Лъэпкъ кIэлэцIыкIу къэшъокIо ансамблэу «Мые­къуапэ инэ­фылъэхэр» дунаим шIукIэ щашIэ.

— Аужырэ илъэсхэм Москва, Тыркуем, Мыекъуапэ, нэмыкIхэм ащыкIогъэ дунэе фестивальхэм тахэлэжьагъ, щытхъуцIэхэр къащыдэтхыгъ, — къеIуатэ «Мыекъуапэ инэфылъэхэм» яхудожественнэ пащэу, ­Къэбэртэе-Бэлъкъарым изаслуженнэ артистэу, Адыгэ Республикэм инароднэ артистэу Нэныжъ Айдэмыр. — Фестивальхэм сыдми такъыщышъорэ къодыеп. Лъэпкъ шIэжьым зедгъэIэтызэ, зэIукIэгъухэр тиныбжьыкIэхэм еджапIэ афэхъух.

«НыбжьыкIэ къашъор», «Ислъамыер», «ЗэфакIор», фэшъхьафхэри ансамблэм къе­шIых. Нэныжъ Айдэмыр къашъохэр ыгъэуцухэзэ, лъэпкъым итарихъ, шэн-хабзэхэр, ныбжьыкIэхэм яеплъыкIэхэр къыделъытэх.

ЛIэужхэр, лъэпкъхэр зэфэзыщэхэрэ къа­шъохэр гум къегущыIыкIых. Къэзэкъ культурэм изыгъэсапIэу «Звонницэмрэ» «Мые­къуапэ инэфылъэхэмрэ» ныбджэгъуныгъэ зэдыряI. Адыгэ къашъохэр къэзэкъ ансамблэм къешIых, «Мыекъуапэ инэфылъэхэм» къэзэкъ къашъохэр къагъэлъагъох. АнсамблитIури зэхэтэу лъэпкъ къашъохэр къызэдашIых.

— Искусствэм лъэпкъхэр зэфещэх, — къытиIуагъ «Звонницэм» ихудожественнэ пащэу Дмитрий Гордиенкэм. — НыбжьыкIэхэм шэн-хабзэхэр, тарихъыр ятэгъашIэ. Адыгэ орэдхэри тиансамблэ къеIох.

«Мыекъуапэ инэфылъэхэм» якъэшъуа­кIохэу СултIанэ Эльмиррэ Хьакъуй Ислъамрэ лъэпкъ къашъохэр агу рехьых. Ансамблэ цIэрыIоу «Налмэсым» еплъыхэзэ, адыгэ къашъохэм нахь афэщагъэ хъугъэх.

— Адыгэ Республикэм щыкIорэ мэфэкIхэм тигуапэу тахэлажьэ, — къаIуатэ гущыIэр зэIэпахызэ Э. СултIанэмрэ И. Хьакъуимрэ. — Адыгэхэм я ИлъэсыкIэ фэгъэхьыгъэ зэхахьэу «НАН-м» щыкIуагъэм тыкъыщы­шъуагъ, цIыф гъэшIэгъонхэр щытлъэгъугъэх. ЗэлъашIэрэ археологэу Тэу Аслъан къытфиIотэгъэ тарихъ къэбархэр тщыгъу­пшэщтхэп.

Къэралыгъо гъэпсыкIэ иIэу Адыгеир зыпсэурэр илъэси 100 зэрэхъурэм фэгъэ­хьыгъэ зэхахьэхэм «Мыекъуапэ инэфы­лъэхэр» ахэлэжьэщтых. Нэныжъ Айдэмыр къызэрэтиIуагъэу, адыгэ быракъым, адыгэ шъуашэм ямафэхэм, нэмыкI лъэпкъ мэфэкI зэхахьэхэм ансамблэм зафегъэхьазыры. Адыгэ шъуашэр зэрэзепхьащтым ехьылIэгъэ зэхахьэхэри гъэшIэгъон хъущтхэу Нэныжъ Айдэмыр елъытэ.

Сурэтым итхэр: «Мыекъуапэ инэфы­лъэхэм» якъэшъуакIохэу СултIанэ Эльмир ыкIи Хьакъуй Ислъам.