Мэзэхэ уахътэм нэфынэр къэзытырэ пкъыгъохэр на­хьы­бэрэ лъэсрыкIохэм агъэфедэнхэу Къэралыгъо авто­инспекторхэм Мыекъопэ къэралыгъо технологическэ уни­верситетым иволонтерхэр ягъусэхэу цIыфхэм къя­джагъэх.

ГъогурыкIоным хэла­жьэхэрэм нэфынэр къэзытырэ пкъыгъохэр агъэфедэнхэу зэрэщытым епхыгъэ пэшIорыгъэшъ зэдэгущыIэгъухэр инспекторхэмрэ волонтерхэмрэ республикэм икъэлэ гупчэ иурамхэм ащада­шIыгъэх.

Автомобильхэр зыщызекIорэ гъогум сакъыныгъэ къазыщыхэмыфэкIэ къыкIэлъыкIон ылъэкIыщт тхьамыкIагъохэр агу къагъэкIыжьыгъэх. Сыдигъуи гуфаплъэу зекIонхэу ыкIи гъогу зыпырыкIыным ишапхъэхэр амыукъонхэу за­фагъэзагъ. Анахь шъхьа­Iэу анаIэ зытырарагъэ­дзагъэр машинэхэр зэрыкIорэ гъо­гур зэпачы зы­хъукIэ гаджетхэр амыгъэ­федэнхэр ары. Ахэм яла­жьэкIэ лъэс­рыкIохэр тхьа­мыкIэгъуабэхэм зэраха­фэхэрэр щысэу къафа­хьыгъэх.

Пчыхьэшъхьэ уахътэм лъэсрыкIохэр гъогум нахь къыщылъэгъонхэм фэшI нэфынэр къэзытырэ хэу­шъхьафыкIыгъэ пкъыгъо­хэр агъэфедэнхэу Iоф­тхьабзэм изэхэщакIохэм цIыфхэм араIуагъ. Ащ ишIуагъэкIэ гъогу хъугъэ­шIагъэхэм япчъагъэ нахь макIэ зэрэхъущтым яцы­хьэ телъ.

ГъогурыкIоным ишап­хъэхэр зэрытхэгъэ тхьапэхэр Iофтхьабзэм хэлэ­жьагъэхэм аратыгъэх.

Iэшъынэ Сусан.