аслъан, АР-м и Общественнэ палатэ илIыкIоу Анна Крюковар, организацием икъутамэхэу районхэм ащыIэхэм япащэхэр ыкIи ныбжьыкIэхэр, къэбарлъыгъэIэс амалхэр.

Шъолъыр отделением зэхэщэн, дзэ-патриотическэ ыкIи спорт IофшIэнымкIэ отделым ипащэу Ирина Манченкэм зэхэ­сыгъор зэрищагъ. Iофыгъоу зыхэплъэнхэу зыфызэрэугъоигъэхэм нэIуасэ афишIыгъэх.

Къыхэгъэщы­гъэн фае, Урысыем и ДОСААФ икIыгъэ илъэ­сым шъолъыр отделениехэм ашIэгъэ IофшIэныр зызэфехьысыжьым, Адыгеим икъутамэ зыхэхьэрэ купым елъы­тыгъэу а 1-рэ чIыпIэр къыдихыгъ.

ГущыIэр лъигъэкIотагъ Урысыем и ДОСААФ ишъолъыр къутамэ щыIэм ипащэу Барцо Тимур.

— Пшъэрылъэу зыфэдгъэуцужьыгъэхэм ягъэцэкIэнкIэ 2020-рэ илъэсыр къызэрыкIоу щытыгъэп, — къыIуагъ ащ. – Коронавирусым зызыщиушъомбгъугъэ илъэсым Iофтхьэбзабэ онлайн ыкIи пэIудзыгъэ шIыкIэм тетэу ред­гъэкIокIыгъ. Ау ащ пае къэмынэу, щыкIэгъэ тIэкIухэр щыIэхэми, пшъэрылъ шъхьаIэу тиIагъэхэри дгъэцэкIагъэх. Ахэм ащыщ ныбжьыкIэхэм яхэгъэгу шIу алъэгъоу пIугъэнхэр, дзэ-учетнэ сэнэхьатхэм, спорт лъэпкъ зэфэшъхьафхэм афэгъэсэгъэнхэр, ныбжьыкIэ армейцэхэм япчъагъэ хэгъэ­хъогъэныр, нэмыкIхэри.

Барцо Тимур къызэриIуа­гъэмкIэ, республикэм имуниципальнэ образованиехэм зэкIэми организацием икъутамэу къащызэIуахыгъэхэм яIофшIэн къызэтырагъэуцуагъэп, пшъэ­рылъ шъхьаIэу яIагъэхэр икъоу агъэцэкIагъэх. Дзэ-учетнэ сэнэхьатхэмкIэ нэбгыри 126-рэ агъэхьазырыгъ (проценти 100-м нэсэу), техническэ сэнэхьатхэмкIэ пшъэрылъыр проценти 108,1-м нэсэу агъэцэкIагъ. Шъолъыр отделением исатыр нэбгырэ 2368-рэ икIыгъэ илъэсым къыхэхьагъ, 2019-рэ илъэ­сым ебгъапшэмэ, ар нэбгырэ 70-кIэ нахь макI. А щыкIагъэм идэгъэзыжьын джы тызхэт илъэ­сым анаIэ зэрэтырагъэтыщтыр зэхэсыгъом къыщаIуагъ.

Дзэ-патриотическэ пIуныгъэм ылъэныкъокIэ агъэнэфэгъэ Iоф­тхьабзэхэр проценти 100-м нэсэу зэшIуахыгъэх. Урысыем и ДОСААФ идзэ-патриотическэ клубхэм я Ассоциацие IофшIэныр лъигъэкIотагъ.

Адыгеим июнармейцэхэм ясатыр кIэлэеджэкIо 1500-рэ хэтыгъэмэ, джы ахэр нэбгырэ 3000 хъугъэх.

2020-рэ илъэсым лъыхъон IофшIэным хэхъоныгъэ ышIыгъ: экспедициехэр, экспонатхэм якъэгъэлъэгъонхэр зэхащагъэх. Джащ фэдэу дзэ щытхъум ичIыпIэхэм автопробегхэр ащыкIуагъэх, лIыхъужъныгъэм исы­хьатхэр, дзэ-патриотическэ кон­цертхэр, литературнэ-музы­кальнэ пчыхьэзэхахьэхэр еджапIэхэм ащырагъэкIокIыгъэх.

Iофыгъоу зыхэплъагъэхэм ащыщ авиационнэ, техническэ, дзэ ыкIи къулыкъу спорт лъэпкъ­хэм рес­публикэм хэхъоныгъэ щашIыныр. Мы лъэныкъохэмкIэ тиныбжьыкIэ спорт­сменхэм 2020-рэ илъэсым гъэ­хъэгъэшIу­хэр ашIы­гъэх. Мыекъопэ дзэ- патриотическэ клубэу «Вертикаль» зыфи­Iорэм дзэ джэгу­кIэхэмкIэ зэнэкъо­къоу «Зарницэм» я 8-рэу текIоны­гъэр къыщыдихыгъ. Урысыем и ДОСААФ ишъолъыр организацие ыгъэнэфэгъэ ахъщэ шIухьафтыныр клубэу «Вертикалым» къыфагъэшъошагъ.

Мотоклубэу «Победа» зыфиIорэм хэтхэу Павел Лобачевымрэ Натан Юнрэ Краснодар щыкIогъэ зэнэкъо­къоу «StartMoto» зыфиIорэм а 1-рэ ыкIи я 4-рэ чIыпIэхэр щаубыты­гъэх. Радио спортымкIэ, щэрыонымкIэ, Iэпшъэ зэонымкIэ тиспортсменхэм гъэхъагъэхэр ашIыгъэх. Адыгеим и ДОСААФ хэт нэбгыри 107-мэ ГТО-м ишапхъэхэр дэгъоу атыгъэх.

АР-м и ДОСААФ ипащэ щыкIагъэхэми къащыуцугъ.

— Адыгэ зыухъумэжьын организацием иучреждение пстэури ясатыр хэт­хэм япчъагъэ зэрэха­гъэхъощтым пылъыгъэ­хэп, — еIо Барцо Тимур. — ЧIыпIэ къутамэхэм ащыщхэм яфинанс-хъыз­мэт IофшIэн къызэтеуцагъ.

2021-рэ илъэсым пшъэры­лъэу зыфагъэуцужьыхэрэм зэхэсыгъом щатегущыIагъэх. Урысыем и ДОСААФ епхыгъэхэ, шъо­лъыр отделениехэм, гъэсэны­гъэмкIэ учреждениехэм, авиационнэ, спорт ыкIи нэмыкI организациехэм финанс-экономикэ зыпкъитыныгъэ яIэным дэлэжьэщтых. Джащ фэдэу ныбжьыкIэхэм япатриотическэ пIуныгъэкIэ пшъэрылъыр гъэ­кIэ­жьыгъэным, социальнэ инсти­тутхэм Iоф адэшIэгъэным, нэмыкIхэми анаIэ атырагъэтыгъ.

Зэхэсыгъом хэлэжьагъэхэр зытегущыIагъэхэм ащыщ Хэ­гъэгу зэошхом ТекIоныгъэр къызыщыдахыгъэр мыгъэ илъэс 76-рэ зэрэхъурэм епхыгъэ Iоф­тхьабзэу зэхащэщтхэм ягъэ­нэфэн.

КIэухым ДОСААФ-м иIофшIэн чанэу хэлэжьагъэхэм юбилейнэ медальхэр, щытхъу тхылъхэр аратыгъэх. КъекIокIырэ Кубокыр Тэхъутэмыкъое район къутамэм фагъэшъошагъ.

Iэшъынэ Сусан.