Адыгэ Республикэм и ЛIышъхьэу КъумпIыл Мурат шъолъырым Iоф щызышIэрэ псэолъэшI организациехэм япащэхэм тыгъуасэ аIукIагъ. ЗэдэгущыIэгъум хэлэжьагъэх ахэм афэгъэзэгъэ министерствэхэм ыкIи къулыкъухэм ялIыкIохэр, псэолъэшI предприятиехэм япащэхэр.

Урысые Федерацием и Президентэу Владимир Путиным псэолъэшIыным хэхъоныгъэ ышIынымкIэ пшъэрылъэу къыгъэуцугъэхэр республикэм зэрэщагъэцакIэхэрэр ары Iофыгъо шъхьаIэу зытегущыIагъэхэр.

АР-м псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ иминистрэ игуадзэу Лев Каракян къызэриIуагъэмкIэ, лъэпкъ проектэу «ПсэупIэр ыкIи къэлэ щыIакIэр» зыфиIорэм къыдыхэлъытагъэу 2030-рэ илъэ­сым нэс Адыгеим псэупIэ квадратнэ метрэ миллиони 2,6-рэ щашIын фае. БлэкIыгъэ илъэсым атыгъэр квадратнэ метрэ мин 258-рэ мэхъу, 2018-рэ илъэсым егъэпшагъэмэ а пчъагъэр про­цен­ти 140-м кIахьэ. Ащ нэ­мы­кIэу псэукIэ амалэу яIэр нахьышIу зышIын зылъэкIыгъэр унэгъо мин 24-рэ. Унэхэр нахьыбэу зыщашIыгъэхэр Тэхъу­тэмыкъое ыкIи Мыекъопэ районхэр, къалэу Мыекъуапэ.

Непэрэ мафэм ехъулIэу псэолъэшI организацие 34-мэ шъолъырым Iоф щашIэ. Ахэм 2025-рэ илъэсым нэс фэтэрыбэу зэхэт уни 150-рэ ашIынэу фитыныгъэ аратыгъ. Мы илъэсым псэупIэ квадратнэ метрэ мин 300 атынэу агъэнафэ. Щылэ мазэм ыкIи мэзаем къакIоцI квадратнэ метрэ мин 36,4-рэ ашIыгъах, блэкIыгъэ илъэсым мыщ фэдэ иуахътэ егъэпша­гъэмэ ар проценти 110-м ехъу.

ПсэупIэхэм яшIын фэгъэзэгъэ хъызмэтым хэхъоныгъэ ышIыным фэшI псэолъэшI организациехэм чIыфэхэр, субсидиехэр аратых. АР-м экономикэ хэхъо­ныгъэмкIэ ыкIи сатыумкIэ иминистрэу Шэуджэн Заур къызэриIуагъэмкIэ, илъэсым къыкIоцI банкхэм атыгъэ ипотекэ чIы­фэхэм япчъагъэ процент 38-кIэ нахьыбэ хъугъэ. 2020-рэ илъэсым республикэм къащаIахыгъэ мыщ фэдэ кредитхэм яставкэ проценти 2,73-кIэ къеIыхыгъ ыкIи 7,29-м нэсыгъ. Щылэ мазэм ипэублэ ехъулIэу респуб­ликэмкIэ цIыфхэм къырахыгъэ ипотекэм пстэумкIи ыуасэ сомэ миллиард 15,2-рэ мэхъу. 2020-рэ илъэсым хэхъуагъэр сомэ миллиарди 2,86-рэ.

ПсэолъэшIыным ылъэныкъо­кIэ щыIэ къэралыгъо IэпыIэгъум предпринимательхэр щыгъэгъо­зэгъэнхэм мэхьанэшхо зэриIэр Адыгеим и ЛIышъхьэ хигъэунэфыкIыгъ. Мыщ епхыгъэ хэбзэгъэуцугъэм зэхъокIыныгъэу ыкIи кIэу къыхахьэрэм епхыгъэ къэ­барыр псэолъэшI организациехэм игъом алъыгъэIэсыгъэн фаеу ылъытагъ.

— ЗэIухыгъэу ыкIи шIуагъэ къытэу Iоф зышIэ зышIоигъо­хэм зэкIэми хабзэм икъулыкъухэр IэпыIэгъу афэхъунхэм фэхьазырых. АщкIэ федеральнэ гупчэм къытырэ амалхэр къызфэдгъэфедэзэ зищыкIагъэхэм тишIуагъэ ядгъэкIыным мэхьанэшхо иI. Ау ежь псэолъэшI организациехэми къа­тефэрэр агъэцэкIэн фае, — къыIуагъ КъумпIыл Мурат.

Фэтэрыбэу зэхэт унэхэм яшIын зимылъку хэзылъхьагъэу агъэпцIагъэхэм яIофыгъуи рес­публикэм ипащэ къыщыуцугъ. Мы гумэкIыгъор дэгъэзыжьыгъэ­нымкIэ шъолъырым Iофышхо зэрэщашIэрэр къыхигъэщыгъ. Джащ фэдэу псэупIэхэм яшIын зэрэлъыкIуатэрэм пытагъэ хэлъэу лъыплъэгъэн зэрэфаер хигъэунэфыкIыгъ, ащкIэ пшъэ­рылъ гъэнэфагъэхэр къафишIыгъэх.

Унэхэр зытырашIыхьащтхэ чIыгу Iахьхэр муниципалитетхэм агъэнэфэнхэм иIофыгъуи шъхьа­фэу тегущыIагъэх. Мы лъэныкъом пстэуми анаIэ тырагъэтынэу, федеральнэ программэу «Стимул» зыфиIорэм шъолъырыр хэлэжьэным фэшI ищыкIэгъэ тхьапэхэр къагъэхьазырынхэу АР-м и ЛIышъхьэ къари­Iуагъ.

— ПсэупIэ комплексхэм яшIын ежъугъэжьэным ыпэкIэ социальнэ ыкIи транспорт инфраструктурэм хэхъоныгъэ зэришIын фаем шъуегупшыс. НахьыбэрэмкIэ ар зыфэгъэ­хьыгъэр кIэлэцIыкIу IыгъыпIэ­хэм, еджапIэхэм, IэзапIэхэм яшIын, щагухэм язэтегъэпсы­хьан ары, — къыIуагъ КъумпIыл Мурат.

Планэу щыIэм диштэу псэолъэшI IофшIэнхэр зэрэзэхащэрэм ыкIи ведомствэхэм азыфагу зэгурыIоныгъэ зэри­лъым ишIуагъэкIэ энергетикэм ыкIи гъэстыныпхъэ шхъуантIэр цIыфхэм аIэкIэгъэхьэгъэным епхыгъэ Iофыгъуабэ зэшIохыгъэ зэрэхъурэр Адыгеим и ЛIышъхьэ къыIуагъ.

— Экономикэм хэхъоныгъэ ышIынымкIэ псэолъэшIыныр ары апэ итын фаер. Тызэгъу­сэу, зыкIыныгъэ тазыфагу илъэу Iоф зызэдатшIэкIэ ары псэолъэшIыным ылъэныкъокIэ УФ-м и Президентэу Владимир Путиным къыгъэуцугъэ пшъэрылъхэр зэшIохыгъэхэ зыхъущтыр, — къыхигъэщыгъ КъумпIыл Мурат.

Адыгеим и ЛIышъхьэ ипресс-къулыкъу.