Урысыем хэгъэгу кIоцI IофхэмкIэ иминистрэу Владимир Колокольцевым видеоконференцие шIыкIэкIэ шъолъыр заулэмэ хэгъэгу кIоцI IофхэмкIэ яминистерствэхэм къулыкъу ащызыхьы­хэрэр япэщакIэхэм, Адыгэ Республикэм хэгъэгу кIоцI IофхэмкIэ иминистрэу агъэнэфэгъэ, полицием иполковникэу Иван Бахиловри ахэм зэрахэтэу, тыгъуасэ нэIуасэ афишIыгъэх.

Зэхэсыгъом хэлэжьагъэх Адыгэ Республикэм и ЛIышъхьэу КъумпIыл Мурат, Адыгеим и МВД къепхыгъэ Общественнэ советым итхьаматэу, АР-м и Къэралыгъо упчIэжьэгъоу ТхьакIущынэ Аслъан, Урысые Федерацием и Президент и Полномочнэ лIыкIоу ЮФО-м щыIэм иаппарат республикэмкIэ ифедеральнэ инспектор шъхьа­Iэу Сергей Дрокиныр, Адыгеим и Апшъэрэ хьыкум итхьаматэу Шумэн Байзэт, АР-м ипрокурорэу Игорь Шевченкэр.

Шъугу къэтэгъэкIыжьы, Урысые Федерацием и Президент 2021-рэ илъэсым гъэтхапэм и 18-м ышIыгъэ Указэу N 149-р зытетымкIэ Адыгэ Республикэм хэгъэгу кIоцI IофхэмкIэ иминистрэу полицием иполковникэу Иван Бахиловыр агъэнэфагъ. Урысыем и МВД Рязань хэкумкIэ и ГъэIорышIапIэ ипащэ игуадзэу, полицием ипащэу тапэкIэ ар щытыгъ. ЦIыфхэм пэщэныгъэ адызехьэгъэнымкIэ ахэм опытышхоу яIэр, министерствэхэм пэщакIэу афагъэ­нэфагъэхэм яамалхэр икъоу шъолъырхэм зэращагъэфедэщтхэм ицыхьэ зэрэтелъыр Владимир Колокольцевым къыIуагъ. Урысые Федерацием и Президентэу Владимир Путиным Урысыем и МВД къыфигъэуцугъэ пшъэрылъхэм ягъэцэкIэн анахьэу анаIэ зэрэтырагъэтын фаер зэхэсыгъом щыхагъэунэфыкIыгъ.

Анахьэу ар зыфэгъэхьыгъэр цIыфхэм общественнэ щынэгъон­чъагъэ яIэным, къолъхьэ тын- Iыхыным ебэныжьыгъэным, IT-бзэджэшIагъэхэм апэуцужьыгъэным, экономикэ бзэджэшIагъэхэм къакIегъэчыгъэным, гъогум щынэгъончъэу щызекIонхэм япхыгъэ Iофыгъохэр ары. ЦIыфхэм закъызэрафагъэзэрэ тхылъхэм нахьышIоу Iоф адашIэным лъэшэу анаIэ тырагъэтынэу пшъэрылъ къафашIыгъ. Сыда пIомэ ащ елъытыгъэщт цIыфхэм хэбзэухъумэкIо къулыкъухэм уасэу къафашIыщтыр.

КIэлэцIыкIу зыгъэпсэфыгъо уахътэр къызэрэблагъэрэм епхыгъэу общественнэ рэхьатныгъэ щыIэнымкIэ Iофэу ашIэрэр агъэлъэшынэу зэхэсыгъом пшъэ­рылъ щафашIыгъ. АщкIэ щысэу Владимир Колокольцевым Адыгеир къыгъэлъэгъуагъ. Мы шъолъырым зыгъэпсэфакIохэр бэу къэкIох, зекIоу къеуалIэрэми илъэс къэс хэхъо зэпыт. Зэхэсыгъом пшъэрылъ заулэ щафашIыгъ кадрэхэм ягъэхьазырын, къулыкъур зыхьыхэрэм амал дэгъухэр афызэхэщэгъэнхэм япхыгъэу.

Владимир Колокольцевым зэхэсыгъом хэлажьэхэрэм къа­фигъэпытагъ цIыфхэм амакъэ зыщатыщт, якIэтхыкIыжьын зыщызэхащэщт мафэхэм общественнэ рэхьатныгъэрэ щынэгъончъагъэрэ щыIэнхэмкIэ ищы­кIэгъэ амалхэр зэрахьанэу.

Урысыем и МВД ипащэ зэрэхигъэунэфыкIыгъэмкIэ, япшъэ­рылъхэр шIуагъэ къытэу агъэцэкIэн залъэкIыщтыр хэбзэухъу­мэкIо къулыкъухэмрэ хабзэм игъэцэкIэкIо къулыкъухэмрэ азыфагу зэдэлэжьэныгъэ пытэ илъ зыхъукIэ ары ныIэп.

Адыгеим и ЛIышъхьэу КъумпIыл Мурат зэхэсыгъом Иван Бахиловым щыфэлъэIуагъ иIоф­шIэн гъэхъагъэхэр щишIынэу. Ащ зэрэхигъэунэфыкIыгъэмкIэ, феде­ральнэ гупчэм ишIуагъэкIэ рес­публикэм ихэбзэухъумэкIо къулы­къухэм зэдэлэжьэныгъэу адыряIэр нахь агъэпытэн алъэ­кIыгъ.

«Адыгэ Республикэм и МВД-рэ тэрырэ шIуагъэ къы­тэу тызэрэзэдэлажьэрэмкIэ цIыф лъэпкъыбэ зыщызэдэпсэурэ тиреспубликэ мамырныгъэм­рэ рэхьатныгъэм­рэ къыщыухъу­мэгъэнхэм атегъэпсыхьэгъэ Iофыгъуабэ псынкIэу зэшIо­тхын тэлъэкIы. ЮФО-м имызакъоу, зэрэхэгъэ­гоуи зып­штэ­кIэ, Адыгеир анахь шъо­лъыр рэхьатхэм зэращыщыгъэу къэнэжьы. ТэркIэ мэхьа­нэшхо иI Iофхэр джащ тетэу лъыкIотэнхэм», — хигъэу­нэ­фыкIыгъ КъумпIыл Мурат.

Хабзэр амыукъонымкIэ, рес­публикэм исхэм яфитыныгъэхэр къэухъумэгъэнхэмкIэ, гъогурыкIонымкIэ шапхъэхэр къыдэлъы­тэгъэнхэмкIэ республикэм ихэбзэ къулыкъухэмрэ МВД-мрэ язэдэлэжьэныгъэ зэрагъэпытэщтым ицыхьэ зэрателъыр Адыгеим ипащэ къыIуагъ.

Адыгэ Республикэм и ЛIышъхьэ ипресс-къулыкъу