УФ-м и Президентэу Владимир Путиным коронавирусыкIэм пэшIуекIорэ вакцинэм иапэрэ Iахь зэрэзыхаригъэлъхьагъэр къэбарыкIэу мы мафэхэм зигугъу ашIыхэрэм апэ ит.

Гупчэ СМИ-м къызэратырэмкIэ, къэралыгъом ипащэ Урысыем къыщашIыгъэ вакцинэм цыхьэ зэрэфишIыгъэм фи­гъэчэфыгъэхэу, щысэ тырахызэ прививкэр языгъэшIырэр бэ. Ежь Владимир Путинми тивакцинэхэм цыхьэ афэпшIынэу зэрэщытыр, шIуагъэ къызэратырэр уахътэм къызэриушыхьатыжьыгъэр къыхигъэщыгъ.

УФ-м и Президент ипресс-секретарэу Дмитрий Песковым къызэриIуагъэмкIэ, вакцинэм иапэрэ Iахьэу къэралыгъом ипащэ халъхьагъэр ипкъынэ- лынэхэм аштагъ, нэужым зыпарэми къыгъэгумэкIыжьыгъэп, нахьыпэрэм фэдэу Iоф ешIэ. ЯтIонэрэ Iахьыр шапхъэхэм адиштэу зыхаригъэлъхьащт.