Адыгеим и ЛIышъхьэ зэхэсыгъор зэрищагъ
Хабзэр Адыгэ Республикэм щамыукъоным фэгъэзэгъэ координационнэ зэIукIэм изэхэсыгъоу тыгъуасэ щыIагъэм лъэпкъ проектхэм ягъэцэкIэнкIэ хэбзэукъоныгъэхэр зышIыхэрэм ягъогупэ пыбзыкIыгъэным, миграцие политикэр Адыгэ Республикэм зэрэщызэрахьэрэм, фэтэрыбэу зэхэт унэхэм игъэкIотыгъэ гъэцэкIэжьынхэр арашIылIэхэ зыхъукIэ хэбзэукъоныгъэхэр амышIынхэм япхыгъэ Iофыгъохэм ыкIи нэмыкIхэм щатегущыIагъэх. Адыгеим и ЛIышъхьэу КъумпIыл Мурат Iофтхьабзэр зэрищагъ.
АР-м и УплъэкIокIо-лъытэкIо палатэ итхьаматэу Павел Стаценкэм зэхэсыгъом къызэрэщиIуагъэмкIэ, АР-м и МВД игъусэхэу мыгъэ уплъэкIун Iофтхьэбзэ пчъагъэ зэхащэщт. Ахэм ащыщэу 3-р Адыгэ Республикэм и ЛIышъхьэ игъо зэрилъэгъугъэм тетэу. Ахэр зыфэгъэхьыгъэхэр лъэпкъ проектхэу «ПсэупIэмрэ къэлэ щыIакIэмрэ», «Щынэгъончъэ ыкIи шэпхъэшIухэм адиштэрэ автомобиль гъогухэр», «Гъэсэныгъ» зыфиIохэрэр республикэм зэрэщыпхыращыхэрэр уплъэкIугъэнхэр ары.
Джащ фэдэу лъэпкъ проектэу «Экология» зыфиIорэм игъэцэкIэн зэрэкIорэр, укъэбзалъэхэр Мыекъуапэ зэрэщагъэкIэжьыхэрэр, псыугъоипIэмрэ магистральнэ псырыкIуапIэмрэ зэрагъэпсыхэрэр ауплъэкIущтых. Мэкъуогъур имыкIызэ, коммунальнэ инфраструктурэм ипсэуалъэхэм ягъэкIэжьынкIэ бюджет мылъкур зэрагъэфедэрэм епхыгъэ уплъэкIунхэр Мыекъопэ, Красногвардейскэ, Кощхьэблэ районхэм яадминистрациехэм арашIылIэщтых. Бюджет мылъкур зыфытемыгъэпсыхьэгъэ гухэлъхэмкIэ зыгъэфедэхэрэм ягъогупэ пыбзыкIыгъэным тегъэпсыхьэгъэ уплъэкIун Iофтхьабзэхэм мэхьанэшхо зэряIэр Адыгеим и ЛIышъхьэ хигъэунэфыкIыгъ.
«НепэкIэ лъэпкъ проектхэмрэ къэралыгъо программэхэмрэ ары республикэм иэкономикэрэ исоциальнэ щыIэныгъэрэ анахьэу хэхъоныгъэ езыгъэшIыхэрэр. Проектхэр зэрагъэцакIэрэм бэкIэ елъытыгъэщт чIыпIэхэм хэхъоныгъэу ашIыщтыри. Планэу рахъухьагъэр агъэцэкIэным пае министерствэхэмрэ муниципалитетхэмрэ япащэхэм пшъэдэкIыжьэу ахьырэм зыкъырагъэIэтыным мэхьанэшхо иIэу сэлъытэ», — хигъэунэфыкIыгъ КъумпIыл Мурат.
Джащ фэдэу зэхэсыгъом къэралыгъо миграцие политикэу Урысые Федерацием 2019 – 2025-рэ илъэсхэм щызэрахьащтхэм яконцепциеу УФ-м и Президентэу Владимир Путиным и УказкIэ аухэсыгъэр зэрагъэцакIэрэми щытегущыIагъэх. Мы IофыгъомкIэ къэгущыIагъэх АР-м хэгъэгу кIоцI IофхэмкIэ иминистрэ игуадзэу БрантIэ Мурадин, АР-м лъэпкъ IофхэмкIэ, IэкIыб къэралхэм ащыпсэурэ тилъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет и Тхьаматэу Шъхьэлэхъо Аскэр. Зэхэсыгъом къызэрэщаIуагъэмкIэ, миграциемкIэ хэбзэгъэуцугъэр зэраукъуагъэм фэшI IэкIыб къэралыгъохэм къарыкIыгъэ нэбгырэ 40 фэдиз Адыгеим рагъэкIыжьыгъ, нэбгырэ 64-мэ уголовнэ пшъэдэкIыжь арагъэхьыгъ. АР-м икъэралыгъо программэу «IэкIыб къэралыгъохэм ащыпсэурэ тилъэпкъэгъухэр Адыгэ Республикэм къэщэжьыгъэнхэмкIэ IэпыIэгъу афэхъугъэныр» зыфиIорэм диштэу 2020-рэ илъэсым нэбгырэ 34-мэ ялъэIу афагъэцэкIагъ. Адыгэ къэралыгъо университетым иректорэу Мамый Даут къызэрэхигъэщыгъэмкIэ, IэкIыб къэралыгъохэм къарыкIыгъэ студентхэр щыIэныгъэм хэгъэгъозэгъэнхэмкIэ апшъэрэ еджапIэм Iофышхо щашIэ. НепэкIэ АКъУ-мрэ МКъТУ-мрэ IэкIыб къэралыгъохэм къарыкIыгъэ ныбжьыкIэ мини 3 фэдиз ащеджэ.
Фэтэрыбэу зэхэт унэхэм гъэцэкIэжьынышхохэр арашIылIэ, зэхэкъутэнкIэ щынагъоу щыт унэхэм цIыфхэр къачIащыжь зыхъукIэ хэбзэукъоныгъэхэр зышIыхэрэм ягъогупэ зэрэпабзыкIырэм зэхэсыгъом хэлэжьагъэхэр едэIугъэх. АР-м псэолъэшIынымкIэ, транспортымкIэ, ЖКХ-мкIэ, гъогу хъызмэтымкIэ иминистрэу Валерий Картамышевым зэрэхигъэунэфыкIыгъэмкIэ, гъэрекIо фэтэрыбэу зэхэт уни 152-мэ гъэцэкIэжьынышхохэр арашIылIагъэх. ПстэумкIи сомэ миллион 224,3-рэ ащ фэдэ IофшIэнхэм апэIухьагъ. 2010-рэ илъэсым къыщегъэжьагъэу 2022-рэ илъэсым нэс зэхэкъутэнкIэ щынагъоу щыт унэхэм цIыфхэр къачIащыжьыгъэх. Ащ сомэ миллион 41,6-рэ пэIухьагъ.
«ПсэупIэхэмкIэ инспекцием ТСЖ-мрэ гъэIорышIэкIо компаниехэмрэ япащэхэм гъусэныгъэ пытэ адыриIэным, специалистхэм яIэпэIэсэныгъэ зыкъегъэIэтыгъэнымкIэ семинар зэхэщэгъэнхэм мэхьанэшхо яI», — къыIуагъ КъумпIыл Мурат.
Зэхэсыгъом икIэух республикэм и ЛIышъхьэу КъумпIыл Мурат ведомствэ заулэмэ япащэхэм пшъэрылъ афишIыгъ зэхэсыгъом щаштэгъэ унашъохэр зэрагъэцакIэрэм пхъашэу гъунэ лъафынэу.