КоронавирусыкIэм зызэриушъомбгъурэр тихэгъэгу къыщызэтегъэуцогъэным анахьыбэу фэIорышIагъэхэм ащыщ зэпахырэ уз мэхъаджэм пэшIуекIорэ вакцинэхэр цIыфхэм ахалъхьанхэу зэрэрагъэжьагъэр.

Прививкэр IахьитIоу гощы­гъэу зы нэбгырэм халъхьан фаеу щыт. Урысыем щыпсэоу апэрэ Iахьыр зыхалъхьагъэр нэбгырэ миллиони 6,3-рэ мэхъу, вакцинэр зэрэщытын фаем фэдизэу зыIэкIэхьагъэр нэбгырэ миллиони 4,3-р ары. Тыгъоснахьыпэ, гъэтхапэм и 23-м, вакцинэм иапэрэ Iахь УФ-м и Президентэу Владимир Путинми зыхаригъэлъхьагъ.

БлэкIыгъэ илъэсым итыгъэгъэзэ мазэ къэралыгъом ипащэ пресс-конференциешхоу иIагъэм прививкэ ышIыщтымэ къызыщеупчIыхэм, ыныбжьыкIэ къекIунэу вакцинэ щыIэ зыхъу­кIэ, шIокI имыIэу зыхаригъэлъхьащтэу къыIогъагъ. Ащ ыуж «Спут- ник V» зыфиIорэмрэ «Эпи­ВакКоронамрэ» зыныбжь хэкIотагъэхэми зыхалъхьаным зэрэфытегъэпсыхьагъэхэр УФ-м псауныгъэр къэухъумэгъэнымкIэ и Министерствэ къыушыхьатыжьыгъ.

Владимир Путиным къызэриIуагъэу, прививкэм ишIын ригъэжьагъ. Вакцинэр нэбгырэ пэпчъ ипкъынэ-лынэ зэфэшъхьафэу ештэ, апэрэ мафэм зитемпературэ дэкIуаеу, гъэретынчъэ ышIыхэрэр къахэкIых, зыпарэкIи зэхэзымышIэхэрэри щыIэх. УФ-м и Президент ипресс-секретарь къызэриIуа­гъэм­кIэ, зэхэзымышIагъэхэм Владимир Путиныр ащыщ, вакцинэм иапэрэ Iахь зыхалъхьэм ыуж ащ иIофшIэн пидзэжьыгъ. Ау зыхаригъэлъхьагъэм ыцIэ Кремлым къыщыраIуагъэп, ащыщ зыпари къыхамыгъэщыным пай аушъэфэу ары къызэраIуагъэр.

— Урысыем къыщашIырэ вакцинэхэм цыхьэ афэпшIынэу зэрэщытыр, зэрэмыщынагъо­хэр теубытагъэ хэлъэу къэтIон тлъэкIыщт, щыIэныгъэми ар къыгъэлъэгъуагъ. Ары па­кIошъ, нэмыкI IэкIыб къэрал вакцинэхэм ащ фэдэу инэу цIыфыр къэзыухъумэрэ ахэтэп, — къыщиIуагъ Владимир Путиным ащ ыпэрэ мафэм зэхэсыгъоу иIагъэм.

Урысыем къыщашIырэ вакцинэхэр зищыкIэгъэ къэралыгъохэм япчъагъэ хахъоми, ти­хэгъэгу исхэм ящыкIагъэм фэдизыр аIэкIэгъэхьэгъэныр анахь шъхьаIэу зэрэщытыр, цIыфхэр прививкэ зэрашIыхэрэм нахь хэгъэхъогъэным мэхьанэшхо зэриIэр Президентым къы­кIигъэтхъыгъ.

ХЪУТ Нэфсэт.