Тыгъуасэ, гъэтхапэм и 24-м, АР-м и Къэралыгъо Совет – Хасэм я LX-рэ зэхэсыгъо иIагъ. Парламентым и Тхьаматэу Владимир Нарожнэм ар зэрищагъ.

Пстэумэ апэу АР-м и Общественнэ палатэ хэтыщтхэр депутатхэм агъэнэфагъэх. Общественнэ организацие зэфэшъхьафхэм нэбгырипшI къагъэлъэ­гъуагъ. Кандидатурэхэм Парламентым икомитетхэр пэшIорыгъэшъэу ахаплъэхи адырагъэштагъ, зэхэсыгъоми амакъэхэр ащафатыгъэх. Ащ тетэу АР-м и Общественнэ палатэ хагъэхьагъэх Адыгеим ыкIи Пшызэ шъолъыр ащыпсэурэ быслъымэн­хэм ямуфтиеу Къэрдэн Аскэрбый, Мыекъопэ ыкIи Адыгэ епархием яархиепископэу Тихон, «Адыгэ Хасэм» итхьаматэу ЛIымыщэкъо Рэмэзан, заом, IофшIэным, УIэшыгъэ КIуачIэхэм ыкIи хэбзэухъумэкIо органхэм яветеранхэм яобщественнэ организацие ипащэу Къоджэ Аслъан, къэндзал обществэу «Дуслык» зыфиIорэм ипащэу Алим Ильясовыр, нэмыкIхэр.

Нэужым зытегущыIагъэхэм ащыщ 2021-рэ илъэс бюджетым ыкIи 2022 — 2023-рэ илъэсхэм агъэнэфагъэхэм афэгъэхьыгъэ хэбзэгъэуцугъэм зэхъокIыныгъэ­хэр фэшIыгъэнхэр. Илъэсэу тызыхэтым бюджетым зымыгъэ­зэжьыщт мылъкоу къыхэхъощтыр сомэ миллиони 181,3-кIэ нахьыбэ шIыгъэным ар фэгъэ­хьыгъ. Ащ щыщэу сомэ миллиони 178,9-р псэупIэ-коммунальнэ хъызмэтым зэхъокIыныгъэ­хэр фэшIыгъэнхэмкIэ Фондым зэзэгъыныгъэ тедзэу ышIыгъэ­хэм къапкъырыкIыгъ, сомэ миллиони 2,4-р жъы хъугъэу, зэхэоным нэсыгъэ псэупIэхэм ачIэсхэм ягъэкощын пае Тэхъу­тэмыкъое районым блэкIыгъэ илъэсым фагъэкIогъагъэм щыщэу къэнагъэр ары.

АР-м и УплъэкIокIо-лъытэкIо палатэ икIыгъэ 2020-рэ илъэсым Iофэу ышIагъэм ыкIи республикэ бюджетыр гъэфедагъэ зэрэхъу­гъэм афэгъэхьыгъэ докладэу ащ ипащэ къышIыгъэми депутат­хэр едэIугъэх. Павел Стаценкэм къызэриIуагъэмкIэ, илъэсым уплъэкIун Iофтхьэбзи 7 зэха­щагъ. Ахэм ащыщэу щыр амыухыгъэу мы илъэсыми лъагъэ­кIуатэх. Сомэ миллиарди 2-рэ миллион 331,8-р ыкIи сомэ миллиардрэ миллион 343,6-рэ зыосэ мылъкур гъэфедагъэ зэрэхъугъэхэр ауплъэкIу.

Палатэм ипащэ идоклад къы­зэрэщыхигъэщыгъэмкIэ, УФ-м финансхэмкIэ и Министерствэ шъолъырхэм ярейтингэу ыгъэ­хьазырыгъэм иедзыгъоу «Финансовый контроль» зыфиIорэм бюджетыр зыдэкIуагъэр анахь шъхьаихыгъэу къэзыгъэлъэгъорэ субъекти 10-м Адыгеир ащыщэу щыгъэнэфагъ.

АР-м и Парламент идепутатхэр федеральнэ хэбзэгъэуцугъэ­хэм ащыщхэм зэхъокIыныгъэхэр афэшIыгъэнхэм кIэщакIо фэхъу­гъэхэу ахэм атегущыIагъэх. Джащ фэдэу УФ-м и Правительствэ и Тхьаматэу Михаил Мишустиным, УФ-м ФедерациемкIэ и Совет, Къэралыгъо Думэм ядепутатхэм афэгъэзэгъэ джэпсэлъэ пшIыкIуз агъэхьазырыгъ. Депутатхэм цIыфхэр зырагъэблагъэхэм ахэм къякIо­лIагъэхэр зыгъэгумэкIыхэу зигугъу къашIыгъэхэр ары зэпстэумэ лъапсэу афэхъугъэр.

Социальнэ ыкIи страхованиемкIэ пенсиехэм, кIэлэцIыкIоу сэкъатныгъэ зиIэхэм, ицIыкIугъом къыщыублагъэу апэрэ купым хахьэрэ сэкъатныгъэ зиIэхэм алъыплъэхэрэм ахъщэу къафакIорэм ятынкIэ шапхъэхэм зэхъокIыныгъэхэр афэшIыгъэнхэм, зыныбжь имыкъугъэхэм япIункIэ, яIыгъынкIэ пшъэрылъхэр икъоу зымыгъэцакIэхэрэм тазырэу атырэр къэIэтыгъэным, хэбзэ гъэцэкIэкIо къулыкъухэм яIофышIэхэм, ахэм яшъхьэгъу­сэхэм ямылъку гъэфыкъуагъэ хъугъэмэ, социальнэ IэпыIэгъу ятыгъэнымкIэ юридическэ шапхъэхэр икъоу зэрэмыгъэнэфагъэхэм, сабыибэ зэрыс унагъоу псэукIэ амалхэр нахьышIу шIыгъэнхэм пае ипотекэр зыгъэпсыгъэхэм, унагъом, ныгъом, тыгъом ыкIи кIэлэцIыкIугъом IэпыIэгъу ятыгъэным ылъэныкъокIэ щыIэ шIыкIэхэм джыри ахэгъэхъогъэ­ным, нэмыкIыбэмэ ахэр афэгъэхьыгъэх. КIэщакIо зыфэхъугъэхэм затегущыIэхэм ыуж зэкIэри игъоу алъытагъ.

Джащ фэдэу депутатхэм ныбжьыкIэхэм къэралыгъо Iэпы­Iэгъу ятыгъэным, зыныбжь икъугъэ хэушъхьафыкIыгъэ цIыф купхэм алъыплъэгъэнымкIэ чIыпIэ зыгъэIорышIэжьыпIэ къу­лыкъухэм пшъэрылъэу яIэхэм, ящэнэрэ ыкIи ащ къыкIэлъыкIорэ сабый къызэрыхъухьэгъэ унагъоу зигъот макIэхэм, илъэ­си 3 — 7 зыныбжь кIэлэцIыкIу­хэм мазэ къэс афэкIорэ ахъщэ тынхэм, Къэралыгъо Советым — Хасэм идепутат истатус, республикэм щыпсэухэрэр ошIэ-дэмышIэ Iофхэм ащыухъу­мэгъэнхэм, административнэ хэукъоныгъэхэм, къэралыгъо мылъкур приватизацие шIыгъэнымкIэ прогнозхэм, нэмыкIхэм афэгъэхьыгъэ хэбзэгъэуцугъэ­хэм зэхъокIыныгъэхэр афэшIыгъэнхэм афэгъэхьыгъэ законопроектхэм, законхэм атегущыIагъэх, аштагъэх.

Ахэм анэмыкIэу Краснодарскэ псыIыгъыпIэр зэрагъэфе­дэрэм изэгъэшIэн фэгъэзэгъэ­нэуи комиссие мы зэхэсыгъом щызэхащагъ, НыбжьыкIэ парламентым и Положении зэхъокIыныгъэхэр щыфашIыгъэх.

ПстэумкIи Iоф 70-рэ повесткэм щыгъэнэфэгъагъ.

ХЪУТ Нэфсэт.