Наркотикхэр хэбзэнчъэу амыгъэзекIонхэм фэгъэзэгъэ комиссием зичэзыу зэхэсыгъоу тыгъуасэ иIагъэм тхьамэтагъор щызэрихьагъ Адыгэ Республикэм и ЛIышъхьэу КъумпIыл Мурат.

Iофтхьабзэм хэлэжьагъэх АР-м и Къэралыгъо Совет —Хасэм и Тхьаматэу Владимир Нарожнэр, федеральнэ инспектор шъхьаIэу Сергей Дрокиныр, республикэм и Премьер-министрэу Геннадий Митрофановыр, хэбзэухъумэкIо къулыкъухэм япащэхэр, нэмыкIхэри.

Наркотикхэр хэбзэнчъэу къе­зыгъэкIокIыхэрэм апэшIуекIогъэ­ным фэшI блэкIыгъэ илъэсым Iофэу ашIагъэм, 2021-мкIэ пшъэрылъхэм къэзэрэугъоигъэ­хэр атегущыIагъэх.

АР-м хэгъэгу кIоцI IофхэмкIэ и Министерствэ къызэритырэмкIэ, 2020-рэ илъэсым наркотикхэм япхыгъэ бзэджэшIэгъэ 302-рэ республикэм щызэрахьагъэу къыхагъэщыгъ. Уголовнэ Iоф 221-рэ зэхафыгъ ыкIи хьыкумым IэкIагъэхьагъ. Уголовнэ пшъэдэкIыжь нэбгыри 198-мэ арагъэхьыгъ. БзэджашIэхэм наркотик килограмми 8 фэдиз къапкъырахыгъ.

АР-м и МВД ипащэ игуадзэу БрантIэ Мурадин мы лъэны­къомкIэ Iофэу ашIэрэм, анахьэу анаIэ зытырагъэтырэм, пэшIорыгъэшъ Iофтхьабзэу зэхащэ­хэрэм кIэкIэу къащыуцугъ.

Наркоманхэм реабилитацие акIуным ыкIи ахэр щыIэныгъэм хэгъэгъозэжьыгъэнхэм афэшI пшъэрылъхэр гъэцэкIа­гъэхэ зэ­рэхъурэм иIофыгъуи къэзэрэугъо­игъэхэр тегущыIагъэх. Адыгэ республикэ наркологическэ диспансерым къызэритыгъэмкIэ, 2021-рэ илъэсым щылэ мазэм и 1-м ехъулIэу учетым нэбгырэ 1141-рэ хэт, блэкIыгъэ илъэсым мыщ фэдэ иуахътэ егъэпшагъэмэ а пчъагъэр проценти 10-кIэ нахь макI.

Наркотикхэм апэшIуекIогъэным фытегъэпсыхьэгъэ къэралыгъо политикэр республикэм щыгъэцэкIагъэ зэрэхъурэм къы­тегущыIагъ АР-м псауны­гъэр къэухъумэгъэнымкIэ иминистрэу Мэрэтыкъо Рустем.

Наркоманхэм реабилитацие акIуным ылъэныкъокIэ IофшIэныр нахь гъэлъэшыгъэн зэрэфаер республикэм ипащэ хи­гъэу­нэфыкIыгъ.

— Наркотикхэр зыгъэфе­дэхэрэм IэпыIэгъу афэхъугъэ­ным, ахэр щыIэныгъэм хэгъэ­гъозэжьыгъэнхэм фытегъэ­псыхьэгъэ программэм шъо­лъырым Iоф щешIэ. Ащ фэдэ цIыфхэм тишIуагъэ ятэгъэкIы. Ау ежьхэр ары зэпхыгъэр реабилитацием шIуагъэу къытыщтыр. Мыщ дэжьым специалистхэм, анахьэу психолог­хэм, япшъэрылъхэр зэрагъэцакIэрэм мэхьанэшхо иI, — къыIуагъ КъумпIыл Мурат.

Зэхэсыгъом хэлэжьагъэхэр нэмыкI Iофыгъохэми ахэплъагъэх, унашъохэр ашIыгъэх.

Адыгеим и ЛIышъхьэ ипресс-къулыкъу.