Гъэтхапэм и 24-м «Адыгеим икIэлэпIу анахь дэгъу» зыфиIорэ зэнэ­къокъур республикэм къыщызэIуахыгъ.

Ар илъэс къэс зэхащэ. ШIэныгъэ ин зиIэ кIэлэпIухэр къы­хэгъэщыгъэнхэр, кIэлэцIыкIу IыгъыпIэхэм ащылажьэхэрэр опытэу аIэкIэлъымкIэ зэхъо­жьынхэр, технологиякIэхэр щыIэныгъэм щыпхыращынхэр ары пшъэрылъ шъхьаIэу зэхэщакIохэм зыфагъэуцужьыхэрэр.

Республикэ зэнэкъокъум хэ­лажьэхэрэр муниципальнэ уцугъом текIоныгъэ ыкIи хагъэу­нэфыкIырэ чIыпIэ къыщыдэзыхыгъэхэр арых. Мыщ анахь дэгъоу алъытэрэр Урысые зэ­нэкъокъум хэлэжьэщт.

Iофтхьабзэр мэфэкI шIыкIэм тетэу къызэIуахыгъ. «Урысыем икIэлэпIу анахь дэгъу» зыфиIорэм хэлэжьэгъэ Алхъо Саидэрэ «Урысыем икIэлэегъэ­джэ анахь дэгъу» зыфиIорэм хагъэунэфыкIырэ чIыпIэ къыщыдэзыхыгъэ Сергей Левчен­кэмрэ ар зэращагъ.

АР-м гъэсэныгъэмрэ шIэныгъэмрэкIэ иминистрэ иапэрэ гуадзэу Евгений Лебедевым Iофтхьабзэр къызэIуихыгъ. КIэлэпIумэ ашIэрэ Iофым мэхьэнэ ин зэриIэр, кIэлэцIыкIу IыгъыпIэм щигъотырэ шIэныгъэр сабыимкIэ ублапIэ зэрэхъурэр къыIуагъ. Мыщ фэдэ зэнэ­къо­къухэм шIогъэшхо зэрапы­лъыр, яIофшIэгъухэм нэIуасэ зэра­фэхъухэрэр, яшIэныгъэхэмкIэ зэрэзэдэгуащэхэрэр къыхигъэщыгъ.

Гъэсэныгъэм иIофышIэхэм япрофсоюз организацие ипащэу Сергей Кошкиным джащ фэдэу Iофтхьабзэм къекIолIагъэхэм шIуфэс къарихыгъ. Зэнэкъокъум хэлажьэхэрэм зэрифэшъуашэу зыкъагъэлъэгъонэу къафэлъэ­Iуагъ. Мыщ изэхэщэнкIэ проф­союзыр сыдигъуи IэпыIэгъу афэхъу. Мы илъэсым ковид тестым итынкIэ IофышIэхэм яшIуагъэ арагъэкIыгъ.

Мэфэ заулэм къыкIоцI рес­публикэм икIэлэпIухэм шIэныгъэу аIэкIэлъхэр аушэтыщтых. ЫпэрапшIэу «Моя педагогическая находка» зыфиIорэмкIэ зэнэкъокъугъэх. Нэужым кIэлэцIыкIухэм Iоф зэрадашIэрэр къагъэлъэгъощт.

(Тикорр.).