Лъэпкъ проектэу «Щынэгъончъэ ыкIи шэпхъэшIухэм адиштэрэ авто­мобиль гъогухэр» зыфиIорэм къыдыхэлъытагъэу социальнэ мэхьанэ зиIэ псэуалъэхэм апэгъунэгъу гъогухэр республикэм щагъэцэкIэжьых.

ГущыIэм пае, медицинэ гуп­чэу «Мой доктор» зыфиIорэр зытет урамэу Крестьянскэм автомобильхэр зыщагъэуцун алъэкIыщт чIыпIэ хэушъхьэфыкIыгъэ щагъэпсыгъ. Сэкъатныгъэ зиIэ цIыфхэм афытегъэпсы­хьа­гъэу ар щыт. Джащ фэдэу Мые­къопэ къэлэ сымэджэщымрэ республикэ перинатальнэ гуп­чэмрэ адэжь автомобильхэр зыдагъэуцун алъэкIыщт чIыпIэ­хэри зэтырагъэуцожьы­гъэх.

КIэлэцIыкIу IыгъыпIэу «Солнышко» зыфиIорэм пэгъунэгъоу щыт автобус къэуцупIэр зэтырагъэпсыхьажьыгъ, ащ нэмыкIэу автомобильхэр къызыIухьэрэ чIыпIэхэр нахь ины ашIыгъэх.

Социальнэ мэхьанэ зиIэ псэуалъэхэр зыпэгъунэгъу гъогухэм ягъэкIэжьын мы илъэ­сыми лъыпадзэжьыгъ. Станицэу Ханскэм иурамэу Краснооктябрьскэм иIахьэу метрэ 850-рэ зикIыхьагъэр агъэцэкIэжьынэу агъэнафэ. ЩынэгъончъэнымкIэ шапхъэу щыIэхэр агъэфедэхэзэ IофшIэныр зэхащэщт. Гурыт еджапIэу N 23-р а урамым тет. Ащ нэмыкIэу гурыт еджапIэу N 3-р зытет урамэу Тульскэм (урамэу Кирпичнэм къыщегъэ­жьагъэу Пушкинам нэс) гъэцэ­кIэнхэр щызэхащэщтых.

ЫпшъэкIэ зигугъу къэтшIыгъэ гъогухэр зэрагъэцэкIэжьыщтхэм дакIоу, автобусхэр къызыщыуцурэ чIыпIэхэри агъэ­кIэ­жьыщтых, гъогу тамыгъэхэр агъэуцущтых, лъэсрыкIохэм апае гъогу напцэхэр къашIыхьащтых. Гъэсэныгъэм иучреждениехэм апэIулъ гъогухэр щынэ­гъончъэу гъэпсыгъэнхэр пшъэ­рылъ шъхьа­Iэхэм ащыщ.

ДЕЛЭКЪО Анет.