Гъэтхапэм и 24-м осышхоу Адыгеим къыщесыгъэм электричествэ рыкIуапIэхэм ащыщхэр зэщигъэкъуагъэх. РыкIопIэ шъхьаIэхэр зэкIэри Адыгэ электрическэ сетьхэм яспециалистхэм а мэфэ дэдэм зэтырагъэуцожьыгъэх. Нэужым уна­гъохэр къакIухьэхэзэ унэхэм якIуалIэу зэпичыгъэхэр афашIыжьыгъэх.

ПстэумкIи бригадэ 41-мэ, ар нэбгырэ 88-рэ, техникэ зэфэшъхьафэу 41-мэ Iоф ашIагъ. Охътабэ темышIэзэ цIыфхэм электроэнергиер афатIупщыжьыным пае компанием икъутамэу гъунэгъоу щыIэхэм яIофышIэхэри къыхагъэлэжьагъэх. Зэпстэур ашIыжьыфэ емыжэхэу социальнэ мэхьанэ зиIэ псэуалъэхэм электричествэр аIэкIэгъэхьэгъэным пае IэпэчIэгъэнэ къэкIопIэ 14 атIупщыгъагъ.

Шъугу къэтэгъэкIыжьы, электричествэм икъэкIуапIэ горэ е ар къэзытырэ псэуалъэр зэщыкъуа­гъэу гу лъышъутагъэмэ мы телефонымкIэ шъукъытеон шъулъэкIыщт: 8-800-220-0-220.

НэкIубгъор зыгъэхьазырыгъэр Хъут Нэфсэт.