Министерствэм иколлегие игъэкIотыгъэ зэхэсыгъо иIагъ.

Министерствэм 2020-рэ илъэсым иIофшIагъэ зэфахьысыжьыгъ, 2021-рэ илъэсым пшъэрылъэу яIэхэм атегу­щыIагъэх.

Республикэм культурэмкIэ иминистрэу Аулъэ Юрэ зэха­хьэм зэфэ­хьысыжьхэр къыщишIыгъэх.

Культурнэ щыIэкIэ-псэукIэм цIыфхэр нахьышIоу къыхэщэ­гъэнхэр пшъэрылъ шъхьаIэхэм ащыщэу Аулъэ Юрэ къыIуагъ. Къуаджэхэм адэт культурэм иунэхэм яIофшIэн лъэхъаным диштэу зэхэщэгъэныр, культу­рэм икъулыкъушIэхэр Iофхэм нахьышIоу ахэлажьэхэзэ цIыф­хэм алъыIэсынхэр пшъэрылъ хэхыгъэхэм ащыщых.

Художественнэ культурэм, искусствэм нахь заушъомбгъуным фэшI цIыфхэм ясэнаущыгъэ къызэрэзэIуахырэм пащэхэм мэхьэнэ ин раты. Гъэсэныгъэм, шIэныгъэм, IэкIыб хэгъэгухэм зэпхыныгъэу адыти­Iэхэм ахэгъэхъогъэным, нэ­мыкI­хэм министрэр къатегущыIагъ.

Культурэм иIофшIапIэхэр

Культурэм епхыгъэ IофшIэпIэ 317-рэ республикэм ит. А пчъа­гъэм щыщэу тхылъеджапIэхэр 144-рэ мэхъух. Культурнэ-зы­гъэпсэфыпIэ IофшIапIэхэр 132-рэ, театри 4, музеи 8, нэмыкI­хэри Адыгеим иIэх.

Культурэм иунэхэр, модельнэ тхылъеджапIэхэр къызэ­рэзэIуахыгъэхэм яшIуагъэкIэ куль­турэм иIофышIэхэм япчъагъэ 100-м ехъу хэхъуагъ. КIэлэцIыкIухэмрэ ныбжьыкIэхэмрэ культурэм, искусствэм нахьышIоу ахэщэгъэнхэм фэшI «Культурэм ихэхъоныгъ» зыфиIорэ къэралыгъо программэр Адыгэ Республикэм культурэмкIэ и Министерствэ егъэцакIэ.

Зэпахырэ узым къыхэкIэу культурэм иIофышIэхэм зэхащэрэ зэIукIэгъухэр нахь макIэ хъугъэх нахь мышIэми, цIыфхэм ягулъытэ изыкъегъэIэтын, языгъэпсэфыгъо уахътэ гъэшIэгъо­нэу агъэкIоным афэгъэхьыгъ Iофтхьабзэхэр ИнтернетымкIэ зэхащэнхэ алъэкIыгъ. Къиным нахь пытэу зэкъуигъэуцуагъэх.

Фестивальхэр

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэхьыгъэ дунэе фестивалэу «Адыгеим ижъо­гъожъыехэр» гъэшIэгъонэу кIуагъэ.

Театрэхэм апае пьесэхэр тхыгъэнхэмкIэ зэнэкъокъоу зэхащагъэм шIуагъэ къызэри­хьыгъэр драматургхэм, режиссерхэм, театрэхэм япащэхэм хагъэунэфыкIыгъ.

Адыгеир илъэси 100 зэрэ­хъурэм фэгъэхьыгъэу респуб­ликэм и Къэралыгъо камернэ музыкальнэ театрэу Хьанэхъу Адамэ ыцIэ зыхьырэр Астрахань хэкум щыIагъ, спектаклэу къыщигъэлъэгъуагъэр агу рихьыгъ.

Ансамблэу «Ислъамыер» юбилей зэхахьэхэм ахэлэжьагъ. «Теуцожь Цыгъо — Адыгеим илъэпкъ ашуг» зыфиIорэ фес­тиваль-зэнэкъокъур Теуцожь Цыгъо къызыхъугъэр илъэси 165-рэ зэрэхъугъэм фэгъэхьыгъагъ.

2020-рэ илъэсыр шIэжьымрэ щытхъумрэ я Илъэсэу щытыгъ. Адыгеим культурэмкIэ иIофышIэхэр хэгъэгум щыкIогъэ фестивальхэм, зэхахьэхэм ахэлэжьагъэх. Патриотическэ IофшIэнхэр 2021-рэ илъэсым щылъагъэкIуатэх.

Псэуалъэхэм язэтегъэпсыхьан

Культурэм иунэхэр, еджапIэхэр зэрагъэцэкIэжьхэрэм, Фэдз культурэм и Унэ къызэ­рэ­щызэIуахыгъэм, нэмыкI зэхъо­­кIыныгъэхэм министрэр къа­тегущыIагъ. Джырэ уахътэ Лъэпкъ театрэу И. Цэим ыцIэ зы­хьырэр, Урыс театрэу А. Пуш­киным ыцIэкIэ щытыр зычIэтыхэ унэр агъэцэкIэжьы. Бжыхьэм къызэIуахыжьын ямурад.

«Театрэхэр кIэлэцIыкIухэм апай» зыфиIорэ федеральнэ Iофтхьабзэм Урысыем иполитическэ партиеу «Единэ Россиер» кIэщакIо фэхъугъ. Адыге­им икIэлэцIыкIу театрэу «Дышъэ къошыным» «Единэ Россиер» мылъкукIэ IэпыIэгъу къыфэ­хъугъ.

Тэхъутэмыкъое районымкIэ ныбжьыкIэ театрэу Ахэджэго Мэджыдэ ыцIэ зыхьырэм, нэмыкIхэм мылъкукIэ IэпыIэгъу афэхъугъэх.

Республикэм и Лъэпкъ музей агъэцэкIэжьы.

ЗэхъокIыныгъэхэр

Культурэм иунэхэр къоджэ псэупIэхэм яадминистрациехэм япхыгъэхэу Iоф ашIэныр на­хьышIукIэ Кощхьэблэ районым, фэшъхьафхэм ащалъытэ, егъэ­жьапIэхэр ашIыгъэх.

2020-рэ илъэсым культурэм иIофшIапIэхэм федеральнэ IэпыIэгъу къаратыщт. Адыгеим культурэм иIофшIэпIэ 16 ща­гъэцэкIэжьыщт, Псэйтыку культурэм и Унэ щашIыщт.

«Родинэ цIыкIум икультур» зыфиIорэ федеральнэ Iоф­тхьабзэр «Единэ Россием» лъигъэкIотэщт.

Республикэм культурэмкIэ и Министерствэ лъэхъаным ди­штэрэ мурадхэр иIэх. ЦIыфым ипIун, игъэсэн, щыIакIэр на­хьышIу шIыгъэныр пшъэрылъ шъхьаIэх.

АфэгушIуагъэх

Культурэм иIофышIэ и Мафэ фэгъэхьыгъэу Аулъэ Юрэ рес­публикэм щыпсэухэрэм къа­фэгушIуагъ. Щытхъу тхылъхэр зэ­ратыжьыгъэхэм ащыщых Ба­дый Къэплъан, Бырсыр Абдулахь, ШъэуапцIэкъо Аминэт, Сулейманов Юныс, Роман Кор­чагэ, Къыкъ Бэллэ, Джыгунэ Фатимэ, Ацумыжъ Рустам, Теу­цожь Марыет, ГъукIэлI Батыр, Исаева Анжелэ, Анзорыкъо Марзыет, Теуцожь Нурыет, Ацумыжъ Адамэ, Цэй Розэ, Къулэ Мыхьамэт, ансамблэхэу «Налмэсыр», «Ислъамыер», театрэхэр, нэмыкIхэри.

Зэхахьэм хэлэжьагъэхэм яеплъыкIэхэр къаIуагъэх.

ЕмтIылъ Нурбый. Сурэтхэр зэхахьэм къыщытетхыгъэх.