Гъэтхапэм и 31-м нэс

УФ-м ПенсиехэмкIэ ифонд и Къутамэу АР-м щыIэм шъугу къегъэкIыжьы, кIэлэцIыкIоу зыныбжь илъэси 8-м шIомыкIы­гъэхэм зэтыгъо ахъщэ тынэу сомэ мини 5-р къаратыным пае лъэIу тхылъыр зымытыгъэхэм гъэтхэпэ мазэм и 31-рэм нэс ныIэп пIалъэу яIэжьыр.

Ны-тыхэу джыри ар къаIызымыхыгъэхэм къэралыгъо фэIо-фашIэхэм япортал къызфагъэфедэн алъэ­кIыщт, фондым икъулыкъоу цIыфхэм Iоф адэзышIэрэм екIуа­лIэхэми лъэIу тхылъыр аIахыщт.

КIэлэцIыкIум лъыплъэнэу е ыпIунэу зыштагъэхэр, ахъщэ тыныр къафэкIонэу фитыныгъэ зэряIэр къаушыхьатын фаеу зэрэщытым къыхэкIыкIэ, къулыкъум ежьхэм ашъхьэкIэ екIолIэнхэ фае.

Зэтыгъо ахъщэ тыным пае лъэIу тхылъыр зымытыгъэ ны-тыхэми, лъыплъэнэу е ыпIунэу зыштагъэхэми зыкъагъэпсынкIэнэу ятэIо.

IофшIапIэм Iутха хьауми Iумытыжьхэм ащыщха…

Пенсионерэу мысатыу общественнэ организациехэм ахэтхэр е япащэхэр Iоф­шIапIэм Iутхэм ахалъытэхэмэ, хьауми Iоф амышIэкIэ макIомэ УФ-м ПенсиехэмкIэ ифонд и Къутамэу АР-м щыIэм шъущегъэгъуазэ.

УФ-м IофшIэнымкIэ ыкIи цIыфхэр социальнэу къэу­хъумэгъэнхэмкIэ и Министерствэ къызэригъэнафэрэмкIэ, мыкоммерческэ организацием хэтэу лэжьапкIэ зимыIэхэр ыкIи шIокI зимыIэ пенсионнэ страхованием пае взносхэр къызфамытыхэрэр IофшIапIэм Iумытыжь пенсионерхэм ащыщых, ахэм япенсии, нэмыкIэу ащ фэдэ чIыпIэ итхэм афэдэу, индексацие шIыгъэу къафэкIо. Ащ фэшI ахэм апае «СЗВ-М», «СЗВ-СТАЖ» зыфиIорэ шIыкIэхэмкIэ гъэпсыгъэ отчетхэр ПенсиехэмкIэ фондым къыфэкIонхэу ищыкIагъэп. Ау зы мазэ нэмыIэми страхованиемкIэ взносыр пенсионерым къыфатыгъэмэ, IофшIапIэм IуткIэ кIощт ыкIи отчетыр фондым къыIэкIэхьан фае.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу.