«Россети Кубань» и Адыгэ шъолъыр къутамэ и Дондуковскэ участкэ ибригадэ хэтых мастерэу Алексей Валуевыр, электромонтерхэу Алексей Отставновыр, Юрий Валушэ.

Ахэр къалэу Шъачэ осышхо къыщеси электричествэм икIуа­пIэхэр зызэщегъакъохэм, зэтезыгъэуцожьыгъэхэм ахэты­гъэх. БлэкIыгъэ мэзэе мазэр ары мэфэ зытIущым зэпымыоу осыр къызесыгъагъэр. Шъачэ хахьэрэ поселкэхэм электричествэм икIуапIэу ащызэбгырыщыгъэхэр ос цIынэр афэмыIэтэу зэпичыгъагъэх.

Къалэм иэнергетикхэм гъунэгъу къутамэхэм яспециалистхэри адеIагъэх. Адыгэ шъолъыр къутамэм Дондуковскэ участкэм ибригадэ ыгъэкIуагъ. Ащ хэтхэм селоу «Красная Воля» зыфи­Iорэм Iоф щашIагъ.

Алексей Валуевыр илъэс 18 хъугъэу мы участкэм щэлажьэ. Ар станицэу Дондуковскэм къы­щыхъугъ, щапIугъ. Къалэу Новочеркасскэ дэт технологическэ колледжыр къыухи, дзэми къулыкъу къыщихьи къызегъэзэ­жьым ащ Iухьэгъагъ. А илъэсхэм хэшIыкIышхо фыриIэу зиIофшIэн зыгъэцакIэу, цыхьэ зыфэпшIын специалистэу зэрэщытыр къыгъэлъэгъуагъ. ИIофшIагъэ щытхъу ыкIи рэзэныгъэ тхылъхэмкIэ мызэу, мытIоу къызэрэхагъэщыгъэми ар къеушыхьаты.

Алексей Отставновыр элек­тро­энергетикэм зыхэтыр илъэс 21-рэ хъугъэ. Гурыт профессиональнэ гъэсэныгъэ иI, пчъагъэ­рэ ишIэныгъэхэм ахигъэхъуагъ. Пшъэрылъэу фашIырэр дэмыхэу зыгъэцакIэу, дисциплинэшхо зыхэлъ специалистэу игугъу ашIы. Ащи илъэсыбэ IофшIа­гъэу иIэр тынхэмкIэ къыхагъэщыгъ.

Юрий Валушэ анахь опытышхо иI, илъэс 30 хъугъэу энергетикэм хэт. Дондуковскэ участкэм иводителэу ригъэжьэгъагъ, нэужым джы зэрыла­жьэрэ электромонтер сэнэхьатыр зэригъэгъотыжьыгъ. НыбжьыкIэхэм иопыткIэ адэгощэным ар сыдигъокIи фэхьазыр. Коллективым лъытэныгъэшхо фе­шIы, ипшъэрылъхэр зэрифэшъуа­шэу зэригъэцакIэхэрэм фэшI тынхэр къыратыгъэх.

Дондуковскэ участкэм ибригадэ IофшIэн къинхэм афагъазэу бэрэ къыхэкIыгъ. Шъачэ олимпиадэм пае псэолъабэу щагъэу­цугъэм яшIын ар хэлэжьагъ. Джащ фэдэу Къырым, Дагъыстан Республикэм, Пшызэ шъо­лъыр, Адыгеим ом ащызэщигъэ­къогъэ псэолъабэ зэтырагъэуцожьыгъ.

— Илъэсыбэ хъугъэу зэхэтых, гущыIэ ныкъокIэ зэгу­рэIох, зэдэIужьыхэмэ, зэде­Iэжьхэзэ Iоф зэдашIэ, шапхъэ­хэм ягъэцэкIэни анаIэ тет. Мыхэр нэмыкI коллективхэмкIэ щысэтехыпIэх, — ары къаIорэр Дондуковскэ участкэм ибригадэ хэтхэм апае.