Гъэтхапэм и 24-р жъэгъэузым пэуцужьыгъэным и Дунэе мафэу хагъэунэфыкIы. Ащ фэгъэхьыгъэ пресс-конференцие жъэгъэузым пэуцужьыгъэнымкIэ Адыгэ республикэ клиническэ диспансерэу Шышъхьэ Долэт ыцIэ зыхьырэм щыкIуагъ.

Iофтхьабзэм хэлэжьагъэх диспансерым иврач шъхьаIэу Мамый Нурбый, IэзапIэу зигугъу къэтшIыгъэм лъэныкъо зэфэ­шъхьафхэмкIэ иврачхэу Татьяна Ермаковар, Светлана Коропенкар, Шъынэхъо ФатIимэт, Ольга Пляскинар ыкIи Валерий Терещенкэр, республикэ ыкIи къэлэ къэбарлъыгъэIэс амалхэм ялIыкIохэр.

Мы мафэм ихэгъэунэфыкIын джыри зэ тыгу къегъэкIыжьы типсауныгъэ тызэрэлъыплъэн фаер. Жъэгъэузым пэуцужьыгъэным епхыгъэ Iофтхьабзэм зэреджагъэхэр «Уахътэр ма­кIо!».

Фтизиатрическэ къулыкъум ыкIи зэхэт Iэзэн Iофым епхыгъэу 2020-рэ илъэсым ашIагъэм изэфэхьысыжьхэм, къихьэгъэ илъэсым пшъэрылъыкIэу зыфагъэуцужьыхэрэм атегущыIагъэх. Жъэгъэузым ебэныгъэнымкIэ республикэм щыпсэурэ цIыфхэм IэпыIэгъоу арагъэгъотырэр нахьышIу шIыгъэнымкIэ зэра­хьэрэ IофшIэнми медицинэм икъулыкъушIэхэр къытегущыIагъэх.

Врач шъхьаIэу Мамый Нурбый къызэриIуагъэмкIэ, блэкIыгъэ илъэсым жъэгъэуз хъугъэхэу Адыгэ Республикэм нэбгыри 102-рэ щагъэунэфыгъ, 2019-рэ илъэсым бэкIэ нахьыбагъ — нэбгырэ 152-рэ. Сымаджэхэм ащыщэу нэбгырэ 95-р шъолъырым ренэу щыпсэухэрэм ащыщых. Республикэ учетым пстэумкIи жъэгъэуз зиIэ нэбгырэ 1401-рэ хэт. Ахэм ащыщэу узэIэзэн плъэкIыщт нэбгырэ 869-мэ яшIуагъэ арагъэкIы, нэбгырэ 51-мэ Iэзэгъу агъоты­гъэп, 26-р – республикэм икIыжьыгъэх, 25-мэ ежь-ежьырэу Iэзэгъур чIадзыжьыгъ.

Светлана Коропенкам къызэрэхигъэщыгъэмкIэ, 2019 — 2020-рэ илъэсхэм жъэгъэуз зиIэу къыхагъэщыгъэ кIэлэцIыкIухэм япчъагъэ зы шапхъэм тет пIоми хъущт. Нэбгырэ мини 100-м телъытагъэу зы е тIу къыхагъэ­щы. Урысые гурыт къэ­гъэлъэгъоным елъытыгъэмэ, ар мэкIэ дэд.

Илъэс къэс республикэм щыпсэухэрэм пэшIорыгъэшъ уплъэкIун Iофтхьабзэу адызэрахьэхэрэм яшIуагъэкIэ мы узыр пасэу ыкIи игъом къахагъэщын алъэкIы. Адыгеим щыпсэурэ нэбгырэ 467143-м щыщэу 212007-р жъэгъэуз яIэмэ илъэсэу икIыгъэм ауплъэкIугъэх. Ар процент 45,4-м фэдиз. Мы пчъагъэр ашIомакIэу къыха­гъэщыгъ. УплъэкIуныр зэрэпшIыщтым гумэкIыгъо пылъэу щытэп. Хэти зыщыпсэурэ чIыпIэм епхыгъэ поликлиникэм, район сымэджэщым, жъэгъэузым пэуцужьыгъэнымкIэ Адыгэ респуб­ликэ клиническэ диспансерым ар ащикIун ылъэкIыщт. Илъэс къэс гъэтхапэм и 24-м жъэгъэу­зым пэуцужьыгъэным и Дунэе мафэ ипэгъокIэу Лениным ыцIэ зыхьырэ гупчэм флюорографие зыщашIын алъэкIыщт автомобилыр къыщэуцу.

Iофтхьабзэм къыщыгущыIэгъэ врач пстэуми зэрэхагъэунэфыкIыгъэмкIэ, мы уз щынагъор хэмыужъыныхьэзэ пасэу къы­хэбгъэщымэ, нахь гъэхъужьыгъошIу мэхъу. Арышъ, япсауныгъэ игъом лъыплъэнхэу, илъэсым зэ флюорографие арагъэшIынэу врачхэр къяджагъэх.

Жъэгъэузым пэуцужьыгъэнымкIэ Адыгэ республикэ клиническэ диспансерыр зэрифэшъуашэу зэтегъэпсыхьагъ. Сы­маджэу къяуалIэхэрэм IэпыIэгъу зэрафэхъущтхэ Iэмэ- псымэхэр зэрагъэгъотыгъэх, аужырэ шапхъэхэм адиштэрэ оборудованиер яI. Лабораторием амалэу иIэхэм яшIуагъэкIэ жъэгъэузыр цIыфым къеузыгъэ къодыеу къыхагъэщын ыкIи еIэзэнхэ алъэкIы, диспансерым иучет хэтхэм IэпыIэгъу афэ­хъух. Диспансерым лучевой диагностикэмкIэ иотделение компьютернэ томограф чIэт. Сымаджэм IэпыIэгъу зэрэфэхъущтхэ Iэзэгъу уцхэр зэкIэ яI, ау ежь цIыфыри зэIэзэжьыным фэхьазырын, специалистхэм къыраIорэр зэкIэ ыгъэцэкIэн фае.

2020-рэ илъэсым жъэгъэузым пэуцужьыгъэнымкIэ Адыгэ рес­публикэ клиническэ диспансерым республикэ бюджетым къыхэхыгъэ сомэ миллиони 141,7-м ехъу къыIэкIэхьагъ. Уз щынагъоу жъэгъэузым респуб­ликэм зыщимыушъомбгъуным, ар пасэу ыкIи игъом къыха­гъэщыным фэIорышIэрэ Iоф­тхьабзэхэр зехьэгъэнхэм афэшI къэралыгъо программэу «Псауныгъэм хэхъоныгъэ ышIыныр» зыфиIорэр пхыращы. Ащ къыдыхэлъытагъэу сомэ миллион 1,5-рэ къафэкIуагъ. Мы мылъкумкIэ къалэм ыкIи район кабинетхэм Iэзэгъу уцхэр къафащэфыгъэх.

Iофтхьабзэм къэбар гушIуагъо къыщаIуагъ. Мыекъуапэ къыпыщылъ поселкэу Севернэм жъэ­гъэузым пэуцужьыгъэнымкIэ диспансерыкIэу щагъэпсыщтым ипроект хьазыр. Зы сменэм ащ нэбгыри 150-рэ ыштэн ылъэ­кIыщт, чэщи мафи зыщяIэзэщтхэ чIыпIи 175-рэ, мафэм телъы­тагъэу 25-рэ хэтыщтых.

Iэшъынэ Сусан. Сурэтхэр Iэшъынэ Аслъан тырихыгъэх.