Муниципальнэ псэупIэу «Къалэу Мыекъуапэ» иадминистрацие ипащэ ылъэныкъокIэ уголовнэ Iоф къызэIуахыгъ.

Урысые Федерацием и Уголовнэ кодекс ия 163-рэ статья ия 3-рэ Iахь къыдилъытэрэ бзэджэшIагъэу IэкIэшъокIуагъэр (вымогательство) зэрихьагъэу ащ егуцафэх. Урысыем щынэгъончъэнымкIэ икъулыкъу АдыгеимкIэ и ГъэIорышIапIэ къикIыгъэ тхылъхэр иIэубытыпIэхэу УФ-м и Следственнэ комитет иследственнэ ГъэIорышIапIэу Адыгэ Республикэм щылажьэрэм ипащэ ипшъэ­рылъхэр зыгъэцакIэрэм уголовнэ Iофыр къызэIуихыгъ.

Следствием зэригъэунэфыгъэмкIэ, 2018-рэ илъэсым ижъоныгъокIэ мазэ бзэджэшIагъэ зезыхьагъэу зэгуцафэхэрэм иIофшIапIэ къыригъэблэгъагъ мэкъумэщым пылъ предпринимателыр ыкIи ащ имылъку къызIэкIигъахьэ шIоигъоу Мыекъопэ районым илъ чIыгухэмкIэ ехъожьынэу риIуагъ. ЧIыгухэр ежь имылъку нахьи сомэ миллиони 5-кIэ нахь пыутэу къызэрикIыхэрэм ыкIи ежькIэ мыфедэу зэрэщытым къыхэкIэу предпринимателыр а гукъэкIым езэгъыгъэп. ЫIорэм къызэрэтемыхьэрэм пае бзэджэшIагъэ зезыхьагъэу зэгуцафэхэрэм предпринимателыр ыгъэщынэнэу фежьагъ ыукIыщтым нэсэу риIозэ. Зэрэщынагъэм къыхэкIэу, ежькIэ мыфедэ чIыгу зэхъожьыныр ыгъэцэкIэным хъулъфыгъэр къешIугъ.

Джырэ уахътэм бзэджэшIагъэр зэрихьагъэу зэгуцафэхэрэр аубытыгъ, зэрагъэпщынэщт шIыкIэм икъыхэхын дэлажьэх. Уголовнэ IофымкIэ следственнэ ыкIи нэмыкI Iофыгъохэу хъугъэ-шIагъэр къэзыушыхьатыщтхэр зэрахьэх. Следствиер макIо.

Къэбарыр УФ-м и Следственнэ комитет иследственнэ ГъэIорышIапIэу АР-м щыIэм къытIэкIигъэхьагъ